અમદાવાદ શહેરમાં વધુ એક પોલીસ કોન્સ્ટેબલ તોડકાંડ!

મુંબઇના વેપારીને ખોટા કેસમાં ફસાવી દેવાની ધમકી આપી અમદાવાદના દાસ્તાન સર્કલ પાસે 4 પોલીસ કોન્સ્ટેબલોએ રૂપિયા 5.88 લાખનો તોડ કર્યાની ફરિયાદ નોંધાઈ છે. તેવામાં વધુ એક વધુ બે કોન્સ્ટેબલોનો તોડકાંડનો ખુલાસો થયો છે. અમદાવાદમાં ભાવનગરના વેપારીને ધમકાવીને રૂપિયા 1.80 લાખ પડાવી લીધા છે. આ ઘટનામાં ક્રાઈમ બ્રાન્ચના અને સાબરમતી પોલીસ સ્ટેશનના કોન્સ્ટેબલની સંડોવણી સામે આવતાં અમદાવાદ પોલીસને નીચાજોણું થયું છે.

અમદાવાદ શહેરના પોલીસ કર્મચારીઓને જાણે કે કાયદાનો ડર ન હોય તેમ એક પછી એક કાંડ બહાર આવી રહ્યા છે. કાયદાના રક્ષકો જ હવે ભક્ષકો બની ગયા હોય તેમ તોડકાંડ કરી રહ્યા છે. ભાવનગરના વેપારીને ગોતા વિસ્તારમાં ક્રાઈમ બ્રાન્ચ અને સાબરમતી પોલીસ સ્ટેશનના બે પોલીસકર્મીઓએ ધમકી આપી પૈસા પડાવી લીધાનું સામે આવ્યું છે. વેપારી પાસે તેમના વેપારના પૈસા હોવા છતાં ડરાવી પૈસા પડાવી લઈ બંને પોલીસકર્મી ફરાર થઈ ગયા હતા. વેપારીએ સોલા અને ચાંદખેડા પોલીસ સ્ટેશનમાં ફરિયાદ કરવા ગયા ત્યારે ફરિયાદ નોંધવાના બદલે સમજાવી ભાવનગર મોકલી દેવામાં આવ્યા હતા.  

ભાવનગરના જીતુભાઈ નામના વેપારી ગોતા નજીક જગતપુર પાસેથી કારમાં પસાર થઈ રહ્યા હતા. આ સમયે બે પોલીસકર્મીઓએ સાદા ડ્રેસમાં તેમને રોક્યા હતા. તેમની ગાડીમાં શંકાસ્પદ વસ્તુઓ છે કે નહીં તેનું ચેકિંગ છે તેમ કહીં તપાસ કરી હતી. કારમાંથી રોકડ મળતાં વેપારીએ વેપારના પૈસા હોવાનું કહ્યું હતું. તેના પુરાવા આપવા છતાં ખોટા કેસ કરવાની ધમકી આપીને ગોંધી રાખી રૂપિયા પડાવી લીધા.  

વેપારીએ પોલીસને જાણ કરવાની વાત કરતાં અમુક રકમ પરત આપી દીધી હતી. પરંતુ 1.80 લાખ લઈ બંને પોલીસકર્મી ફરાર થઈ ગયા હતા. અસામાજિક તત્વો પોલીસના નામે પૈસા પડાવીને ભાગી ગયા હોવાની શંકા જતાં વેપારી સોલા પોલીસ સ્ટેશને ફરિયાદ આપવા ગયા હતા. જ્યાં સોલા પોલીસ સ્ટેશનના સ્ટાફે ઘટના સ્થળે પહોંચી તપાસ હાથ ધરી હતી. ઘટના સ્થળે પોલીસે CCTV ફૂટેજની ચકાસણી કરી હતી.

CCTV ફૂટેજમાં બંને પોલીસકર્મીઓ દેખાતાં વેપારીએ ઓળખી બતાવ્યા હતા. તેથી પોલીસે તપાસ કરતા બંને પોલીસકર્મીઓ હોવાનું જાણવા મળ્યું હતું. તેથી ઘટના બની તે સ્થળ સોલા વિસ્તારમાં ન હોવાથી પોલીસે તેમને ચાંદખેડા પોલીસ સ્ટેશનમાં જવાની સલાહ આપી હતી. પોલીસ કર્મચારીઓ તોડ કરી પૈસા લઈને ભાગી ગયાની ઘટના અંગે ચાંદખેડા પોલીસને જાણ થતાં પોલીસની એક ટીમ ઘટનાસ્થળે પહોંચી હતી. તપાસ દરમિયાન સીસીટીવી ફૂટેજ ચકાસ્યા હતા. જેમાં ક્રાઈમ બ્રાન્ચનો કોન્સ્ટેબલ અને સાબરમતી પોલીસ સ્ટેશનનો કોન્સ્ટેબલ હોવાનું જાણવા મળ્યું હતું.

અમદાવાદ પોલીસની આબરૂ ન જાય એટલે બંને કોન્સ્ટેબલોને બોલાવી સમાધાન કરાવવા પ્રયાસ કર્યો હતો. પરંતુ તેમાં સફળતા નહી મળતાં ફરિયાદ લીધી નથી. માત્ર અરજી લઈને મામલો થાળે પાડવાનો પ્રયાસ કરાયો છે. વેપારીની અરજી લેવામાં આવી છે અને તપાસ ચાલી રહી છે, વેપારી ભાવનગર ગયા છે. તેઓ આવે ત્યારે ફરિયાદ લેવામાં આવશે તેવી રેકર્ડ પોલીસ વગાડી રહી છે.

અમદાવાદ ક્રાઈમ બ્રાન્ચમાં પોલીસ છે કે ગુનેગારો?

અમદાવાદ ક્રાઈમ બ્રાન્ચના અધિકારીઓની આબરૂ ન જાય તે માટે અરજી લઈ, ફરિયાદ નહીં નોંધીને સમગ્ર પ્રકરણ પર ઢાંકપિછોડો કરવાનો પ્રયાસ કરાયો છે. ગુનેગારોને પકડતી એજન્સી જ ગુનેગારોને છાવરવા પ્રયાસ કરતાં ફરિયાદી વેપારી પણ ચોંકી ગયા છે. આરોપી કોન્સ્ટેબલ ક્રાઈમ બ્રાન્ચનો કમાઉ દીકરો હોવાથી તેને બચાવવા પોલીસ ધમપછાડા કરી રહી છે.

મુંબઈના વેપારીની કાર રોકી ચાર કોન્સ્ટેબલોએ 5.88 લાખ પડાવ્યા

મુંબઈમાં મીરા-ભાયંદર રોડ પર રામદેવ એન્કલેવમાં રહેતાં વજેરામ ગુર્જર મૂળ રાજસ્થાનના વતની છે 17 ઓગસ્ટે વજેરામ અને તેનો કૌટુંબિક ભાઈ દિનેશ ગુર્જર કાર લઈને રાજસ્થાનથી મુંબઈ જઈ રહ્યા હતા. સાંજના ચાર વાગ્યાની આસપાસ એસપી રિંગ રોડ પર દાસ્તાન સર્કલ પાસે પોલીસ કર્મચારીએ વજેરામની કાર રોકી હતી. ગાડીનું ચેકિંગ કરતાં શંકાસ્પદ ચીજવસ્તુ મળી નહોતી. ત્યારબાદ વજેરામ અને દિનેશને કારમાંથી ઉતારીને પોલીસ કેબિનમાં લઈ ગયા હતા.

જ્યાં વજેરામનો ફોન ચેક કરવા લાગ્યા હતા. મોબાઈલ ચેક કર્યા બાદ પોલીસ કર્મચારીએ કહ્યું હતું કે તારા મોબાઈલમાં ક્રિકેટ સટ્ટાની આઇડી છે અને તું સટ્ટો રમે છે. તારા પર કેસ કરી તને અમે જેલમાં નાખીશું. એક પોલીસકર્મચારીએ કહ્યું કે તારે અહીંથી જવું હોય તો 20 લાખ રૂપિયા આપવા પડશે. નહીં તો તારા પર ક્રિકેટ સટ્ટાનો કેસ કરીશું. વજેરામ વિરુદ્ધ કેસ ન થાય એ માટે તેઓ પોલીસ કર્મચારીને રૂપિયા આપવા માટે તૈયાર થયા હતા.

વજેરામે ઓનલાઈન રૂપિયા ટ્રાન્સફર કરવાનું કહેતાં અજાણ્યા શખ્સના યુપીઆઈ કોડ ઉપર વજેરામ અને તેના ભાઈએ 4.88 લાખ રૂપિયા ટ્રાન્સફર કર્યા હતા. 5.88 લાખનો તોડ થઈ ગયા બાદ પોલીસ કર્મચારીઓએ દિનેશ અને વજેરામને જવા દીધા હતા. મુંબઈ પહોચી ગયા બાદ ફરિયાદ કરવાનું નક્કી કર્યું. 19 સપ્ટેમ્બરે અમદાવાદના ઉચ્ચ પોલીસ અધિકારીને મળી તમામ હકીકતો જણાવી હતી. પોલીસ અધિકારીએ વજેરામના ઓનલાઈન ટ્રાન્ઝેક્શનના પુરાવા જોતાં પોલીસ કર્મચારીઓ વિરુદ્ધ પોલીસ ફરિયાદ કરવાનો આદેશ આપ્યો હતો. તેથી નિકોલ પોલીસે ચાર અજાણ્યા પોલીસકર્મી વિરુદ્ધ ગુનો નોંધીને તપાસ હાથ ધરી છે.