Surendranagar : પોલીસ સામે કાયદાનો ડંડો, ધ્રાંગધ્રા કોર્ટનો મહત્વપૂર્ણ ચુકાદો

સુરેન્દ્રનગર જિલ્લાના પાટડીના ગેડિયા ગામે વર્ષ 2021 માં થયેલા પિતા-પુત્રના ચકચારી એન્કાઉન્ટર કેસમાં ચાર વર્ષના લાંબા સમય બાદ આખરે પીડિત પરિવારને આંશિક ન્યાય મળ્યો છે. ધ્રાંગધ્રા કોર્ટે બજાણા પોલીસ સ્ટેશનના તત્કાલીન PSI વીરેન્દ્રસિંહ જાડેજા સહિત 7 પોલીસકર્મીઓ સામે પોલીસ ફરિયાદ દાખલ કરવાનો આદેશ આપ્યો છે. આ એન્કાઉન્ટરમાં હનીફ ખાન અને તેના 14 વર્ષીય પુત્ર મદીમખાનનું મોત થયું હતું. પીડિત પરિવાર છેલ્લા ચાર વર્ષથી ન્યાય માટે કોર્ટ અને પોલીસ સ્ટેશનના ધક્કા ખાઈને થાકી ગયો હતો, પરંતુ કોર્ટના આ આદેશથી તેમને ન્યાયની આશા જાગી છે.

કોર્ટના આદેશ બાદ મૃતકના પરિવારજનોએ ન્યાયતંત્ર પર વિશ્વાસ વ્યક્ત કર્યો હતો. મૃતકની પુત્રીએ જણાવ્યું હતું કે, તેના પિતા અને ભાઈને મોતને ઘાટ ઉતારનાર પોલીસકર્મીઓ સામે કોર્ટ કડક કાર્યવાહી કરશે અને તેમને સજા મળશે.

શું હતો સમગ્ર કેસ?

વર્ષ 2021 માં સુરેન્દ્રનગર જિલ્લાના પાટડીના ગેડિયા ગામમાં એક ચકચારી એન્કાઉન્ટર થયું હતું. પોલીસના જણાવ્યા અનુસાર, ગુજસીટોકના આરોપી હનીફ ખાન ઉર્ફે કાળો મુન્નો સામે કુલ 86 ગુના નોંધાયેલા હતા અને તે 59 ગુનામાં વોન્ટેડ હતો. પોલીસે દાવો કર્યો હતો કે, જ્યારે તેઓ આરોપીને પકડવા ગયા ત્યારે તેણે પોલીસ પર હુમલો કર્યો હતો, જેના કારણે પોલીસે વળતી કાર્યવાહીમાં ફાયરિંગ કર્યું હતું. આ ફાયરિંગમાં હનીફ ખાન અને તેના પુત્ર મદીનનું મોત નીપજ્યું હતું, જ્યારે PSI વીરેન્દ્રસિંહ જાડેજા સહિત 7 પોલીસકર્મીઓ ઘાયલ થયા હતા.

જો કે, મૃતકના પરિવારજનોએ આ એન્કાઉન્ટરને નકલી ગણાવીને મૃતદેહો સ્વીકારવાનો ઇનકાર કર્યો હતો. આ મામલે પરિવારે પોલીસ સામે ગુજરાત હાઇકોર્ટમાં પિટિશન પણ દાખલ કરી હતી. હવે, હાઇકોર્ટના આદેશ બાદ ધ્રાંગધ્રા કોર્ટે આ કેસમાં સંડોવાયેલા પોલીસ કર્મચારીઓ વિરુદ્ધ ફરિયાદ નોંધવાનો આદેશ આપ્યો છે, જે પીડિત પરિવાર માટે એક મહત્વપૂર્ણ પગલું સાબિત થઈ શકે છે. આ ઘટનાએ પોલીસની કાર્યવાહી અને ન્યાયતંત્ર પર અનેક સવાલો ઊભા કર્યા છે.