વડોદરા: ઠગ અપૂર્વ પટેલ અને સોહમ વિરુદ્ધ રેડ કોર્નર નોટિસની તજવીજ

વડોદરા : શહેરના અનેક લોકોને કરોડો રૂપિયાની છેતરપિંડીનો ભોગ બનાવનાર ઠગ બિલ્ડર અપૂર્વ પટેલ અને છેતરપિંડીના અન્ય એક કેસમાં સંડોવાયેલો સોહમ પટેલ હાલ ફરાર છે. આ બંને આરોપીઓ દેશ છોડીને વિદેશમાં સંતાયા હોવાની પ્રબળ આશંકા સેવાઈ રહી છે, જેના પગલે તેમના વિરુદ્ધ રેડ કોર્નર નોટિસ જારી કરવાની પ્રક્રિયા તેજ બનાવવામાં આવી છે. પોલીસ સૂત્રોના જણાવ્યા મુજબ, આ કેસમાં કુલ 41 આરોપીઓ વિરુદ્ધ કાર્યવાહી હાથ ધરવામાં આવી છે, જે આગામી સમયમાં આ બંને મુખ્ય ઠગોની મુશ્કેલીમાં વધારો કરશે.

વિવિધ ઠગાઈ કેસોમાં વોન્ટેડ: વડોદરામાં મુજમહુડા સ્થિત સમૃદ્ધિ બંગ્લોઝના રહેવાસી બિલ્ડર અપૂર્વ દિનેશભાઈ પટેલ દ્વારા માંજલપુર, અક્ષરચોક અને વડસર રોડ વિસ્તારોમાં દુકાનો અને મકાનોની સંખ્યાબંધ યોજનાઓની જાહેરાત કરવામાં આવી હતી. આ યોજનાઓમાં રોકાણ કરનારા ગ્રાહકો પાસેથી પૈસા લીધા બાદ તેમને છેતરવામાં આવ્યા હતા. એટલું જ નહીં, એક જ મકાન અનેક લોકોને વેચી દેવાના કિસ્સાઓ પણ પોલીસ ચોપડે નોંધાયેલા છે. મહાઠગ અપૂર્વ પટેલ સામે 40થી વધુ પોલીસ ફરિયાદો દાખલ થયેલી છે. આ જ રીતે, છેતરપિંડીના અન્ય એક મામલામાં સોહમ પટેલ વિરુદ્ધ પણ ફરિયાદ નોંધાઈ છે. આ બંને ગુના દાખલ થયા બાદથી તેઓ લાંબા સમયથી ભાગેડુ છે.

41 આરોપીઓ શોર્ટલિસ્ટ, LOC પણ ઇશ્યુ: તાજેતરના અહેવાલો મુજબ, ક્રાઈમ બ્રાન્ચના સૂત્રોએ પુષ્ટિ કરી છે કે અપૂર્વ પટેલ અને સોહમ પટેલ વિરુદ્ધ રેડ કોર્નર નોટિસ જારી કરવાની કાર્યવાહી શરૂ કરી દેવામાં આવી છે. સૂત્રોએ વધુમાં જણાવ્યું કે આ બંને આરોપીઓનું છેલ્લું લોકેશન સંયુક્ત આરબ અમીરાત (UAE) મળ્યું છે, અને આ અંગે ઈન્ટરપોલને પણ જાણ કરવામાં આવી છે. આશરે 41 અન્ય આરોપીઓને પણ કાયદેસરની કાર્યવાહી માટે શોર્ટલિસ્ટ કરવામાં આવ્યા છે. તેમના વિરુદ્ધ લુકઆઉટ સર્ક્યુલર (LOC) પણ ઇશ્યુ કરીને તમામ એરપોર્ટ ઓથોરિટીને એલર્ટ કરવામાં આવી છે, જેથી તેઓ દેશ છોડીને ભાગી ન શકે.