તિરુપતિ મંદિરમાં 100 કરોડની ચોરીનું કૌભાંડ

BJPએ આંધ્ર પ્રદેશની અગાઉની વાયએસઆર કોંગ્રેસ પાર્ટી (YSRCP) સરકાર પર તિરુમાલા તિરુપતિ દેવસ્થાનમ (TTD) માં એક મોટા કૌભાંડનો આરોપ લગાવ્યો છે. ભાજપનો દાવો છે કે, વાય. એસ. જગન મોહન રેડ્ડીના મુખ્યમંત્રી પદના કાર્યકાળ દરમિયાન, મંદિરના દાન બોક્સમાંથી 100 કરોડથી વધુની ચોરી થઈ હતી. ટીટીડી ટ્રસ્ટ બોર્ડના સભ્ય જી. ભાનુપ્રકાશ રેડ્ડીએ તિરુપતિમાં પ્રેસ કોન્ફરન્સ યોજી હતી. તેમણે CCTV ફૂટેજ રજૂ કરીને આરોપ લગાવ્યો કે, મંદિરના કર્મચારી સી. રવિકુમારે શક્તિશાળી રાજકીય વ્યક્તિઓના સમર્થનથી આ ભંડોળની ઉચાપત કરી છે. રેડ્ડીએ આ કૌભાંડ માટે ભૂતપૂર્વ ટીટીડી અધ્યક્ષ ભૂમના કરુણાકર રેડ્ડીને સીધા જવાબદાર ગણાવ્યા, અને આરોપ મૂક્યો કે, આ ચોરી તત્કાલીન મુખ્યમંત્રી જગન મોહન રેડ્ડીના ઈશારે કરવામાં આવી હતી.

6 મહિનાની અંદર જ કેસની પતાવટ

ભાજપે વધુમાં જણાવ્યું કે, વાયએસઆરસીપીના નિયંત્રણ હેઠળના અગાઉના ટીટીડી બોર્ડે આ મામલાને લોક અદાલતમાં પતાવટ કરવાનો નિર્ણય કર્યો હતો, જેના પર પણ સવાલ ઉઠાવવામાં આવ્યા છે. કાનૂની સલાહકાર કે. અજય કુમારે જણાવ્યું કે, ચોરીનો એક ગુનો કમ્પાઉન્ડેબલ હોઈ શકે છે, પરંતુ તેનાથી વધુ ગંભીર 'નોકર દ્વારા માલિક પાસેથી ચોરી'નો ગુનો સમાધાનપાત્ર નથી. આ ઉતાવળી પતાવટે રાજકીય રક્ષણ અંગે શંકા ઊભી કરી છે. ભાજપના પ્રવક્તા જે. મધુસુદને કહ્યું કે, 6 મહિનાની અંદર જ કેસની પતાવટ થવી એ દર્શાવે છે કે વાયએસઆરસીપી સરકાર લોકતાંત્રિક અને બંધારણીય નિયમોની અવગણના કરતી હતી.

 આ પણ વાંચો: 'ભગવાન વેંકટેશ્વરની પવિત્રતાનો પ્રશ્ન છે,' TTD એ બિન-હિન્દુ કર્મચારીઓને VRS આપશે

ચોરાયેલા હુંડીના પૈસા રિયલ એસ્ટેટમાં રોક્યા

તેલુગુ દેશમ પાર્ટી (TDP)ના મહાસચિવ નારા લોકેશે પણ સોશિયલ મીડિયા પર આ મુદ્દે આકરા પ્રહાર કર્યા હતા. તેમણે જગનના વહીવટ પર આંધ્રપ્રદેશને "ચોરો અને લૂંટારાઓ માટેનું સ્વર્ગ" બનાવવાનો આરોપ મૂક્યો. લોકેશે X પર પોસ્ટ કરીને દાવો કર્યો કે, ચોરાયેલા હુંડીના પૈસા રિયલ એસ્ટેટમાં રોકવામાં આવ્યા હતા, અને આ લૂંટનો હિસ્સો "તિરુપતિમાં ભૂમનાથી લઈને તાડેપલ્લી પેલેસ" સુધી પહોંચ્યો હતો, જે વાયએસઆરસીપી નેતૃત્વનું મુખ્ય મથક છે. તેમણે YSRCP સરકાર પર તિરુમાલામાં અન્ય ગેરરીતિઓ જેવી કે, પવિત્ર લાડુમાં ભેળસેળ, અન્નપ્રસાદમમાં ભ્રષ્ટાચાર અને દર્શન ટિકિટોના વેચાણમાં કથિત ભ્રષ્ટાચારનો પણ આરોપ લગાવ્યો.

તમામ વિવાદાસ્પદ નિર્ણયોની સંપૂર્ણ સમીક્ષા કરાશે

વર્તમાન TTD અધ્યક્ષ બી.આર. નાયડુએ અગાઉના બોર્ડ દ્વારા લેવાયેલા તમામ વિવાદાસ્પદ નિર્ણયોની સંપૂર્ણ સમીક્ષા કરવાનું વચન આપ્યું છે. રાજકીય વર્તુળોમાં ગરમાવો વધી રહ્યો છે, ત્યારે ભાજપે આ કથિત "પરકામણી કૌભાંડ"ની સંપૂર્ણ તપાસ માટે દબાણ કરવાની જાહેરાત કરી છે. આ ખુલાસાઓએ મંદિરના વિશાળ ભંડોળના સંચાલનમાં પારદર્શિતા અને જવાબદારી પર ફરીથી ચર્ચા જગાવી છે.