Ahmedabad : સફેદ કોલરનો કાળો ધંધો, બોડકદેવમાં જુગાર રમતા શ્રીમંતો ઝડપાયા

અમદાવાદના બોડકદેવ વિસ્તારમાં પોલીસ ત્રાટકી અને એક મોટા જુગારધામનો પર્દાફાશ કર્યો! સિંધુ ભવન રોડ પર આવેલા આલીશાન અશ્વવિલા બંગલોમાં જુગારની મહેફિલ ચાલી રહી હતી, જ્યાં અગિયાર જેટલા જુગારીઓ રંગેહાથ ઝડપાયા.

આ જુગારધામનો સંચાલક બીજો કોઈ નહીં પણ ખુદ બંગલાનો માલિક, શૈફુ શાહ હતો. પોલીસની આ કાર્યવાહીમાં એક લાખ રૂપિયાની રોકડ રકમ અને છ જેટલી મોંઘીદાટ વૈભવી કાર પણ જપ્ત કરવામાં આવી છે. તપાસમાં એવું પણ જાણવા મળ્યું છે કે આ બંગલામાં છેલ્લા બે મહિનાથી બેરોકટોક જુગારનો ધંધો ચાલી રહ્યો હતો.

બોડકદેવ પોલીસની આ સરાહનીય કામગીરીથી શહેરના ગુનાખોરી તત્વોમાં ફફડાટ ફેલાઈ ગયો છે. આ હાઈ પ્રોફાઈલ જુગારધામનો પર્દાફાશ થતાં અનેક મોટા માથાઓના નામ સામે આવે તેવી શક્યતા છે, જેના કારણે પોલીસની તપાસ હવે વધુ ઊંડાણપૂર્વક ચાલશે. આ ઘટના અમદાવાદના પોશ વિસ્તારમાં ચાલતી ગેરકાયદેસર પ્રવૃત્તિઓ પર એક મોટો પ્રશ્ન ઊભો કરે છે.