₹930 કરોડના સાયબર કૌભાંડમાં CIDએ 5 આરોપી પકડ્યા

દેશના 28 રાજ્યોમાં સાયબર છેતરપિંડી કરનાર ગેંગના પાંચ શખ્સોને ગાંધીનગરની સીઆઈડી ક્રાઈમ સેન્ટર ઓફ એક્સલન્સની ટીમે ઝડપી પાડ્યા છે. મુંબઈના બે, ગીર સોમનાથના બે અને અમદાવાદના એક શખ્સની ધરપકડ કરીને વધુ તપાસ હાથ ધરી છે. સાયબર ક્રાઈમ ટીમની પ્રાથમિક તપાસમાં આ ગેંગે આચરેલા 264 ગુનાઓનો ભેદ ઉકેલાઈ ગયો છે. આ ગેંગે 28 રાજ્યોમાં 1,534 ગુના આચરી રૂપિયા 930 કરોડની સાયબર છેતરપિંડી આચરી હોવાનું બહાર આવ્યું છે. 

ગાંધીનગરની સીઆઈડી ક્રાઈમના સેન્ટર ઓફ એક્સલન્સ ટીમે ગીર સોમનાથ જિલ્લાના વેરાવળના અબ્દુલ હફીઝ પાનવાલા, મુસ્તાક અબ્દુલ ખાલીદ ખાનાણી, મુંબઈના થાણેના શબ્બીર મોહંમદ હનીફ ભડેલા, મોહંમદ તાહા શબ્બીર ભડેલા તેમજ અમદાવાદ ગગજી મનજીભાઈ રાજપૂતની ધરપકડ કરી છે. તપાસ દરમિયાન પાંચેય શખ્સોનું દુબઈ કનેક્શન સામે આવ્યુ છે.

પાંચેય શખ્સોએ દેશના 28 રાજ્યોમાં 1534 થી વધુ ગુનાઓ આચરી રૂપિયા 930 કરોડનું સાયબર ઠગાઈ કૌભાંડ આચર્યાનો ખુલાસો થયો છે. નાગરિકોને આર્થિક રોકાણમાં સારા વળતરની લાલચ આપી તેમાં રોકાણ કરાવી, બાદમાં તેમની સાથે છેતરપિડી કરીને નાણા પડાવી લેવાની મોડસ ઓપરેન્ડી છે. આ શખ્સો અન્ય લોકો પાસે બેંક ખાતા ખોલાવી તેમાંથી સાયબર ઠગાઈના રૂપિયા મેળવી ફોરેક્સ પ્રિપેઈડ કાર્ડથી નાણા દુબઈ મોકલાવી સાયબર માફિયાઓ સુધી ઠગાઈના નાણા પહોંચાડતા હોવાનું તપાસમાં જાણવા મળ્યું છે.

આ પાંચેય શખ્સોએ અલગ અલગ બેંકમાં 80 જેટલાં સેવિંગ્સ અને કરંટ એકાઉન્ટ ખોલાવ્યા હતા. બેંક એકાઉન્ટની તપાસ કરતાં આ બેંક એકાઉન્ટ સામે દેશના 28 રાજ્યોમાંથી 1534 જેટલી સાયબર ફ્રોડની ફરિયાદો નેશનલ પોર્ટલ ઉપર નોંધાયેલી છે. તેથી ગાંધીનગરની સીઆઈડી ક્રાઈમ સેન્ટર ઓફ એક્સલન્સે આરોપીઓના રિમાન્ડ મેળવી વધુ તપાસ હાથ ધરી છે.