સુરતમાં સ્વામિનારાયણ મંદિરના સ્વામીનો આપઘાત

સુરતના લસકાણા વિસ્તારમાં આવેલા સ્વામિનારાયણ મિશન મંદિરના સાધુ પ્રિયદર્શન સ્વામીના મોત બાદ સમગ્ર વિસ્તારમાં ચકચાર મચી ગઈ છે. 48 વર્ષીય સ્વામીજી છેલ્લા 20 દિવસથી સારવાર હેઠળ હતા. 15 મેના રોજ હોસ્પિટલમાં તેમનું સારવાર દરમિયાન નિધન થયું હતું. ઘટનાને લઈને પોલીસ દ્વારા અકસ્માતે મોતનો ગુનો નોંધી તપાસ શરૂ કરવામાં આવી છે.

મળતી માહિતી મુજબ, 26 એપ્રિલની રાત્રે પ્રિયદર્શન સ્વામી મંદિરમાં બેભાન હાલતમાં મળી આવ્યા હતા. પ્રાથમિક તપાસમાં વધુ માત્રામાં ઊંઘની ગોળીઓ લીધાની આશંકા વ્યક્ત કરવામાં આવી છે. ત્યારબાદ તેમને પહેલાં ખાનગી હોસ્પિટલ અને પછી અડાજણ સ્થિત BAPS હોસ્પિટલમાં ખસેડવામાં આવ્યા હતા. લાંબી સારવાર બાદ તેમણે અંતિમ શ્વાસ લીધા હતા.

મળતી વિગતો અનુસાર કાપોદ્રા વિસ્તારના કલાકુંજ સ્વામિનારાયણ મંદિરના પ્રિયદર્શન સ્વામી ગત 26 એપ્રિલના રોજ રાત્રે સાડા નવ વાગ્યાના સુમારે મંદિરમાં બેભાન હાલતમાં મળી આવ્યા હતા. પ્રાથમિક તપાસમાં તેમણે કોઈ ઝેરી અથવા કેમિકલયુક્ત પદાર્થ પી લીધો હોવાનું સામે આવ્યું હતું. તેમના સગા શૈલેષભાઈ અને અન્ય સેવકો તાત્કાલિક સારવાર માટે વરાછાની ખાનગી હોસ્પિટલ લઈ ગયા હતા. ત્યારબાદ વધુ સારવાર માટે 30 એપ્રિલના રોજ અડાજણ સ્થિત BAPS. હોસ્પિટલના આઈસીયુ વોર્ડમાં ખસેડાયા હતા. જ્યાં શુક્રવારે(15 મે) ફરજ પરના તબીબે તેમને મૃત જાહેર કર્યા હતા.

એક હરિભક્તના વીડિયો નિવેદન અનુસાર સ્વામીએ અગમ્ય કારણોસર ઊંઘની ગોળીઓ ખાઈ લીધી હોવાની વાત વહેતી થઈ છે. સ્વામીજીને ધંધાનું કે અન્ય કોઈ પ્રકારનું ટેન્શન નહોતું. તેઓ ગોળીઓ ક્યાંથી લાવ્યા અને શા માટે લીધી તે મોટો તપાસનો વિષય છે.

સ્વામિના આપઘાતની ઘટનાને લઈને સ્વામિનારાયણ સિદ્ધાંત હિતરક્ષક સમિતિ દ્વારા લસકાણા પોલીસને  લેખિત રજૂઆત કરવામાં આવી છે. સમિતિના પ્રતિનિધિ ઘનશ્યામ પટેલે પત્રમાં આક્ષેપ કર્યો છે કે, પ્રિયદર્શન સ્વામીના આપઘાત પાછળ કેટલાક શંકાસ્પદ કારણો જવાબદાર હોઈ શકે છે.

સમિતિએ માંગ કરી છે કે, ઘટનાસ્થળની સંપૂર્ણ તપાસ કરવામાં આવે. સ્વામીજીના મોબાઈલ ડિટેઈલ્સ, મેસેજ અને મંદિરના સીસીટીવી ફૂટેજ ચેક કરવામાં આવે. મંદિરના તમામ સંતો અને સેવકોના નિવેદનો નોંધવામાં આવે. જો કોઈ વ્યક્તિ દ્વારા તેમને માનસિક ત્રાસ, ધમકી, દબાણ કે બ્લેકમેઈલ કરાયા હોય તો જવાબદારો સામે કાયદેસરની કાર્યવાહી થાય.

BAPS હોસ્પિટલ તરફથી મળેલી વર્ધીના આધારે લસકાણા પોલીસે અકસ્માતે મોતનો ગુનો નોંધીને વધુ તપાસ શરૂ કરી છે. સાધુના પાર્થિવ દેહનું પેનલ પોસ્ટમોર્ટમ કરાવીને આત્મહત્યા પાછળનું સાચું કારણ શોધવા કવાયત હાથ ધરી છે. મંદિરમાં આ પ્રકારની ઘટના બનતા હરિભક્તોમાં ભારે અરેરાટી વ્યાપી ગઈ છે.

લસકાણા પોલીસે સ્ટેશનના પીઆઇ મીનાબા ઝાલાએ જણાવ્યું હતું કે, પ્રાથમિક તપાસમાં પ્રિયદર્શન સ્વામીએ આપઘાત કર્યો હોવાનું અનુમાન છે. પેનલ પોસ્ટમોર્ટમ કરવામા આવ્યું છે અને પોસ્ટમોર્ટમ રિપોર્ટ બાદ ચોક્કસ કારણ જાણવા મળશે.

સુરત ACP વિપુલ પટેલે જણાવ્યું કે, 26 એપ્રિલના રોજ વાલક પાટીયા પાસે આવેલી મિશન સ્કૂલના પ્રાંગણમાં રહેતા પ્રિયદર્શન સ્વામીએ અજાણ્યો પદાર્થ ખાઈ જીંદગી ટૂંકાવવાનો પ્રયાસ કર્યો હતો. લસકાણા પોલીસ સ્ટેશનમાં જાણવા જોગ નોંધવામાં આવી હતી. તેઓની સારવાર અલગ-અલગ હોસ્પિટલોમાં ચાલુ હતી. 15 મેના રોજ અડાજણની BAPS હોસ્પિટલ ખાતે ડોકટરે મૃત જાહેર કર્યા હતા. બાદમાં લસકાણા પોલીસે અકસ્માતે મોતનો ગુનો નોંધી તપાસ પીએસઆઈ સોલંકી કરી રહ્યા છે.

હિતરક્ષક સમિતિએ કરેલી અરજીમાં ઘટનાની તપાસ તટસ્થ અને ન્યાયિક રીતે થાય અને ઊંડાણપૂર્વક થાય. સ્વામીજીને કોઈ ધાકધમકી કે કોઈ બ્લેકમેઈલ કરતું હોય એવા કારણોસર આત્મહત્યા કરી હોય તો તેઓની સામે પણ કાર્યવાહી થાય એ બાબતે રજૂઆત કરવામાં આવી છે.