Shillong : હનિમુન પર ગયેલું કપલ, પતિની હત્યા અને...

ઇન્દોરના દંપતી રાજા રઘુવંશી અને સોનમ રઘુવંશીનો કેસ જટિલ બની રહ્યો છે. શિલોંગ પોલીસને આ કેસમાં મહત્વપૂર્ણ સંકેતો મળ્યા છે પરંતુ હજુ સુધી તેઓ સોનમ રઘુવંશીને શોધી શક્યા નથી. પોલીસ સૂત્રોના જણાવ્યા અનુસાર, રાજા અને સોનમે છેલ્લી વખત બપોરે 1:15 વાગ્યે મોબાઇલ ફોન પર તેમના પરિવારના સભ્યો સાથે વાત કરી હતી. તેમના સ્કૂટર પર લગાવેલ GPS જણાવી રહ્યું છે કે તેમની ગતિ બપોરે 2 વાગ્યે શૂન્ય થઈ ગઈ હતી અને પછી ફરીથી તેમની સાથે કોઈ સંપર્ક થયો ન હતો. કેસની તપાસ કરી રહેલી પોલીસ ટીમોનો અંદાજ છે કે હુમલાખોરો કે લૂંટારાઓએ બપોરે 2 થી 2:30 વાગ્યાની વચ્ચે બંને પર હુમલો કર્યો હતો. લૂંટનો પ્રતિકાર કરતા રાજાનું મોત થયું હતું અને સોનમનું અપહરણ થયું હતું.

હાલમાં, પોલીસ અધિકારીઓ સોનમ રઘુવંશી વિશે મૌન છે. પોલીસ સૂત્રોના જણાવ્યા અનુસાર, મીડિયામાં મામલો જોર પકડ્યા બાદ અપહરણકારો ભૂગર્ભમાં ઉતરી ગયા હોવાની શક્યતા છે. આ ઉપરાંત, પરિવારના દાવા બાદ, પોલીસે બાંગ્લાદેશી માનવ તસ્કરી ગેંગના એંગલથી પણ કેસની તપાસ શરૂ કરી છે.

બીજી તરફ પોસ્ટમોર્ટમ પછી રાજા રઘુવંશીનો મૃતદેહ તેના પરિવારને સોંપવામાં આવ્યો હતો. પરિવારે મૃતદેહનો અગ્નિસંસ્કાર કર્યો છે. રાજાને શ્રદ્ધાંજલિ આપવા માટે મોટી સંખ્યામાં લોકો આવ્યા હતા. તે જ સમયે, રાજાના પરિવારે માંગ કરી હતી કે આ કેસની તપાસ કેન્દ્રીય એજન્સીઓ દ્વારા કરવામાં આવે અને આરોપીઓને કડક સજા આપવામાં આવે. રાજાનો મૃતદેહ મેઘાલયના સોહરામાં એક ઊંડા ખાડામાં પડેલો મળી આવ્યો હતો. તેના શરીર પર ઘણા નિશાન હતા. ઉલ્લેખનિય છે કે ઇન્દોરની સોનમ રઘુવંશી અને તેના પતિ રાજા રઘુવંશ લગ્ન પછી હનીમૂન માટે મેઘાલય ગયા હતા.

 

રાજા રઘુવંશીની સ્કૂટી જ્યાંથી મળી આવી હતી તે સ્થળની નજીક આવેલા એક કાફેના માલિક છેલ્લા કેટલાક દિવસોથી ગુમ હોવાનું કહેવાય છે. જોકે, કાફે સંચાલક અને પોલીસે આ અંગે મૌન સેવ્યું છે. મીડિયા રિપોર્ટ્સ અનુસાર, સોનમ ઉપવાસ કરી રહી હતી. પરિવારને શંકા છે કે દંપતીનો કાફેના કર્મચારી સાથે કોઈ વાતને લઈને ઝઘડો થયો હતો. મનાઇ રહ્યું છે કે કોફીના ખરાબ સ્વાદને કારણે કાફેના કર્મચારી અને દંપતી વચ્ચે ઝઘડો થયો હતો, ત્યારબાદ સોનમે કોફી પણ ફેંકી દીધી હતી. જોકે, પોલીસે આ અંગે કંઈપણ પુષ્ટિ આપી નથી. પોલીસના જણાવ્યા અનુસાર, કેસની તપાસ ચાલી રહી છે અને ટૂંક સમયમાં રાજાના હત્યારાઓ પોલીસ કસ્ટડીમાં હશે. એવું કહેવામાં આવી રહ્યું છે કે ગુના સ્થળની આસપાસનો વિસ્તાર ગુનેગારોનું પ્રભુત્વ ધરાવે છે અને આ પહેલા પણ વિદેશી પ્રવાસીઓ સાથે ગુનાહિત ઘટનાઓ બની છે.