અમદાવાદના જુહાપુરામાં કાર ચાલકે 8 વાહનોને અડફેટમાં લીધા બાદ તેનો જ મૃતદેહ મળ્યો

અમદાવાદ શહેરના જુહાપુરા વિસ્તારમાં મંગળવારે રાત્રે ચોંકાવનારો બનાવ બન્યો છે. આ બનાવમાં એક કાર ચાલકે સાતથી આઠ વાહનોને અડફેટમાં લીધા હતા જેથી ઉશ્કેરાયેલા લોકોએ તેનો પીછો કર્યો હતો અને ત્યારબાદ ડ્રાઇવરનો મૃતદેહ મળી આવ્યો હતો. સ્થાનિક લોકોમાં ચર્ચાઇ રહ્યું છે કે આ બનાવમાં ટોળાએ કારચાલકને ઢોર માર માર્યો હતો. કાર ચાલક નશામાં હોવાનો પણ દાવો કરાઇ રહ્યો છે. 

અમદાવાદના જુહાપુરા વિસ્તારમાં મોડી રાત સુધી વાહનોની અવરજવર રહેતી હોય છે. મંગળવારે રાત્રે વાસણા રોડ તરફથી જુહાપુરા તરફ આવી રહેલી એક ટેક્સિ પાસીંગ ધરાવતી કારના ચાલકે રસ્તામાં આડેધડ રીતે કાર ચલાવીને સાતથી આઠ વાહનોને અડફેટમાં લીધા હતા. કાર ફુલ સ્પીડમાં હોવાનું જણાઇ રહ્યું છે. કાર ઢસડાઈને જુહાપુરાની અલ અક્ષ મસ્જિદે આવીને અથડાઈ બાદમાં કાર રોકાઈ હતી. ઘટના બાદ લોકોનું ટોળુ સ્થળ પર એકત્ર થઇ ગયું હતું અને ટોળાએ કાર ચાલકને મેથી પાક પણ આપ્યો હોવાનું ચર્ચાઇ રહ્યું છે.

જો કે આ ઘટના બાદ કાર ચાલક કૌશિક ચૌહાણનો કારના બોનેટ પર મૃતદેહ મળી આવ્યો હતો. ઘટનાની જાણ થતાં પોલીસનો કાફલો સ્થળ પર ધસી આવ્યો હતો. ડ્રાઇવરના મૃતદેહને પીએમ માટે હોસ્પિટલમાં મોકલાયો છે અને પીએમ બાદ મૃત્યું કેવી રીતે થયું તે જાણવા મળી શકે છે. પોલીસ સીસી ટીવી પણ ચેક કરી રહી છે કે ખરેખર ઘટના કેવી રીતે બની હતી અને ટોળાએ તેને માર માર્યો હતો કે કેમ. કાર ચાલક ઇસનપુરમાં રહેતો હોવાનું પોલીસની તપાસમાં બહાર આવ્યું છે.