PNB Scam : મેહુલ ચોક્સી બેલ્જિયમમાં ઝડપાયો, વકીલે કહ્યું- ભારતનું સપનું સપનું જ રહેશે...

પંજાબ નેશનલ બેંક (PNB)માં થયેલા 13,000 કરોડ રૂપિયાના કૌભાંડના મુખ્ય આરોપી મેહુલ ચોક્સીને બેલ્જિયમમાં ઝડપી લેવામાં આવ્યો છે. કેન્દ્રીય તપાસ બ્યુરો (CBI) અને એન્ફોર્સમેન્ટ ડિરેક્ટોરેટ (ED) દ્વારા મેહુલ ચોક્સીના પ્રત્યાર્પણ માટે કરવામાં આવેલી વિનંતીના આધારે આ કાર્યવાહી કરવામાં આવી છે. ભારતીય તપાસ એજન્સીઓ તેને ટૂંક સમયમાં જ પરત ભારત લાવવાની તૈયારીમાં લાગી ગઈ છે.

દરમિયાન, મેહુલ ચોક્સીના વકીલ વિજય અગ્રવાલે જણાવ્યું છે કે તેઓ આ ધરપકડ સામે અપીલ દાખલ કરવાની પ્રક્રિયા શરૂ કરવા જઈ રહ્યા છે.

'ધરપકડ થઈ, પરંતુ જામીન મળી જશે'

એક અહેવાલ મુજબ, મેહુલ ચોક્સીના વકીલે કહ્યું કે જો તેમને ભારત પ્રત્યર્પિત કરવામાં આવે તો તે તેમના માનવાધિકારનું ઉલ્લંઘન હશે. તેમણે કહ્યું, "આ કોઈપણ દેશની પ્રક્રિયા હોય છે. જો કોઈ દેશ બીજા દેશને વિનંતી કરે છે તો ઔપચારિક રીતે ધરપકડ થાય છે અને પછી તેને જામીન પણ આપવામાં આવે છે. ત્યારબાદ પ્રત્યાર્પણને પડકારવામાં આવે છે." આ દરમિયાન તેમણે સંજીવ ભંડારી કેસનો પણ ઉલ્લેખ કર્યો.

'આટલી સરળતાથી પ્રત્યાર્પણ શક્ય નથી'

વિજય અગ્રવાલે કહ્યું, "સંજીવ ભંડારીનો કેસ હાર્યા બાદ ભારત સરકાર માટે આ ખૂબ જ મુશ્કેલ બની ગયું છે. મને નથી લાગતું કે પ્રત્યાર્પણ આટલી સરળતાથી થઈ શકે છે." તેમણે દાવો કર્યો કે મેહુલને ભાગેડુ જાહેર કરવામાં આવ્યો નથી, કારણ કે તેઓ ભારતીય તપાસ એજન્સી સાથે સહકાર કરતા રહ્યા છે.

મેહુલ ચોક્સીની તબીબી સ્થિતિનો આપ્યો હવાલો...

વકીલ વિજય અગ્રવાલે કહ્યું, "આ કેસ લાંબા સમયથી ચાલી રહ્યો છે. અમે હંમેશા કોર્ટમાં કહ્યું છે કે મેહુલ તપાસમાં જોડાવા માટે તૈયાર છે, પરંતુ તબીબી સ્થિતિના કારણે તેઓ મુસાફરી કરી શકે તેમ નથી. તેઓ વિડિયો કોન્ફરન્સ દ્વારા તપાસમાં જોડાશે." તેમણે કહ્યું, "મેહુલ ચોક્સી બીમાર છે અને કેન્સરની સારવાર કરાવી રહ્યા છે. અમે જે અપીલ કરીશું તેમાં આ વિનંતી કરવામાં આવશે કે મેહુલને કસ્ટડીમાં ન રાખવામાં આવે. અપીલનો સ્પષ્ટ આધાર એ હશે કે મેહુલ ચોક્સીના ભાગી જવાનો કોઈ ખતરો નથી."