રિવરફ્રન્ટ પર લૂંટનો ચોંકાવનારો બનાવ : મિત્રએ આપ્યો સડયંત્રને અંજામ

અમદાવાદના રિવરફ્રન્ટ ઈસ્ટ વિસ્તારમાં એક ચોંકાવનારી લૂંટની ઘટના સામે આવી છે, જેમાં મિત્રતાને શરમાવે તેવી રીતે એક યુવકને તેની ઓળખીતા મહિલા મિત્ર અને તેના સાથીદારો દ્વારા લૂંટવામાં આવ્યો હતો. પોલીસે ઝડપી કાર્યવાહી કરીને ગણતરીના કલાકોમાં ત્રણેય આરોપીઓને ઝડપી લીધા છે.   ઘટના રિવરફ્રન્ટ ઈસ્ટ વિસ્તારમાં ડફનાળા નજીક ભગવાન બુદ્ધની પ્રતિમા પાસે બની હતી. ફરિયાદી ધરમેન્દ્રભાઈએ તેમનું મકાન વેચીને 22 લાખ રૂપિયા મેળવ્યા હતા. લોનની રકમ ચૂકવ્યા બાદ તેમની પાસે 7.45 લાખ રૂપિયાની રોકડ રકમ બચી હતી, જે તેમણે કાપડની થેલીમાં ભરી હતી. તેઓ પોતાની ઓળખીતા મહિલા મિત્ર પ્રિયાબેન દાનણીયા સાથે બહાર ફરવા નીકળ્યા હતા.   પ્રિયાબેન ફરિયાદીને પહેલા પાલડી ખાવા લઈ ગઈ અને ત્યારબાદ સાબરમતી રિવરફ્રન્ટ ખાતે ફરવા ગઈ. અહીં, પહેલેથી ઘડાયેલી યોજના મુજબ, પ્રિયાબેને તેના બે સાથીદારોને બોલાવ્યા અને લૂંટનું નાટક રચ્યું. ત્રણેય આરોપીઓએ મળીને ધરમેન્દ્રભાઈ પાસેથી રોકડ રકમવાળી થેલી ઝૂંટવી લીધી, ઝપાઝપી કરી અને ઘટનાસ્થળેથી ફરાર થઈ ગયા.   ફરિયાદ નોંધાયા બાદ અમદાવાદ પોલીસે તાત્કાલિક કાર્યવાહી હાથ ધરી. ફરિયાદીના ખુલાસાઓના આધારે પોલીસે મુખ્ય આરોપી પ્રિયાબેન દાનણીયા સહિત ત્રણેય આરોપીઓની ધરપકડ કરી લીધી. હાલ પોલીસ આરોપીઓ પાસેથી લૂંટેલી રકમનો હિસાબ મેળવવા અને ઘટનાની વધુ તપાસ માટે પૂછપરછ કરી રહી છે.   આ ઘટનાએ મિત્રતા પર વિશ્વાસ રાખનારા લોકોને ચોંકાવી દીધા છે. પોલીસની ઝડપી કાર્યવાહીને કારણે આરોપીઓ ઝડપાઈ ગયા, પોલીસે તમામ આરોપીને ઝડપી તેમની પાસેથી લૂંટની રકમ રીકવર કરવાની કામગીરી હાથ ધરી છે.