ડેટિંગ એપ પરથી થયો સંપર્ક, હોટલ સુધીનો સફર અને પછી 1.66 કરોડની લૂંટ

અમદાવાદના એક વેપારીને ડેટિંગ એપના માધ્યમથી ફસાવી, શારીરિક સંબંધોની આડમાં બ્લેકમેલ કરીને ધમકી આપી આશરે 1.66 કરોડ રૂપિયા પડાવવાની ઘટનાનો ભાંડો ફૂટ્યો છે. આરોપીઓએ અગાઉ પણ આવા કિસ્સાઓમાં કરોડોની ઉઘરાણી કરી હોવાનો શંકાસ્પદ ઇતિહાસ હોવાનું ક્રાઇમ બ્રાંચે જણાવ્યું છે.

અમદાવાદમાં 45 વર્ષીય વેપારીએ એક વર્ષ પહેલા તેના મોબાઇલમાં ઓનલાઇન ડેટિંગ એપ ડાઉનલોડ કરી હતી. તે દરમિયાન તેનો સંપર્ક દિલ્હીની એક મહિલાના ફેક પ્રોફાઇલ સાથે થયો. વાતચીત પછી કેટલીક મુલાકાતોની યોજના બની અને વેપારી ખાસ મુલાકાત માટે દિલ્હીએ ગયો. હોટલમાં મિલન વખતે તેને ખબર પડી કે જે પ્રોફાઇલ ફોટોમાં સ્ત્રી દેખાતી હતી તે આ સ્ત્રી ન હતી. મહિલાએ કહ્યું કે તેણે ઓળખ છૂપાવવા ખોટો ફોટો મૂક્યો હતો. હોટલ રૂમમાં મુલાકાત વખતે મહિલાએ વેપારીને ધમકી આપી કે તે મારઝુડ અને જાતીય હેરાનગતીનો આરોપ લગાવશે. અચાનક જ એક શખ્સ રૂમમાં આવીને પોતે પોલીસ હોવાનો દાવો કરીને મામલો દફન કરવા 1.5 લાખ રૂપિયા વસૂલી લીધા. પરંતુ દુઃખદ ઘટનાઓ ત્યાં અટકી નહીં. વેપારીને વારંવાર ધમકી અપાઈ કે જો વધુ રકમ નહીં આપી તો પોલીસ યુનિફોર્મમાં વિડીયો કોલ કરીને તેની વ્યક્તિગત તસવીરો અને કથિત મામલાની વિગતો સોશિયલ મિડિયા પર વાયરલ કરી દેવામાં આવશે. આ રીતે સતત ધમકીઓની વચ્ચે વેપારીએ લગભગ 1.66 કરોડ રૂપિયા ચૂકવ્યા.

આંતરિક ભય અને બદનામ હોવાની શંકા વચ્ચે તેણે આ અંગે અંતે પરિવારને જાણ કરી અને પછી ક્રાઇમ બ્રાંચમાં ફરિયાદ નોંધાવી. પોલીસે તપાસ શરૂ કરીને મોબાઇલ લોકેશનના આધારે ઔરંગાબાદમાંથી કૌશલેન્દ્રસિંહ અને અરૂણસિંહ નામના બે આરોપીઓને ઝડપી લીધા છે. ક્રાઇમ બ્રાંચના એસીપી ભરત પટેલે જણાવ્યું કે કૌશલેન્દ્રસિંહ અગાઉ દિલ્હીમાં એસ્કોર્ટ સર્વિસમાં સંકળાયેલો હતો અને ગ્રાહકોના ફોટોનો ઉપયોગ કરીને ઓનલાઇન  ડેટિંગ એપ્સ પર ફેક એકાઉન્ટ બનાવતો હતો. અરૂણસિંહ તેના માટે બેંક એકાઉન્ટ્સ ઉપલબ્ધ કરાવતો હતો. હાલ આ એકાઉન્ટ્સની પણ તપાસ ચાલી રહી છે.

આ બનાવ આંધળી મોહમાયાના જાળમાં ફસાતા વ્યવસાયિકો માટે ચેતવણીરૂપ છે કે ઓનલાઈન સંબંધો બનાવતા પહેલા ખાસ સતર્ક રહેવું જોઈએ.