અમદાવાદમાં તંદુર કાંડ, યુવતીની હત્યામાં ચોંકાવનારો ખુલાસો

અમદાવાદમાં એરપોર્ટ વિસ્તારમાં વધુ એક ચોંકાવનારો બનાવ બન્યો છે. એરપોર્ટ વિસ્તારમાં આવેલી હોટલ તંદુર પેલેસમાંથી મહિલાની લાશ મળતા સનસનાટી મચી ગઇ છે. મૃતક મહિલાનું નામ નસરીનબાનુ હોવાનો ખુલાસો થયો છે. નસરીન ચિંતન નામના યુવક સાથે હોટલમાં આવી હોવાની માહિતી બહાર આવી છે. પ્રાથમિક તપાસમાં બહાર આવ્યું છે કે ચિંતન વાઘેલા નામના આ યુવક સાથે નસરીનને પ્રેમ સંબંધ હતો અને 1 વર્ષથી તે નસરીનના ઘેર આવતો જતો રહેતો હતો.

 શહેરના એરપોર્ટ વિસ્તારમાં આવેલી હોટલ તંદુરમાં નસરીન નામની યુવતીની ગળે ફાંસો આપીને હત્યા કરાઇ હોવાનો બનાવ બનતા પોલીસ તંત્રમાં દોડધામ મચી ગઇ હતી. નસરીન શહેરના રામોલ વિસ્તારમાં રહેતી હોવાનું બહાર આવ્યું છે. તે ચિંતન નામના શખ્સ જોડે હોટલ તંદુરમાં આવી હતી.

પોલીસની પ્રાથમિક તપાસમાં બહાર આવ્યું છે કે નસરીન એરપોર્ટ પર એક ફૂડ કોર્ટમાં નોકરી કરતી હતી. અને ઉત્તર પ્રદેશના સંત કબીરનગરમાં રહેતી હતી. ઘટનાની જાણ થતાં એરપોર્ટ પોલીસે ઘટનાસ્થળે પહોંચી તપાસ શરુ કરી છે.

 બીજી તરફ આ મામલે તંદુર હોટલના મેનેજરનું નિવેદન પણ આવ્યું છે. મેનેજરના જણાવ્યા મુજબ ચિંતન અને નસરીન હોટલમાં આવીને રુમ નંબર 108માં રોકાયા હતા. તેની સાથે જે યુવક હતો તે ચિંતન નામનો યુવક જમવાનું કહીને હોટલની બહાર ગયો હતો. જો કે કલાકો સુધી તે પાછો આવ્યો ન હતો જેથી હોટલના સ્ટાફે રુમમાં તપાસ કરી તો યુવતી મૃત હાલતમાં જોવા મળી હતી. નવાઇની વાત એ છે કે રુમનો દરવાજો ખુલ્લો હતો.  ક્યા સંજોગોમાં યુવતીની હત્યા થઇ છે અને તેની સાથે રહેલો યુવક કોણ હતો જે રુમમાંથી ગાયબ થઇ ગયો હતો તે સહિતના મુદ્દા પર પોલીસે તપાસ શરુ કરી છે.