POS મશીન, ‘ટેપ એન્ડ પે’ અને QR કોડ – ઠગોની નવી ટેક્નિકલ લૂંટની સ્ટાઇલ

31 માર્ચના રોજ આનંદ નગર પોલીસ મથકે બેકરીના કામ સાથે સંકળાયેલી એક મહિલાએ ફરિયાદ નોંધાવી હતી. જે મુજબ મહિલા એક પ્રાઇવેટ બેન્કમાં સેવિંગ એકાઉન્ટ ધરાવતી હતી અને ક્રેડિટ કાર્ડ ધરાવતી હતી. તેને મેસેજ આવ્યા હતા કે તેણીના ક્રેડિટ કાર્ડના ઉપયોગથી 10 જેટલા ટ્રાન્ઝેક્શન થયા છે. જેમાં 49,855 ₹ તેના ખાતામાંથી ટ્રાન્સફર થઈ ગયા છે. તેણે કોઈને ક્રેડિટ કાર્ડ આપ્યું નહોતું કે કોઈ ઓનલાઇન વ્યવહાર કર્યા નહોતા કે ના OTP શેર કર્યો હતો. આ સંદર્ભે મહિલાએ 1930 ડાયલ કરી સાયબર ક્રાઇમ પોલીસને ફરિયાદ આપી હતી અને આનંદનગર પોલીસ મથકે પણ ફરિયાદ નોંધાવી હતી.

પોલીસે આ કેસમાં તપાસ કરતા કુલ 5 આરોપીઓના નામ હાલ સુધી સામે આવ્યા છે. જે મુજબ સુરત ખાતે રહેતો અને મૂળ અમરેલીનો ચિંતનકુમાર રૂપારેલિયા, સુરત ખાતે રહેતો અને મૂળ રાજકોટનો મિલન પટેલ, રાજકોટ ખાતે રહેતો અને મૂળ જૂનાગઢનો ફાલ્ગુન પટેલ, રાજકોટ ખાતે રહેતો અને મૂળ જૂનાગઢનો જયદીપ મારું તેમજ મુખ્ય આરોપી એવો સુરતનો અને વર્તમાનમાં થાઇલેન્ડ ખાતે રહેતો કૌશલ ઠક્કરનો તેમાં સમાવેશ થાય છે.

OTP કે લિંક વિના થતા ફ્રોડની સંક્ષિપ્ત સમજણ 

* ટેલિગ્રામ ગ્રુપમાં APK લિંક મોકલવામાં આવતી 

* APK લિંક ઓપન કરી એપ્લિકેશન ડાઉનલોડ કરવામાં આવતી 

* ટેલિગ્રામ ગ્રુપમાં આવતો ક્રેડિટ કાર્ડ કે ડેબિટ કાર્ડની માહિતી આપતું QR કોડ 

* QR કોડ સ્કેન કરતા ક્રેડિટ કાર્ડ ડેટા મળતો

* મોબાઈલમાં કાર્ડનો ડેટા મળતા POS મશીન પર ટેપ કરતા 

* POS મશીનમાં 'ટેપ ટુ પે' થી નાણા ઉપડતા

* OTP કે કાર્ડ શેયર કર્યા વગર ઠગાઈ શક્ય થતી 

મુખ્ય અને ફરાર આરોપી કૌશલ ઠક્કર થાઈલેન્ડ ખાતેથી મિલનને ટેલિગ્રામમાં લિંક APK લિંક મોકલતો હતો અને ક્રેડિટ કાર્ડની વિગતો આપતો QR કોડ મોકલતો હતો.ચિંતન આ APK લિંક ઓપન કરતો. એક એપ્લિકેશન ડાઉનલોડ થતી હતી. આ એપ્લિકેશન થી QR કોડ સ્કેન કરવામાં આવતો.સ્કેન કર્યા બાદ ક્રેડિટ કાર્ડની તમામ વિગત આરોપીઓને મળી જતી હતી.ફાલ્ગુન અને જયદીપ કોઈ એજન્ટ મારફતે POS (પોઇન્ટ ઓફ સેલ) મશીન ખરીદતા.


ત્ત્યારબાદ આ આરોપીઓ મોબાઇલના NFC (Near Field Communication) એટલે કે 'ટેપ ટુ પે' જેવા ફીચર્સનો ઉપયોગ કરીને POS મશીનની મદદથી ₹ 5 હજાર કે તેથી નાની રકમના વ્યવહાર કરતા.ક્રેડિટ કાર્ડની લિમિટને ધ્યાનમાં રાખી કુલ રકમના નાના-નાના ભાગ કરી આ વ્યવહાર કરાવમાં આવતા. ફાલ્ગુન અને જયદીપ POS ની વ્યવસ્થા કરતા. 


ચિંતન મોબાઈલથી ટ્રાન્ઝેક્શન કરતો અને મિલન ATM માં જઈ રોકડ ઉપાડી લાવતો અને આંગડિયા મારફતે કૌશલ સુધી પહોંચાડી આપતો. દોઢ મહિનામાં આરોપીઓએ જુદા જુદા લોકો સાથે કુલ 30 થી 35 લાખ રૂપિયાની છેતરપિંડી આચરી છે.

પોલીસે આ નવી રીતે લૂંટ કરનાર આરોપી પૈકી અગાઉ ત્રણ અને હાલ એક આરોપીની ધરપકડ કરી છે. ચિંતન રૂપારેલિયા, જયદીપ મારુ અને ફાલ્ગુનની અગાઉ કરી હતી. હાલ ચોથા આરોપી મિલનની ધરપકડ કરવામાં આવી છે. મુખ્ય અને ફરાર આરોપી કૌશલ ઠક્કર થાઈલેન્ડ હોવાની વિગત સામે આવતા પોલીસે આગળ વધુ તપાસ હાથ ધરી છે.

મોબાઈલમાં અજાણ્યા શખ્સ દ્વારાકરવામાં આવતા કોલ અથવા મોકલવામાં આવતી લિંક કે QR કોડ થી આપણે સાવચેત રહેતા હોઈએ છીએ, વિશ્વાસ વગર આપણે આપણા ક્રેડિટ કાર્ડ કે ડેબિટ કાર્ડ પણ કોઈને નથી આપતા. પણ આ બધી બાબતે જાગૃત રહેવા છતાં આ આધુનિક યુગમાં વગર લિંક કે OTP   એ કોઈ બેન્કનું ખાતું ખાલી કરી જાય તો શું કરવું ? નાણાંકીય વ્યવહારો જેટલા આધુનિક જેટલા સરળ બનતા જાય છે તેટલુંજ નાણાં સાચવવું અઘરું બનતું જાય છે. કેટલી પણ સાવચેતી રાખીયે પણ ભેજાબાજ લોકો રોજ ઠગ કરવાની નવી રીતો શોધી જ લેતા હોય છે.