શાહપુરમાં દિકરીનો જન્મ થતા મારઝૂડ કરી મા-દીકરીને ઘરમાં પૂરી પતિ જતો રહ્યો

અમદાવાદના શાહપુરમાં દહેજના કારણે એક પરિણીતાનું જીવન નર્ક બની ગયું. લગ્નના માંડ વર્ષમાં જ તેને સાસરિયાં દ્વારા ત્રાસ ગુજારવામાં આવ્યો. દીકરીનો જન્મ થતાં જ પતિએ તેને અને બાળકીને ઘરમાં પૂરી દીધા અને પાંચ લાખ રૂપિયા દહેજની માંગણી કરી. જો પૈસા નહીં લાવે તો ઘરમાં નહીં રહેવા દેવાની અને ક્યાંયની નહીં છોડવાની ધમકી પણ આપી. એટલું જ નહીં, "તારાથી સારી છોકરી મળશે" એમ કહીને મારઝૂડ કરી પત્નીને ઘરમાંથી કાઢી મૂકી. આ અંગે શાહપુર પોલીસે પતિ સહિત ત્રણ સાસરિયાં વિરુદ્ધ ગુનો નોંધીને તપાસ શરૂ કરી છે.

પીડિત 21 વર્ષીય મહિલાએ પોલીસ ફરિયાદમાં જણાવ્યું કે તેમના લગ્ન સમાજના રીતરિવાજ મુજબ ગયા વર્ષે થયા હતા. લગ્ન પછી સંયુક્ત પરિવારમાં રહેતી મહિલાને જમવાનું બનાવતા ન આવડતું જેવી નાની બાબતોમાં પણ માનસિક અને શારીરિક ત્રાસ આપવામાં આવતો હતો. તેને ઘરખર્ચ કે દવા માટે પણ પૈસા આપવામાં આવતા નહોતા.

 લગ્નના ત્રણ મહિના પછી પતિ-પત્ની અલગ રહેવા ગયા, જ્યાં દીકરીનો જન્મ થયો. ત્યારબાદ પતિએ મારઝૂડ કરીને પત્ની અને દીકરીને ઘરમાં બંધ કરી દીધા અને દહેજમાં પાંચ લાખ રૂપિયા માંગ્યા. પૈસા ન લાવવા પર ઘરમાંથી કાઢી મૂકવાની અને ક્યાંયની નહીં છોડવાની ધમકી આપી. પતિએ એમ પણ કહ્યું કે તેને તેનાથી સારી છોકરી મળી જશે. આ ત્રાસથી કંટાળીને મહિલાએ પોલીસ ફરિયાદ નોંધાવી છે. પોલીસે ગુનો નોંધી વધુ તપાસ હાથ ધરી છે.