અમદાવાદના ચંડોળા તળાવ વિસ્તારમાં ગેરકાયદેસર વીજ જોડાણો કપાયા

રાજ્યમાં ગેરકાયદેસર વસી રહેલા બાંગ્લાદેશીઓ સામે રાજ્ય સરકારે કડક કાર્યવાહી શરુ કરી છે અને વિવિધ જિલ્લામાંથી બાંગ્લાદેશીઓનું વેરીફીકેશન કરીને તેમને ડીપોર્ટ કરવા સહિતની કાર્યવાહી શરુ કરાઇ છે ત્યારે અમદાવાદના ચંડોળા તળાવ વિસ્તારમાં પોલીસ અને ટોરેન્ટ વીજ કંપની દ્વારા મોટા પ્રમાણમાં વીજ જોડાણો કાપવાની કાર્યવાહી શરુ કરાઇ છે. સોમવારે સવારે અમદાવાદ પોલીસ કમિશનર ઉપરાંત પોલીસ તંત્રના ઉચ્ચ અધિકારીઓ, ક્રાઇમ બ્રાન્ચનો કાફલો તથા એસઓજી અને સ્થાનિક પોલીસનો મોટો કાફલો ચંડોળા તળાવ વિસ્તારમાં પહોંચ્યો હતો. 

પોલીસ અને ટોરેન્ટની ટીમોએ તમામ ઘરોમાં પ્રવેશીને વીજ જોડાણ કાયદેસર છે કે કેમ તેની ચકાસણી કરી હતી અને તેથી તમામ લોકો ઘરની બહાર નિકળી ગયા હતા. જે જે મકાનમાં ગેરકાયદેસર લંગરીયા જોવા મળ્યા છે તે તમામ મકાનોના વીજ જોડાણ કાપી નખાયા છે.

ઉલ્લેખનિય છે કે અમદાવાદ શહેર સહિત રાજ્યના તમામ જિલ્લાઓમાં વસી રહેલા બાંગ્લાદેશીઓ સામે પોલીસે ખાસ ડ્રાઇવ શરુ કરી હતી અને તમામને પોલીસ સ્ટેશનોમાં લવાયા બાદ દસ્તાવેજોની ચકાસણી કરાઇ હતી જેમાં ઘણા બાંગ્લાદેશીઓ મળી આવ્યા હતા. ખાલી ચંડોળા તળાવ વિસ્તારમાંથી જ 890 લોકોની અટકાયત કરાઇ હતી જેમાં 470 પુરુષ તથા બાળકીઓ અને મહિલાઓનો સમાવેશ થાય છે. જો કે 600 જેટલા નાગરીકો ભારતના નાગરીકો હોવાનું બહાર આવતાં તેમને છોડી મુકાયા હતા પણ 104 લોકો બાંગ્લાદેશી હોવાનું સામે આવ્યું હતું અને તેમાં 85 મહિલાઓનો સમાવેશ થતો હતો, આ લોકોએ એજન્ટોની મદદથી બોગસ દસ્તાવેજો બનાવ્યા હોવાનું પણ બહાર આવ્યું હતું.

આ પણ વાંચો--- ગૃહ રાજ્ય મંત્રી હર્ષ સંઘવીના એક ટ્વિટથી મચ્યો ખળભળાટ

 

સમાચાર મેળવવા આજે જ અમારી WAHTSAPP ચેનલ સાથે જોડાવ