અજાણ્યા બાઈકચાલકોએ વેપારી પાસેથી 18 લાખ લૂંટ્યા

અમદાવાદમાં લૂંટની એક ચોંકાવનારી ઘટના સામે આવી છે. શહેરના સરસપુર વિસ્તારમાં લોખંડ વેપારી પાસેથી અજાણ્યા બાઈકચાલકોએ 18 લાખની રકમ લૂંટી લીધી હોવાનું સામે આવ્યું છે. પોલીસ સૂત્રો મુજબ, નારાયણદાસ બિના નામના વેપારી આંગડિયા પેઢીમાંથી પૈસા લઈને ઘરે જઈ રહ્યા હતા, ત્યારે આ ઘટના બની હતી.

માહિતી મુજબ, નારાયણદાસ બિના 12 નવેમ્બરે નવરંગપુરા સ્થિત ઈશ્વર સોમા આંગડિયા પેઢીમાંથી 21.36 લાખ રૂપિયા લઈને નીકળ્યા હતા. જેમાંથી 18 લાખ રૂપિયા તેમણે જ્યુપિટર સ્કૂટરની ડેકીમાં રાખ્યા હતા, જ્યારે 3.36 લાખ રૂપિયા બેગમાં રાખ્યા હતા. સાંજે સરસપુર વંદે માતરમ પાર્ટી પ્લોટ નજીક એક અજાણ્યા બાઈકચાલકે તેમની આગળ બાઇક લાવીને રોકી દીધા અને ઝગડો શરૂ કર્યો.

ઝગડા દરમિયાન આરોપીએ નારાયણદાસની સ્કૂટરની ચાવી કાઢીને રોડ પર ફેંકી દીધી. વેપારી ચાવી લેવા આગળ ગયા તે દરમિયાન અન્ય બે અજાણ્યા શખ્સોએ તેમની જ્યુપિટરની ડેકી ખોલી 18 લાખ ભરેલી બેગ લઈને ફરાર થઈ ગયા.

બનાવ અંગે વેપારીએ તાત્કાલિક પોલીસને જાણ કરી હતી. ઘટના બાદ ઝોન-3 ડીસીપી અને એસીપી સહિતનો કાફલો સ્થળ પર પહોંચી તપાસ હાથ ધરી હતી. હાલ શહેરકોટડા પોલીસ સ્ટેશને અજાણ્યા આરોપીઓ વિરુદ્ધ ગુનો નોંધી વધુ તપાસ શરૂ કરી છે.