કોઈમ્બતુરમાં પીરિયડ્સના કારણે દલિત દીકરીને સીડી પર બેસાડીને પરીક્ષા અપાઇ

તમિલનાડુના કોઈમ્બતુરની એક ખાનગી શાળામાં દલિત વિદ્યાર્થી સાથે ભેદભાવનો મામલો સામે આવ્યો છે. શાળામાં ભણતી આઠમા ધોરણની વિદ્યાર્થીનીને તેના વર્ગખંડની બહાર સીડી પર પરીક્ષા આપવાની ફરજ પડી હતી. કારણ કે તેને પહેલી વાર માસિક આવ્યું હતું.

પોલીસ તપાસ કરી રહી છે.
આ ઘટના બાદ આચાર્યને બરતરફ કરવામાં આવ્યા છે. બુધવારે શાળા પરિસરની સીડી પર પરીક્ષા આપતા એક વિદ્યાર્થીનો વીડિયો વાયરલ થયા બાદ, પોલાચીના અધિક પોલીસ અધિક્ષક સૃષ્ટિ સિંહના નેતૃત્વમાં પોલીસ ટીમે આ મામલાની તપાસ શરૂ કરી.

શિક્ષણ વિભાગના અધિકારી પાસેથી જવાબ માંગ્યો
આ વીડિયો વાયરલ થયા બાદ, શાળા શિક્ષણ વિભાગના અધિકારીઓએ જિલ્લાના પોલ્લાચીના સેંગુટ્ટાઈપલયમ સ્થિત શાળાના મેનેજમેન્ટ પાસેથી સમજૂતી માંગી છે. શિક્ષણ મંત્રી અંબિલ મહેશ પોય્યામોઝીએ જણાવ્યું હતું કે શાળા સામે વિભાગીય તપાસ શરૂ કરવામાં આવી છે અને આચાર્યને બરતરફ કરવામાં આવ્યા છે. સોશિયલ મીડિયા પ્લેટફોર્મ X પર, મંત્રીએ કહ્યું કે બાળકો સામે કોઈપણ પ્રકારના અત્યાચારને સહન કરવામાં આવશે નહીં.

વિદ્યાર્થીના પિતાએ કહ્યું કે શાળાએ અમને પરીક્ષા માટે અલગ ટેબલ અને ખુરશીની વ્યવસ્થા કરવા કહ્યું હતું. પરંતુ, શાળાએ કોઈ વ્યવસ્થા કરી ન હતી અને અમારી પુત્રીને વર્ગખંડની બહાર સીડી પર બેસીને લખવાનું કહેવામાં આવ્યું. વિદ્યાર્થી બે કલાકથી વધુ સમય સુધી સીડી પર બેઠો રહ્યો. આ દરમિયાન તેમને પેટમાં પણ ભારે દુખાવો થતો હતો.