અમદાવાદમાં બાળકી પર હુમલો કરનારા રોટવિલર ડોગના માલિકની ધરપકડ

અમદાવાદના હાથીજણ વિસ્તારમાં રોટવિલર ડોગ દ્વારા કરાયેલા હુમલામાં 4 વર્ષની માસુમ બાળકીનું મોત નિપજ્યું હોવાનો અરેરાટીભર્યો બનાવ બન્યો છે. આ બનાવમાં પોલીસે પાલતુ શ્વાનના માલિક દિલીપ પટેલની ધરપકડ કરી છે, આ ઘટના બાદ સોસાયટીમાં ભારે ગુસ્સો જોવા મળ્યો હતો કારણ કે માત્ર ચાર મહિનાની બાળકી પર રોટવીલર ડોગે બચકાં ભરીને એવો હુમલો કર્યો હતો કે બાળકીનું મોત થયું હતું. 

હાથીજણની રાધે રેસીડેન્સીમાં આ બનાવ બન્યો હતો જ્યાં પાલતુ શ્વાને 4 વર્ષની બાળકીને ફાડી ખાધી હતી. બનાવની માહિતી મુજબ 4 વર્ષની બાળકીને લઇને તેની માસી પાળી પર બેઠી હતી આ સમયે પાલતુ શ્વાનના માલિકની પુત્રવધૂ પાલતુ શ્વાનને લઇને બહાર ફરવા નિકળી હતી. અચાનક જ આ કૂતરાએ પટ્ટા સાથે મહિલાને ઢસડીને પાળી પર માસુમ બાળકીને લઇને બેઠેલી તેની માસી પર હુમલો કર્યો હતો અને બાળકીનું માથુ મોંઢામાં લઇને 5થી 10 સેકન્ડ દબાવી રાખ્યું હતું, જેના પગલે બાળકીને ગંભીર ઇજા થઇ હતી બાળકીને નીચે પાડી દઇને માથામાં શ્વાને એક બચકું ભરતા બાળકીનું ખોપરીનું હાડકું તુટી ગયું હતું અને તેને હેમરેજ થયું હતું સરવારમાં બાળકીનું મોત થયું હતું.

ઘટનાના પગલે ભારે હાહાકાર મચી ગયો હતો. સોસાયટીના રહીશો દ્વારા શ્વાનના માલિક વિરુદ્ધ કડક કાર્યવાહી કરવાની અરજી વિવેકાનંદ પોલીસ સ્ટેશનમાં કરવામાં આવી હતી. પોલીસની તપાસમાં બહાર આવ્યું હતું કે રોટવિલર ડોગ બ્રિડના કુતરા પાળવા પર પ્રતિબંધ છે અને છતાં તેને ઘમાં રાખવામાં આવ્યો હતો. તેના માલિકે આ અંગે કોઇ રજીસ્ટ્રેશન પણ કરાવ્યું ન હતું. ઘટનાની જાણ થતાં વિવેકાનંદ પોલીસે AMC ના અધિકારીઓ સાથે પાળતું શ્વાનને કબજે લીધું હતું.  

પોલીસે હવે શ્વાન માલિક દિલીપ પટેલ સામે BNS ની કલમ 106(1) અને કલમ 291 હેઠળ કાર્યવાહી કરી  શ્વાન માલિક દિલીપ પટેલની ધરપકડ કરી છે.  શ્વાન માલિકે નિયમો નેવે મુકી લોકોના જીવ જોખમમાં મુક્યા હતા. અમદાવાદના હાથીજણ વિસ્તારમાં એક હૃદયદ્રાવક ઘટનાએ લોકોને સ્તબ્ધ કરી દીધા છે.

ઉલ્લેખનિય છે કે અમદાવાદ સહિત રાજ્યભરમાં  રખડતા શ્વાનોનો આતંક શહેરની ગલીઓમાં રોજ વધી રહ્યો છે. WHOના રિપોર્ટ અનુસાર, ભારતમાં દર વર્ષે 18 હજારથી 20 હજાર લોકો હડકવાના કારણે મૃત્યુ પામે છે, જેમાંથી મોટાભાગના કેસ શ્વાનના કરડવાના હોય છે.  અમદાવાદ મહાનગરપાલિકા રખડતા શ્વાનોને પકડવા અને તેમની નસબંધી માટે અભિયાન ચલાવે છે, પરંતુ આ સમસ્યા હજુ પણ કાબૂમાં આવી નથી. શહેરી વિસ્તારોમાં શ્વાનોની વધતી સંખ્યા માથાનો દુઃખાવો બની છે. ત્યારે તંત્ર ક્યારે આવી ઘટનાઓ રોકવામાં સફળ થાય છે?...પાલતું શ્વાન પર ક્યારે કોઈ ચોક્કસ નિયમ બનાવવામાં આવશે?