વલસાડના કુંતા ગામના એક ગોડાઉનમાંથી ડ્રગ્સ ઝડપાયું

ગુજરાત એટીએસ અને વલસાડ એસઓજીએ કુંતા ગામે ભંગારના ગોડાઉનમાં દરોડો પાડી ₹71 લાખની કિંમતનું 2 કિલોથી વધુ ડ્રગ્સ અને 600 ગ્રામ શંકાસ્પદ પદાર્થ ઝડપાયો છે. પોલીસે 2 શખ્સોની ધરપકડ કરી એફએસએલની મદદથી વધુ તપાસ હાથ ધરી છે.

ગુજરાતમાં નશાના કારોબાર સામે ચાલી રહેલી ઝુંબેશ અંતર્ગત વલસાડ જિલ્લામાં એક મોટી સફળતા મળી છે. ગુજરાત એટીએસ અને વલસાડ એસઓજીની ટીમે સંયુક્ત ઓપરેશન હાથ ધરીને ડ્રગ્સના મોટા નેટવર્કનો પર્દાફાશ કર્યો છે. પોલીસને ચોક્કસ બાતમી મળી હતી કે સરી ગામ ખાતે મોટાપાયે ડ્રગ્સનું વેચાણ થઈ રહ્યું છે. આ બાતમીના આધારે ટીમે તાત્કાલિક પ્લાન બનાવીને દરોડા પાડ્યા હતા.

તપાસ દરમિયાન સુરક્ષા એજન્સીઓને જાણવા મળ્યું કે કાળા કારોબારનું મુખ્ય કેન્દ્ર કુંતા ગામમાં આવેલું એક ભંગારનું ગોડાઉન હતું. એટીએસ અને સ્થાનિક પોલીસની ટીમે સંયુક્ત રીતે આ ગોડાઉન પર ત્રાટકીને સર્ચ ઓપરેશન શરૂ કર્યું હતું. ગોડાઉનની ઓફિસની તલાશી લેતા પોલીસ અધિકારીઓ પણ ચોંકી ઉઠ્યા હતા. ઓફિસની અંદરથી 2 કિલો કરતા વધુ પ્રતિબંધિત ડ્રગ્સનો જથ્થો મળી આવ્યો હતો. આ ઉપરાંત આશરે 600 ગ્રામ જેટલો અન્ય શંકાસ્પદ માદક પદાર્થ પણ જપ્ત કરવામાં આવ્યો છે, જે ડ્રગ્સ હોવાની આશંકા છે.

પોલીસના જણાવ્યા અનુસાર જપ્ત કરવામાં આવેલા આંતરરાષ્ટ્રીય સ્તરના ડ્રગ્સની અંદાજિત બજાર કિંમત ₹71 લાખથી પણ વધુ છે. સમગ્ર કૌભાંડમાં સંડોવાયેલા 2 આરોપીઓની સ્થળ પરથી ધરપકડ કરવામાં આવી છે. અબ્દુલ કલામ અબ્દુલરબ ખાન રહે. ખારીવાડ, નાની દમણ, મૂળ રહે.ઉત્તરપ્રદેશ તેમજ મેહુલ નલિનકુમાર મકવાણા રહે. બલીઠા, તા.વાપી મૂળ રહે. વઢવાણ, સુરેન્દ્રનગરવાળાની ધરપકડ કરવામાં આવી છે. બંને આરોપીઓ આ વિસ્તારમાં કોને ડ્રગ્સ સપ્લાય કરવાના હતા તેમજ નેટવર્કના તાર ક્યાં સુધી જોડાયેલા છે તે દિશામાં પોલીસે પૂછપરછ હાથ ધરી છે.

પકડાયેલો જથ્થો કયા પ્રકારનું કેમિકલ ડ્રગ્સ છે અને તેની શુદ્ધતા કેટલી છે તે સચોટ રીતે જાણવા માટે પોલીસે એફએસએલની ટીમની મદદ લીધી છે. એફએસએલ દ્વારા નમૂનાઓનું પરીક્ષણ કર્યા બાદ કોર્ટ સમક્ષ રિપોર્ટ રજૂ કરવામાં આવશે. વલસાડમાં ભંગારના ગોડાઉનની આડમાં ચાલતા રેકેટના પર્દાફાશ બાદ સ્થાનિક સ્તરે અનેક મોટા ખુલાસા થવાની સંભાવના છે.