વડોદરાના છાણી પોલીસ સ્ટેશનના પીઆઇ અમિત ગઢવી સસ્પેન્ડ

ગ્રામ પંચાયતની ચૂંટણીનો માહોલ જામ્યો છે ત્યારે જ સ્ટેટ મોનિટરીંગ સેલે શહેર નજીક દશરથ ગામમાં દરોડો પાડીને 2 કરોડ 44 લાખ જેટલી કિંમતનો દારુનો જંગી જથ્થો પકડી પાડ્યો છે. સ્ટેટ મોનિટરીંગ સેલે દશરથમાં જંગી દારુ પકડીને શહેર પોલીસનું નાક કાપી લીધું છે.  ખાસ કરીને છાણી પોલીસની નિષ્ક્રીયતા સામે સવાલો ઉભા થયા હતા. એસએમસી જો દરોડો પાડીને આટલો જંગી દારુ પકડી શક્તિ હોય તો સ્થાનિક છાણી પોલીસને કેમ માહિતી ના મળી કે દશરથમાં કરોડો રુપિયાનો દારુ લવાયો છે.  કિસ્સામાં છાણી પીઆઇ સહિતનો તમામ સ્ટાફ, એસીપી અને ડીસીપીની ગંભીર બેદરકારી બહાર આવી છે. આજે આ ઘટનામાં છાણી પોલીસ સ્ટેશનના પીઆઇ અમિત ગઢવી સસ્પેન્ડ કરાયા હોવાનું જાણવા મળે છે. 

આમ પણ નિયમ મુજબ સ્થાનિક પોલીસની નિષ્ક્રીયતા જણાતા કાર્યવાહી થવી જરુરી છે. 1 લાખ કરતા વધુ કિંમતનો દારુ પકડાય તો સ્થાનિક પોલીસ સામે કાર્યવાહી કરવામાં આવે છે તો પછી છાણી પોલીસના પીઆઇ સહિત તમામ સ્ટાફ, એસીપી તથા ડીસીપી સામે પણ કાર્યવાહી થવી જરુરી છે. ઉલ્લેખનિય છે કે સ્ટેટ મોનિટરીંગ સેલે સોમવારે વડોદરા નજીક દશરથ ગામમાં દરોડો પાડીને પોણા ત્રણ કરોડ જેટલો દારુનો જંગી જથ્થો ઝડપી પાડતા ખળભળાટ મચી ગયો છે. એસએમસીના દરોડાથી છાણી પોલીસની પોલ પણ ખુલી ગઇ છે.  દશરથ ખાતેના એક ગોડાઉનમાં સ્ટેટ મોનિટરીંગ સેલે કટીંગ સમયે જ દરોડો પાડી 2 કરોડ ઉપરાંતના દારૂના જથ્થા સાથે દારુના ગુનામાં કુખ્યાત બિશ્નોઇ ગેંગના ચારની ધરપકડ કરી આગામી 23મી જૂન 205 સુધીના રિમાન્ડ મેળવ્યા છે. જ્યારે પોલીસની પ્રાથમિક પુછતાછમાં વધુ પાંચ નામો સામે આવતા તમામની શોધખોળ કરવામાં આવી રહીં છે. દશરથ ગામના સ્મશાન પાસેના ગોડાઉનમાં વિપુલ માત્રામાં દારૂનો જથ્થો લાવવામાં આવ્યો હોવાની ચોક્કસ જાણકારી સ્ટેટ મોનિટરીંગ સેલની ટીમને મળી હતી. જેના પરિણામે એસ.એમ.સીની ટીમે ખાનગી રાહે બાલાજી ટ્રેડર્સના ગોડાઉનમાં દારૂના કટીંગ સમયે જ દરોડો પાડી રૂ. 2.44,24,536 ની કિંમતની 1,26,552 દારૂના ક્વાર્ટર સાથે બિશ્નોઇ ગેંગના ચારની ધરપકડ કરી હતી. આ મામલે છાણી પોલીસ સ્ટેશન ખાતે પ્રોહિબીશન એકટ હેઠળ ગુનો નોંધી પોલીસે દારૂ સહિત મોબાઈલ મળી રૂ. 2,69,50,786નો મુદ્દામાલ જપ્ત કરી વધુ તપાસ હાથ ધરવામાં આવી છે.