Surat : પત્નીના ત્રાસથી વધુ એક યુવાનની આત્મહત્યા, 12 સામે દુષ્પ્રેરણાનો ગુનો, બેની ધરપકડ

સુરત (Surat)ના મોટા વરાછા અબ્રામા રોડ ખાતે રહેતા અને મૂળ રાજકોટના 30 વર્ષીય યુવાનના આપઘાતના બનાવમાં ઉત્રાણ પોલીસે યુવાનની સુસાઈડ નોટ અને તેણે બનાવેલા ત્રણ વીડિયોના આધારે તેની પૂર્વ પત્ની શીતલ, તેનો પ્રેમી અને તેના 10 સ્ત્રી-પુરુષ મિત્રો વિરુદ્ધ આપઘાતની દુષ્પ્રેરણાનો ગુનો નોંધ્યો હતો. જે પૈકી શીતલ અને તેના પ્રેમીને નવસારીની એક હોટલમાંથી ઝડપી પાડવામાં આવ્યા છે. જ્યારે અન્ય 10 આરોપીઓની શોધખોળ ચાલી રહી છે. યુવકે આપઘાત પહેલા સુસાઈડ નોટ અને મોબાઈલમાં વીડિયો પણ બનાવ્યો હતો. જેના આધારે પોલીસે 12 સામે દુષ્પ્રેરણાનો ગુનો નોંધી વધુ તપાસ હાથ ધરી છે.

મૂળ રાજકોટ ગોંડલ ITI પાસે સાટોડીયા સોસાયટીના વતની અને સુરત (Surat)માં મોટા વરાછા અબ્રામા રોડ વાસ્તુ સર્કલ પંચતત્ત્વ રેસિડેન્સીમાં રહેતો 30 વર્ષીય જયદીપ મસુખભાઈ સાટોડીયા ઘરેથી ઓનલાઈન કુર્તીનો ધંધો કરતો હતો. જયદીપે નર્મદા સાગબારા નિશાળ ફળિયું ગામ ચિત્રા ફળિયામાં રહેતા લાલુભાઈ પી.રાઠવાની દીકરી શીતલ સાથે 30 ઓક્ટોબર 2023 ના રોજ પ્રેમ લગ્ન કર્યા હતા. લગ્ન બાદ જયદીપના પરિવાર સાથે બે મહિના સાથે રહેલી શીતલ નાની નાની વાતે જયદીપ અને પરિવારના અન્ય સભ્યો સાથે ઝઘડો કરતી હતી. જયદીપને વાળ પકડીને માર મારી ગાળો આપતી હતી. ઝઘડા વધતા શીતલ પોતાની રીતે અડાજણ ખાતે કોઈક જગ્યાએ એકલી રહેવા ચાલી ગઈ હતી. 

જોકે, બાદમાં તેણે ફરી જયદીપનો સંપર્ક કરી સાથે રહેવા કહ્યું હતું અને ઘરે આવી આખો દિવસ ઘરની બહાર બેસી રહેતી હતી. શીતલ કહેતી કે, હું ઘરના ધાબા ઉપરથી પડી જઈશ અને તમારા ઘરના તમામ સભ્યોને એટ્રોસિટી અને દહેજના ખોટા ગુનામાં ફસાવી હેરાન પરેશાન કરાવી નાખીશ તેવી ધમકી પણ આપતી હતી. જેથી 15 ફેબ્રુઆરી 2024 ના રોજ બંનેએ છૂટાછેડા લીધા હતા. દરમિયાન, ગત બીજીની રાત્રે શીતલે જયદીપને અડાજણ ખાતે બોલાવી તેના પ્રેમી સહિત 10 સ્ત્રી-પુરુષ મિત્રો સાથે મળી માર માર્યો હતો.

પિતા મનસુખભાઈ વતનમાં લગ્નપ્રસંગમાં ગયા હતા ત્યારે 4 એપ્રિલની રાત્રે જયદીપે મોટા વરાછા દુખીયાના દરબાર રોડથી લાલ તંબુ તરફ જવાના રસ્તા ઉપર હની બંગ્લોઝના ખુલ્લા પ્લોટમાં ઝેરી દવા પી લેતા હોસ્પિટલમાં દાખલ કરાયા બાદ ટૂંકી સારવારમાં મોત થયું હતું. બનાવ અંગે ઉત્રાણ પોલીસે શરૂઆતમાં અકસ્માત મોતનો ગુનો નોંધી તપાસ શરૂ કરી હતી. દરમિયાન જયદીપની અંતિમ વિધી બાદ પરિવારે તેના મોપેડની ડિક્કી ચેક કરતા તેમાંથી સુસાઈડ નોટ મળી હતી. તેના મોબાઈલ ફોનમાંથી પણ ઝેરી દવા પીધી તે પહેલા બનાવેલા ત્રણ વીડિયો મળ્યા હતા. જેને લઇ પરિવારે આ બાબતની જાણ પોલીસને કરી હતી. ઉત્રાણ પોલીસે સુસાઈડ નોટ અને વીડિયો કબજે લઈ તેના આધારે તેની પૂર્વ પત્ની શીતલ સહિત અન્ય 11 સામે આત્મહત્યાના દુષ્પ્રેરણાનો ગુનો નોંધી તપાસ હાથ કરી હતી.

જયદીપે સુસાઈડ નોટમાં લખ્યું હતું કે, "મમ્મી પાપા મને માફ કરજો, હું હારી ગયો છું. મારી લાઈફ બગાડી નાખી અને મેં એને બોવ મોકા આપ્યા એણે મારી સાથે ખોટું કર્યું, બધાએ ના પાડી છતાં મેં એને પાછો મોકો આપ્યો અને તેણે મારી ગેમ રમી. મારા મરવા પાછળ બોવ બધા લોકો છે. પ્રનાલી, ટીના, રૂચિત, મોહસિન, રીચા, નિરવ, આયાન, કંચન, હીના, દેવલ, યુવી, હજી બી છે જેના નામ નથી ખબર. હું આ લોકોના લીધે મારી લાઈફ ખરાબ થઈ ગઈ અને મેં બહુ બધું સહન કર્યું. હવે મારામાં હિમ્મત નથી આ લોકો મને મારે છે આ મારા ફ્રેન્ડ બી મારી નાખવા સુધી મને મારી નાખવા બોલ્યા છે. મારા પર ખોટા કેસ મારી વાઈફ પાસેથી કરાવ્યા હતા. મારા ઘરે આવીને મમ્મી પપ્પા બહેનને ધમકી આપે છે. મારામાં હિમ્મત નથી મને મરવા સુધી મજબૂર કરી હું હારી ગયો તેમ છું."

વધુમાં સુસાઈડ નોટમાં લખ્યું હતું કે, "શીતલ શું કામ મારી સાથે આવું કર્યું કે બીજાના લીધે મારી લાઈફ ખરાબ કરી દીધી તે હું જાઉં છું, આજ સુધી મેં તને આપેલા વચન નિભાવ્યા છે. મારી ભૂલ શું હતી કે જે, મેં તારું વિચાર કર્યો તે મારી લાઇફ ખરાબ કરી તે મારી કદર ના કરી તે મને જવાબ દેજે મેં શું બગાડ્યું તું તારું શીતલ આ લોકો મને બહુ જ હેરાન કર્યો છે. હું લાઇફથી આ બધાથી હારી ગયો છું એટલે ! આ પગલું ભરું છું. મને માફ કરજો બધા." જયદીપે ઝેરી દવા પીધી તે પહેલાનો આશરે એક ત્રીસ મિનિટનો એક વિડિયો તથા બીજા વિડિયો પંદર મિનટ અઠયાવીસ વીડિયો વીસ સેકન્ડનો બનાવી તેમાં પણ સુસાઈડ નોટમાં જે વાત લખી હતી તે વર્ણવી હતી.

આ અંગે મૃતક જયદીપના બનેવી નરેન્દ્ર ડોબરીયાએ જણાવ્યું હતું કે, જયદીપના અંતિમ સંસ્કાર બાદ તેનો મોબાઇલ ચેક કરતા તેમાંથી ત્રણ વીડિયો મળી આવ્યા હતા અને તેની ડિક્કીમાંથી એક સુસાઈડ નોટ મળી હતી. જયદીપે બનાવેલા ત્રણ વીડિયોમાં ત્રીજો વીડિયો તેણે ત્રીજી વાર આપઘાત કર્યો ત્યારનો હતો. જ્યારે અન્ય બે વીડિયો તેણે પહેલા આપઘાતનો પ્રયાસ કર્યો ત્યારના હતા. તેણે પહેલા પણ બે વાર આપઘાતનો પ્રયાસ કર્યો હતો જો કે તેની હિંમત થઈ ન હતી. જો કે ત્રીજી વાર તેણે આ અંતિમ પગલું ભરી લીધું હતું.

મોબાઈલમાં રહેલા વીડિયો અને જયદીપે પૂર્વ પત્ની શીતલ અને તેના મિત્રોના ત્રાસ અંગે કહ્યું હતું. તેના આધારે જયદીપના પિતા મનસુખભાઈએ બે દિવસ પહેલા ઉત્રાણ પોલીસ મથકમાં શીતલ લાલુભાઈ રાઠવા (ઉં.વ.26), તેનો પ્રેમી મોહસીન ટાઈગર, પ્રણાલી, ટીના, રૂચિત, રીચા, નીરવ, આયાન, કંચન, હીના, દેવલ અને યુવી વિરુદ્ધ આપઘાતની દુષ્પ્રેરણા અંગેની ફરિયાદ નોંધાવતા પોલીસે ગુનો નોંધી વધુ તપાસ હાથ ધરી હતી. આ સાથે આરોપીને ઝડપી પાડવાની દિશામાં ચક્રો ગતિમાન કર્યા હતા.

આ કેસની ગંભીરતાને જોતા ઉત્રાણ પોલીસ સ્ટેશનના PI ડી યુ બારડ દ્વારા આરોપીઓને ઝડપી પકડી પાડવા માટે તપાસ કરી હતી. દરમિયાન બાતમી મળી હતી કે શીતલ રાઠવા અને તેનો પ્રેમી મોહસીન ટાઈગર નવસારી ખાતેની એક હોટલમાં છે. જેથી એક ટીમને નવસારી ખાતે રવાના કરવામાં આવી હતી અને શિતલબેન લાલુભાઇ રાઠવા (ઉં.વ.24 ધંધો.ઓનલાઇન વેપાર રહે. ફલેટ નં.303 સંજીવની એપાર્ટમેન્ટ કૈલાશપીઠ અઠવાગેટ સુરત શહેર મૂળ વતન ઘર નં.65, નિશાળ ફળિયું ગામ ચિત્રાળીયુ, તા.સાગબારા જી.નર્મદા) અને તેના પ્રેમી મોહસીન ઉર્ફે ટાઇગર હનિફભાઈ મેમણ (ઉં.વ.36 ધંધો.વેપાર રહે.2262 ગાયત્રીનગર સોસાયટી સરીબુજરંગ ગામ તા.ગણદેવી જી.નવસારી)ને હોટલ ખાતેથી પકડી પાડવામાં આવ્યા હતા.

જોકે હાલ તો ઉત્રાણ પોલીસે આ સમગ્ર મામલે આ બંનેની ધરપકડ કરીને વધુ પૂછપરછ હાથ ધરવામાં આવી છે. આ સાથે જ અન્ય આરોપીઓને ઝડપી પાડવાની દિશામાં ચક્રો ગતિમાન કરવામાં આવ્યા છે.