ઘાટલોડિયાની નેશનલ સ્કૂલ બહાર વિદ્યાર્થી ઉપર હુમલો

અમદાવાદમાં કાયદો અને વ્યવસ્થાની સ્થિતિ સામે સવાલો ઊભા કરતી ચોંકાવનારી ઘટના બની છે. ઘાટલોડિયાની નેશનલ સ્કૂલ બહાર ધોરણ 10માં અભ્યાસ કરતા એક વિદ્યાર્થી પર છરી વડે જીવલેણ હુમલો કરવામાં આવ્યો હતો. આ ઘટનામાં વિદ્યાર્થીને ઈજા પહોંચતા સારવાર માટે ખસેડવામાં આવ્યો છે. હુમલા પાછળ જૂનો ઝઘડો હોવાની પ્રાથમિક માહિતી મળી છે. ઘટનાની જાણ થતાં ઘાટલોડિયા પોલીસે ઘટના સ્થળે પહોંચી તપાસ હાથ ધરી છે. વિદ્યાર્થીઓ વચ્ચે થયેલી મારામારીની ઘટના CCTV કેમેરામાં કેદ થઈ છે.

પોલીસની પ્રાથમિક તપાસમાં જાણવા મળ્યું છે કે, આ હુમલા પાછળ ચાર મહિના જૂની અદાવત જવાબદાર છે. શાળામાં ભણતા બે વિદ્યાર્થીઓ વચ્ચે અગાઉ કોઈ બાબતે ઝઘડો થયો હતો. જૂની અદાવત રાખીને સોમવારે સવારે જ્યારે વિદ્યાર્થી શાળાએ પહોંચ્યો ત્યારે હુમલાખોર વિદ્યાર્થીએ અન્ય સાથીદારો સાથે મળીને તેના પર હુમલો કર્યો હતો. સામાન્ય બોલાચાલી બાદ ઉશ્કેરાયેલા હુમલાખોરે વિદ્યાર્થી ઉપર છરીના ઘા ઝીંકી દીધા હતા.

અમદાવાદ શહેરના DEO રોહિત ચૌધરીએ જણાવ્યું કે, નેશનલ સ્કૂલમાં ધોરણ 10ના વિદ્યાર્થીની પરીક્ષા પૂરી થયા બાદ બહાર નીકળ્યા પછી અન્ય યુવકો દ્વારા તેના પર હુમલો કરાયો છે તેવું નેશનલ સ્કૂલના સંચાલકે જણાવ્યું છે. શાળાના સંચાલકના જણાવ્યા પ્રમાણે વિદ્યાર્થી ઈજાગ્રસ્ત હોવાથી તેને નજીકની હોસ્પિટલમાં સારવાર આપી રજા આપી દેવામાં આવી છે.

વિદ્યાર્થીઓ વચ્ચે થયેલી મારામારીની ઘટના CCTV કેમેરામાં કેદ થઈ છે. જેમાં સ્પષ્ટ જોઈ શકાય છે કે, વિદ્યાર્થીઓનું ટોળું એક વિદ્યાર્થીને લાકડી અને પટ્ટા વડે મારી રહ્યું છે. સ્કૂલથી 100 મીટરના અંતરમાં જ વિદ્યાર્થી પર હુમલો કરવામાં આવ્યો હતો.

એ ડિવિઝનના ACP જયેશ બ્રહ્મભટ્ટએ જણાવ્યું હતું કે, નેશનલ સ્કૂલ પાસે વિદ્યાર્થીઓ અંદરોઅંદર ઝઘડ્યા હોવાની પોલીસને માહિતી મળી હતી. તેથી તાત્કાલિક પોલીસ સ્થળ પર પહોંચી ગઈ હતી. સ્થળ પર જઈને તપાસ કરતા ખબર પડી કે, ગેટની બહાર વિદ્યાર્થીઓ વચ્ચે મારામારી થઈ હતી. જે વિદ્યાર્થી ઇજાગ્રસ્ત થયો છે તેને લઈને બોલાચાલી થઈ હતી. મસ્તી મસ્તીમાં સામાન્ય બોલાચાલી થઈ હતી.

સ્કૂલમાં અભ્યાસ કરતા ત્રણ વિદ્યાર્થીઓ અને અન્ય કેટલાક લોકોએ ભેગા થઈ વિદ્યાર્થીઓને ખેંચી જઈ એક વિદ્યાર્થીને માથાના ભાગે, એક વિદ્યાર્થીને આંગળીના ભાગે અને અન્ય એક વિદ્યાર્થીને મૂંઢ માર માર્યો હતો. થોડા સમય પહેલા મસ્તી મસ્તીમાં બોલાચાલી થઈ ગઈ હતી. ચાર જેટલા વિદ્યાર્થીઓ તે સ્કૂલમાં જ અભ્યાસ કરે છે. જેમાંથી એક વિદ્યાર્થીનો ભાઈ પણ માર મારવા માટે આવ્યો હતો.

ભોગ બનનારને પોલીસ સ્ટેશન બોલાવી ફરિયાદ નોંધવામાં આવી રહી છે. હુમલો કરનાર વિદ્યાર્થીઓને રાઉન્ડઅપ કરવા માટેની પ્રક્રિયા શરૂ કરવામાં આવી છે. 8 થી 10 જેટલા લોકોએ હુમલો કરી હોવાની હકીકત સામે આવી છે. ભોગ બનનારે જણાવ્યું કે પાઇપ, લાકડી અને ચપ્પુ વડે હુમલો કરવામાં આવ્યો હતો. જેમાં એકને માથાના ભાગે, એક વિદ્યાર્થીને આંગળી પર અને એકને મૂંઢ માર મારવામાં આવ્યો છે.

આ ઘટના અંગે નેશનલ સ્કૂલના ટ્રસ્ટી રમેશ અમીને જણાવ્યું કે, સ્કૂલથી 100 મીટર દૂર ઘટના બની છે. વિદ્યાર્થીઓ વચ્ચે અંદરો-અંદર ઝઘડો થયો હતો. જે દરમિયાન બહારથી આવેલા કેટલાક વિદ્યાર્થીઓએ અમારી સ્કૂલના વિદ્યાર્થીને માથામાં કડુ માર્યું હતું. વિદ્યાર્થીને ઇજા થતા સામાન્ય સારવાર આપ્યા બાદ વાલી સાથે ઘરે મોકલી દેવામાં આવ્યો છે.

બનાવની જાણ થતાં ઘાટલોડિયા પોલીસે ઘટના સ્થળે પહોંચી તપાસ હાથ ધરી છે. ભોગ બનનારના પરિવારે ફરિયાદ નોંધાવી છે. પોલીસે સીસીટીવી ફૂટેજ અને પ્રત્યક્ષદર્શીઓના આધારે હુમલાખોર વિદ્યાર્થીઓની ઓળખ કરી તેમને પકડી લેવાની તજવીજ હાથ ધરી છે. શાળાની બહાર ધોળા દહાડે બનેલી ઘટનાથી વાલીઓની ચિંતામાં વધારો થયો છે.

પાંચ મહિના પહેલા પણ બન્યો હતો બનાવ

19 ઓગસ્ટ, 2025ના રોજ અમદાવાદના ખોખરામાં સેવન્થ ડે સ્કૂલના ધોરણ 10ના વિદ્યાર્થી નયનની સ્કૂલમાં અભ્યાસ કરતા ધોરણ 10ના એક વિદ્યાર્થીએ બોક્સ કટર મારીને હત્યા કરી હતી. ઘટનાના CCTV ફૂટેજ પણ સામે આવ્યા હતાં. મૃતક વિદ્યાર્થી નયન ઇજાગ્રસ્ત હાલતમાં સ્કૂલના ગેટથી અંદર પ્રવેશ કરતો જોવા મળે છે. નયનને જ્યાં ઇજા પહોંચી એ પેટના ભાગને હાથથી દબાવીને સ્કૂલમાં પ્રવેશ કરતો જોવા મળે છે. બાદમાં નયન ઢળી પડતાં આસપાસમાં વિદ્યાર્થીઓનું ટોળું ભેગું થઈ જાય છે. સ્કૂલની બેદરકારી હોવાનું જણાવી વાલીઓએ વિરોધ નોંધાવી સ્કૂલમાં તોડફોડ કરી હતી.