Bhuj નકલી નોટોની રમત રચનારી ચીટર ગેંગ ઝડપાઈ: 6 ની ધરપકડ

ભુજ શહેરના રહીમનગર વિસ્તારમાં નકલી નોટોના ગેરકાયદેસર વેપારમાં સંડોવાયેલી એક ચીટર ગેંગને પોલીસે ઝડપી પાડી છે. આ ગેંગના મુખ્ય આરોપી એઝાઝ હુસેન શેખ અને તેના સાગરિતોએ 'એક કા ડબલ'ની લાલચે હૈદરાબાદના બે શખ્સોને ફસાવવાનો પ્રયાસ કર્યો હતો. પોલીસે સમયસર કાર્યવાહી કરી આ ગેંગના 6 સભ્યોની ધરપકડ કરી અને મોટા પ્રમાણમાં નકલી નોટો, રોકડ અને અન્ય મુદ્દામાલ જપ્ત કર્યો છે.   એઝાઝ હુસેન શેખની આગેવાની હેઠળની આ ગેંગે હૈદરાબાદના ગિરિધારી પ્રકાશ નાડે અને ઈશ્વર કમલે નામના બે શખ્સોને 1 લાખ રૂપિયાની સામે 2 લાખ રૂપિયા આપવાની લાલચ આપી હતી. આ શખ્સોને રહેણાક ખાતે બોલાવી, ગેંગે સેમ્પલ તરીકે અસલી નોટો બતાવી ભરોસો જન્માવ્યો હતો. જોકે, સોદો થાય તે પહેલાં જ પોલીસે રેડ પાડી અને આખી યોજના નિષ્ફળ કરી.   પોલીસે એઝાઝ શેખ સાથે મહમદ હુસેન ઉર્ફે મમલો ઓસમાણ લંગા, મામદ ચનેસર સુમરા, હનીફ દાઉદ સના, વસીમ હુસેન શેખ અને વચેટીયા કિરણ અલકારીની ધરપકડ કરી. રહેણાકની તપાસ દરમિયાન સોફા પરના ઓશીકા પાછળથી 500 રૂપિયાની નકલી નોટોના 5 બંડલ મળી આવ્યા, જેમાં ઉપર-નીચે અસલી નોટો અને વચ્ચે કોરા કાગળો રાખવામાં આવ્યા હતા. આ ઉપરાંત, 200 રૂપિયાની 100 અસલી નોટોનું એક બંડલ પણ જપ્ત થયું. પોલીસે ગુનામાં વપરાયેલી 15 લાખની સ્કોર્પિયો કાર, 30 હજાર રોકડા અને 45 હજારની કિંમતના 9 મોબાઈલ ફોન પણ કબજે કર્યા.   ઝડપાયેલા આરોપીઓનો ગુનાહિત ઈતિહાસ ચોંકાવનારો છે. મહમદ હુસેન ઉર્ફે મમલા સામે માંડવી મરીન, સાણંદ જીઆઈડીસી, બાડમેર અને જખૌ પોલીસ મથકમાં ઠગાઈ અને લૂંટના ચાર ગુના નોંધાયેલા છે. મામદ ચનેસર સુમરા સામે વલસાડના ડુંગરી અને ભુજના એ તથા બી ડિવિઝન પોલીસ મથકમાં ઠગાઈના ત્રણ ગુના નોંધાયા છે. હનીફ સના વિરુદ્ધ ઠગાઈના ત્રણ, એઝાઝ શેખ સામે ભુજ એ ડિવિઝનમાં હત્યાનો એક અને કિરણ અલકારી સામે સુરતમાં ઠગાઈ તથા હૈદરાબાદમાં સાયબર ફ્રોડનો ગુનો નોંધાયેલો છે.   પોલીસે આરોપીઓ સામે સિન્ડિકેટ બનાવી ઓર્ગેનાઈઝ્ડ ક્રાઈમ આચરવાની કલમો હેઠળ ફરિયાદ નોંધી છે. આરોપીઓના રિમાન્ડ મેળવી વધુ તપાસ હાથ ધરવામાં આવી છે. આ ઘટના નકલી નોટોના ગેરકાયદેસર વેપાર અને ઠગાઈની ગુનાહિત પ્રવૃત્તિઓ સામે પોલીસની સતર્કતા દર્શાવે છે.   આ ઘટનાએ ભુજ શહેરમાં ચકચાર મચાવી છે અને નાગરિકોને આવા લલચામણા સોદાઓથી સાવધ રહેવાની અપીલ કરવામાં આવી છે.