બજેટ રજૂ થવાને હવે ગણતરીના દિવસો બાકી છે. આજ, 28 જાન્યુઆરીથી બજેટ સત્ર રજુ થશે. બજેટ સત્રના પ્રથમ દિવસે સંસદના બંને ગૃહોની સંયુક્ત બેઠકને સંબોધિત કરતા રાષ્ટ્રપતિ દ્રૌપદી મુર્મુએ સરકારનો આગામી રોડમેપ અને આર્થિક સુધારાનો એજન્ડા સ્પષ્ટ કર્યો છે. રાષ્ટ્રપતિએ પોતાના સંબોધનમાં ભારતને વૈશ્વિક વ્યાપાર અને ટેક્નોલોજીના કેન્દ્રમાં સ્થાપિત કરવા પર ભાર મૂક્યો હતો.
'રિફોર્મ એક્સપ્રેસ' અને આર્થિક :&nbsp;
રાષ્ટ્રપતિએ 'રિફોર્મ એક્સપ્રેસ'ને સરકારની ઓળખ ગણાવતા કહ્યું કે, ભારત આજે વિશ્વના રક્ષણવાદ સામે ખુલ્લા વ્યાપારનો મજબૂત પક્ષકાર છે. ખાસ કરીને ભારત-યુરોપિયન યુનિયન (EU) વચ્ચે થયેલા ફ્રી ટ્રેડ એગ્રીમેન્ટ (FTA) ને તેમણે ઐતિહાસિક ગણાવ્યું હતું. આ સમજૂતીથી ભારતના કાપડ, ઉત્પાદન અને સેવા ક્ષેત્રમાં લાખો નવી રોજગારીની તકો ઊભી થશે.
ટેક્નોલોજી અને ડીપફેકનો પડકાર:
રાષ્ટ્રપતિએ આર્ટિફિશિયલ ઇન્ટેલિજન્સ (AI)ના યુગમાં ભારતની અગ્રણી ભૂમિકાની પ્રશંસા કરી હતી, પરંતુ સાથે જ 'ડીપફેક' ટેક્નોલોજી સામે ગંભીર ચેતવણી આપી હતી. તેમણે જણાવ્યું કે, ડિજિટલ સ્પેસમાં સામાજિક સદભાવ અને લોકશાહીના રક્ષણ માટે સામૂહિક જવાબદારી જરૂરી છે. ભારત ટૂંક સમયમાં ગ્લોબલ AI ઈમ્પેક્ટ સમિટનું પણ આયોજન કરશે.
આંતરિક સુરક્ષાના મોરચે મોટી સફળતાનો ઉલ્લેખ કરતા તેમણે કહ્યું કે, નકસલવાદનો પ્રભાવ 126 જિલ્લાઓથી ઘટીને હવે માત્ર 8 જિલ્લાઓ સુધી સીમિત રહ્યો છે. આ ઉપરાંત, છેલ્લા 10 વર્ષમાં 25 કરોડ લોકો ગરીબી રેખામાંથી બહાર આવ્યા છે અને ગરીબો માટે ૪ કરોડ પાકા મકાનો બાંધવામાં આવ્યા છે.
ઉર્જા અને ઉદ્યોગ:
ભારત હવે ૨૦૪૭ સુધીમાં 100 GW પરમાણુ ઉર્જાના લક્ષ્યાંક સાથે આગળ વધી રહ્યું છે. સંરક્ષણ ઉત્પાદન 1.5 ટ્રિલિયન રૂપિયાને પાર કરી ગયું છે, જે ભારતની આત્મનિર્ભરતાનું પ્રતીક છે. રાષ્ટ્રપતિએ લેબર કોડ, પીએમ સૂર્ય ઘર મફત વીજળી યોજના અને પીએલઆઈ સ્કીમનો ઉલ્લેખ કરીને ભારતના 'ગ્રીન ગ્રોથ' અને ઔદ્યોગિક વિકાસની ગાથા રજૂ કરી હતી.

ટેક્નોલોજી, મેન્યુફેક્ચરિંગ અને રોજગારી પર ભાર; ભારત-EU ફ્રી ટ્રેડ ડીલ બનશે ગેમ ચેન્જર.

January 28, 2026 | 16:57 IST