Surat : વિદેશ જવાની ઘેલછા કે પછી જુગારની લત, સ્યુસાઇડ નોટમાં થયા મોટા ખુલાસા...

જુગારની લત કેવી રીતે જીવનનો અંત લાવી શકે છે તેનું વધુ એક હૃદયદ્રાવક ઉદાહરણ સુરત (Surat)માં સામે આવ્યું છે. લસકાણાના 22 વર્ષીય ચિત ગાબાણીએ જુગારના દેવાના કારણે આત્મહત્યા કરી લીધી છે. તેની સ્યુસાઇડ નોટમાંથી જે આઘાતજનક ખુલાસાઓ થયા છે તે સાંભળીને સૌ કોઈ સ્તબ્ધ થઈ ગયા છે.

₹10 લાખનું દેવું અને જર્મની જવાનો પ્રયાસ...

પ્રાથમિક તપાસમાં સામે આવ્યું છે કે, ચિત ગાબાણીએ જુગારમાં ₹10 લાખનું જંગી દેવું કરી નાખ્યું હતું. આટલું જ નહીં, જર્મની જવા માટે તેણે બ્લોક કરાવેલા વધુ ₹10 લાખ પણ જુગારમાં હારી જતાં તેની હતાશા ચરમસીમા પર પહોંચી હતી. આર્થિક સંકડામણ અને દેવાના બોજ તળે દબાઈને તેણે આ આત્મઘાતી પગલું ભર્યું હોવાનું સ્યુસાઇડ નોટમાં સ્પષ્ટ લખ્યું છે.

પઠાણી ઉઘરાણીનો ભોગ બન્યો ચિત, આરોપીની ધરપકડ...

ચિતની સ્યુસાઇડ નોટમાં અજય શિરોયા (મહાકાલ) નામના વ્યક્તિનું નામ સામે આવ્યું છે. ચિતે જણાવ્યું હતું કે તેણે અજય પાસેથી ₹80,000 લીધા હતા, જેના બદલામાં અજય તેને ₹2 લાખની પઠાણી ઉઘરાણી કરીને હેરાન કરતો હતો. પોલીસે તાત્કાલિક કાર્યવાહી કરીને આરોપી અજય મહાકાલની ધરપકડ કરી લીધી છે અને આ મામલે વધુ તપાસ હાથ ધરી છે.

નકલી દસ્તાવેજો અને વિઝાનો ફિયાસ્કો...

મૂળ બોટાદનો વતની ચિત ગાબાણી જર્મની જવાનું સપનું સેવી રહ્યો હતો. તેણે આ માટે નકલી દસ્તાવેજો પણ બનાવ્યા હતા અને વિઝા માટે અરજી કરી હતી. જોકે, તેને વિઝા ન મળતા તેનું આ સપનું પણ રોળાઈ ગયું હતું, જે તેની હતાશાનું એક વધુ કારણ બન્યું હતું.

માતા-પિતાની માફી અને ગુનેગારને સજાની માંગ...

ચિતે પોતાની સ્યુસાઇડ નોટમાં પોતાના માતા-પિતાની માફી માંગી હતી અને અજય શિરોયાને તેના કૃત્ય બદલ સજા મળે તેવી દ્રઢ ઈચ્છા વ્યક્ત કરી હતી. તેણે લખ્યું હતું કે, "ટોટલ 10 લાખનું દેવું મેં કરી નાખ્યું છે અને આ આંકડો આગળ ના જાય તેના માટે હું આ પગલું ભરું છું." આ ઘટના સમાજમાં વ્યાપક બની રહેલા જુગારના દુષણ અને તેના ભયાવહ પરિણામો પર ફરી એકવાર ગંભીર ચિંતન કરવા મજબૂર કરે છે.