સુવેન્દુના PA હત્યાકાંડમાં OLX કનેક્શનનો ઘટસ્ફોટ

પશ્ચિમ બંગાળમાં સુવેન્દુ અધિકારીના અંગત સચિવ(PA) ચંદ્રનાથ રથની હત્યાની તપાસમાં મોટો ખુલાસો થયો છે. સ્પેશિયલ ઇન્વેસ્ટિગેશન ટીમ (SIT) એ શોધી કાઢ્યું છે કે, હત્યામાં વપરાયેલી કાર OLX પર વેચાણ માટે મૂકવામાં આવી હતી. આ કાર સિલિગુડીના જેમ્સ વિલિયમ્સના નામે નોંધાયેલી હતી. ઉત્તર પ્રદેશના એક શખ્સ સહિત ચાર લોકોએ કાર ખરીદવા માટે પૂછપરછ કરી હતી.

પશ્ચિમ બંગાળના મુખ્યમંત્રી સુવેન્દુ અધિકારીના અંગત સચિવ ચંદ્રનાથ રથના હત્યા કેસની તપાસ જેમ જેમ આગળ વધી રહી છે તેમ તેમ નવા અને ચોંકાવનારા તથ્યો બહાર આવી રહ્યા છે. હત્યાની તપાસ કરી રહેલી સ્પેશિયલ ઇન્વેસ્ટિગેશન ટીમ (SIT) એ નવો ખુલાસો કર્યો છે. આ ખુલાસાએ કેસને નવી દિશા આપી છે. તપાસમાં બહાર આવ્યું છે કે, ચંદ્રનાથ રથને રોકવા અને હત્યાના કાવતરામાં વપરાયેલી કાર ઓનલાઈન પ્લેટફોર્મ (OLX) પર વેચાણ માટે મૂકવામાં આવી હતી.

સિલિગુડીના જેમ્સ વિલિયમ્સના નામે કાર નોંધાયેલી હતી

પોલીસ સૂત્રોના જણાવ્યા અનુસાર, આ કાર સિલિગુડીના જેમ્સ વિલિયમ્સના નામે નોંધાયેલી હતી. તપાસમાં જાણવા મળ્યું છે કે, આ કાર થોડા સમય પહેલા OLX પર વેચાણ માટે મૂકવામાં આવી હતી.  ત્યારબાદ, ચાર અલગ અલગ લોકોએ કાર ખરીદવા માટે પૂછપરછ કરી હતી. ઉત્તર પ્રદેશના એક વ્યક્તિએ પણ પૂછપરછ કરી હતી. જેની SIT એ પૂછપરછ શરૂ કરી છે.

પ્રાથમિક તપાસમાં બહાર આવ્યું છે કે, કાર ખરીદવાની પૂછપરછ કરનાર ઉત્તર પ્રદેશના વ્યક્તિનો હત્યા સાથે કોઈ સીધો સંબંધ નથી. તેમ છતાં, તપાસ એજન્સીઓએ તે દિશામાં તપાસ હાથ ધરી છે અને તમામ સંભવિત કડીઓ મેળવી રહી છે.

શું કાર ઇરાદાપૂર્વક OLX પર મૂકવામાં આવી હતી?

SIT માની રહી છે કે ઓનલાઈન પ્લેટફોર્મ દ્વારા વાહનોના વેચાણ અને ખરીદીએ કેસને જટિલ બનાવ્યો છે. કારણ કે તે વાહનના બહુવિધ વ્યવહારો અને તેના ઉપયોગ વિશે સચોટ માહિતી એકત્રિત કરવાનું પડકારજનક બનાવે છે. તપાસ અધિકારીઓ એ પણ નક્કી કરવાનો પ્રયાસ કરી રહ્યા છે કે કાર ઇરાદાપૂર્વક ષડયંત્રના ભાગરૂપે ખરીદવામાં આવી હતી કે તે માત્ર એક સંયોગ હતો.

સ્પેશિયલ ઇન્વેસ્ટિગેશન ટીમ (SIT) એ કારના અગાઉના માલિકો, OLX લિસ્ટિંગ સાથે જોડાયેલા ખાતાઓ અને સંભવિત ખરીદદારોની તપાસ શરૂ કરી છે. તપાસ એજન્સીઓનું કહેવું છે કે આ કેસ ફક્ત હત્યા નથી. પરંતુ સંગઠિત કાવતરું હોવાની શક્યતા નકારી શકાય નહીં.

શું હતો સમગ્ર મામલો?

બંગાળમાં વિધાનસભા ચૂંટણીના પરિણામોના બે દિવસ પછી ભાજપ નેતા સુવેન્દુ અધિકારીના પીએ ચંદ્રનાથ રથની ગોળી મારી હત્યા કરવામાં આવી હતી. ઉત્તર 24 પરગણા જિલ્લાના મધ્યગ્રામમાં ચંદ્રનાથને ગોળી મારવામાં આવી હતી. તેઓ ગંભીર રીતે ઘાયલ થતાં સ્થાનિક લોકોની મદદથી  નર્સિંગ હોમમાં લઈ જવામાં આવ્યા હતા. પરંતુ રસ્તામાં જ તેમનું મોત નીપજ્યું હતું. આ ઘટનાને પ્રોફેશનલ શાર્પશૂટરોએ અંજામ આપ્યો હતો. પોલીસને ઘટના સ્થળ પરથી બ્રાઉન કલરની શંકાસ્પદ કાર મળી હતી પણ તેની નંબર પ્લેટ નકલી હોવાનું સામે આવ્યું હતું. બંગાળમાં નવી સરકારની રચના પહેલા રહસ્યમય હત્યાથી હોબાળો મચી ગયો છે.

સુવેન્દુના ચાર સાથીઓની રહસ્યમય હત્યા

સુવેન્દુ અધિકારીના નજીકના સાથીનું રહસ્યમય સંજોગોમાં મૃત્યુ થયું હોય તેવી આ પહેલી ઘટના નથી. છેલ્લાં 10 વર્ષમાં ચોથી ઘટના છે કે જેણે અનેક સવાલો ઉભા કર્યા છે. વર્ષ 2013માં સુવેન્દુ અધિકારી તૃણમૂલ કોંગ્રેસમાં હતા ત્યારે તેમના તત્કાલિન PA પ્રદીપ ઝાનું પૂર્વ મેદિનીપુરમાં શંકાસ્પદ સંજોગોમાં મોત થયું હતું. વર્ષ 2018માં સુવેન્દુના સુરક્ષા અધિકારી શુભવ્રત ચક્રવર્તી પોલીસ બેરેકમાં મરણ પામેલી હાલતમાં મળી આવ્યા હતા. જે તે સમયે પોલીસે તેને આત્મહત્યા ગણાવી હતી. વર્ષ 2021માં સુવેન્દુના સહયોગી પુલક લાહિડીનું પણ શંકાસ્પદ સંજોગોમાં મોત થયું હતું. જ્યારે હવે વર્ષ 2016માં સુવેન્દુના પીએ ચંદ્રનાથ રથની જાહેરમાં હત્યા કરવામાં આવી છે.