વંથલી તાલુકા કોંગ્રેસના પૂર્વ પ્રમુખની ધરપકડ!

જૂનાગઢના વંથલી તાલુકા કોંગ્રેસના પૂર્વ પ્રમુખની ધરપકડ કરવામાં આવી છે. રૂપિયા 31.06 લાખની ઉચાપતના કેસમાં પૂર્વ કોંગ્રેસ પ્રમુખ મનસુખ પાડલીયાના રિમાન્ડ મેળવીને પૂછપરછ હાથ ધરી છે. વંથલી તાલુકાની ઝાપોદડ સેવા સહકારી મંડળીનું ખાતર ખેડૂતોને વેચી મંડળીમાં નાણા જમા નહી કરાવ્યાનો આરોપ છે. મંડળીના પ્રમુખ અને મંત્રીએ ચેકથી નાણાં ઉપાડી અંગત હિત માટે વાપરી નાખ્યા હતા. ખરીદ વેચાણ સંઘના મેનેજરે ફરિયાદ નોંધાવતાં પોલીસે ધરપકડ કરી તપાસ હાથ ધરી છે. 

વંથલી તાલુકા સહકારી ખરીદ-વેચાણ સંઘ દ્વારા ઝાપોદડ સહકારી સેવા મંડળીને રાસાયણિક ખાતર, બિયારણો અને અન્ય જરૂરી વસ્તુઓની આપ-લે કરવામાં આવતી હતી. નિયમ મુજબ, ઝાપોદડ સેવા સહકારી મંડળીએ આ વ્યવહારો પેટે વંથલી સંઘને ₹29 લાખ જેટલી રકમ ચૂકવવાની બાકી હતી. આ બાબતે સરકારી ઓડિટ કરવામાં આવ્યું ત્યારે ચોંકાવનારી વિગતો સામે આવી હતી. ઓડિટમાં ખુલાસો થયો હતો કે, ઝાપોદડ સેવા સહકારી મંડળી દ્વારા ₹31,06,129ની ઉચાપત કરવામાં આવી હતી. જે રકમ વંથલી તાલુકા સહકારી ખરીદ-વેચાણ સંઘને ચૂકવવાની હતી

આ રકમ ઝાપોદડ સેવા સહકારી મંડળીના પ્રમુખ મનસુખ પાડલિયા અને મંત્રી કેશવ જયસ્વાલે અંગત ઉપયોગ માટે વાપરી હતી. પ્રાથમિક તપાસ અને આરોપીઓના બેંક સ્ટેટમેન્ટ પરથી જાણવા મળ્યું કે આ લોકોએ સંસ્થાની રકમ પૈકી આશરે ₹19 લાખ 45 હજાર જેટલી રકમ પોતાના બેંક ખાતામાં ટ્રાન્સફર કરી લીધી હતી. નાણાકીય કૌભાંડ વર્ષ 2023-24 દરમિયાન આચરવામાં આવ્યું હતું.

વંથલી પોલીસે ​પ્રમુખ મનસુખ પાડલિયાની ધરપકડ કરી બે દિવસના રિમાન્ડ મેળવ્યા છે. બીજા આરોપી કેશવ જયસ્વાલને પકડવા માટે પોલીસે કાર્યવાહી શરૂ કરી છે. હાલ તે ફરાર હોવાથી પોલીસે તેને શોધવા અલગ અલગ ટીમો બનાવી છે. ​પોલીસે બેંક સ્ટેટમેન્ટના આધારે ઉચાપતની રકમની પુષ્ટિ કરી છે અને હવે આ કેસમાં વધુ તપાસ ચાલી રહી છે.

ડીવાયએસપી રવિરાજસિંહ પરમારે જણાવ્યું કે ઓડિટમાં ₹31 લાખથી વધુની નાણાકીય ઉચાપત થયાનું સામે આવ્યું હતું. બંને આરોપીઓના બેંક ખાતાઓની તપાસ કરતા સમગ્ર કૌભાંડ સામે આવ્યું હતું. પ્રમુખ અને મંત્રીએ ભેગા મળી ખેડૂતોના નાણાંનો અંગત ઉપયોગ કર્યો હતો. ઝાપોદડ સેવા સહકારી મંડળીના મંત્રીએ તાલુકા ખરીદ વેચાણ સંઘ પાસેથી ₹26,32,451 નું રાસાયણિક ખાતર અને જરૂરી બિયારણો મંગાવ્યા હતા. પ્રમુખ અને મંત્રીએ ખાતર ખેડૂતોને વેચી દીધું હતું.

મંડળીના ખાતામાં જમા ખાતરના વેચાણથી ઉપજેલા નાણાં વસૂલીને તેમણે મંડળીના બેંક ખાતામાં જમા લીધા હતા. નાણાં જમા થયા બાદ બંનેની સહીવાળા ચેકનો ઉપયોગ કરીને નાણાં ઉપાડ્યા હતા. ₹19,45,000 રકમ મંડળીના મંત્રી કેવલ જયસ્વાલના અંગત બેંક ખાતામાં ટ્રાન્સફર કરવામાં આવી હતી. બંને આરોપીઓએ આ નાણાં પોતાના અંગત વપરાશમાં વાપરી નાખી ખાતરનું બિલ ચૂકવ્યું નહોતું. જેના કારણે સંઘને ₹31,06,129 નું નુકસાન થયું છે. મંત્રી કેવલ જયસ્વાલ ફરાર હોવાથી તેની ધરપકડ માટે પોલીસની અલગ-અલગ ટીમો તપાસ કરી રહી છે.