લાંચ પ્રકરણમાં ફરાર આણંદના ભૂસ્તરશાસ્ત્રી અને રોયલ્ટી ઇન્સ્પેક્ટર ઝડપાયા

રેતીના સ્ટોકની મંજૂરી આપવા માટે વડોદરા ખાણ ખનિજ વિભાગના સિનિયર ક્લાર્ક અને કોમ્પ્યૂટર ઓપરેટર બે માસ અગાઉ રૂપિયા 2 લાખની લાંચ લેતા ઝડપાયા હતા. તેઓએ ભૂસ્તરશાસ્ત્રી અને રોયલ્ટી ઈન્સપેક્ટર વતી લાંચ સ્વીકારી હોવાની ફરિયાદ થતાં ભૂસ્તરશાસ્ત્રી અને રોયલ્ટી ઈન્સપેક્ટર ફરાર થઈ ગયા હતા. ગુજરાત હાઈકોર્ટે બંને આરોપીઓની આગોતરા જામીન અરજી ફગાવી દેતાં એસીબીએ ઇન્ચાર્જ ભૂસ્તરશાસ્ત્રી અને રોયલ્ટી ઇન્સ્પેક્ટરની ધરપકડ કરી છે. 

એસીબીના જણાવ્યા મુજબ  મકરપુરા વિસ્તારમાં રહેતા અને મૂળ કરજણ તાલુકાના રેતીના વેપારીએ વડોદરામાં રેતીનો સ્ટોક કરવા માટે વડોદરાની ખાણ ખનિજ વિભાગની ઓફિસમાં ઓનલાઇન અરજી કરી હતી. જેની મંજૂરી માટે સિનિયર ક્લાર્ક યુવરાજસિંહ દિલીપસિંહ ગોહિલે કચેરીના સ્ટાફને વ્યવહાર પેટે રૂપિયા 2 લાખ આપવા પડશે તેમ કહી લાંચની માંગણી કરી હતી. ત્યારબાદ 12 મે ના રોજ અટલાદરા વિસ્તારમાં બીએપીએસ હોસ્પિટલની  બાજુમાં પ્રેમવતી રેસ્ટોરન્ટમાં પ્રથમ યુવરાજસિંહ અને બાદમાં કોમ્પ્યૂટર ઓપરેટર કિરણ પરમારને લાંચ સ્વીકારતાં ઝડપી પાડવામાં આવ્યા હતાં.

આ કેસમાં ભૂસ્તરશાસ્ત્રી રવિ કમલેશકુમાર મિસ્ત્રી અને રોયલ્ટી ઇન્સ્પેક્ટર સંકેત જીતેન્દ્રકુમાર પટેલ ફરાર થઈ ગયા હતાં. લાંચ કેસમાં ધરપકડથી બચવા બંનેએ વડોદરા કોર્ટ અને હાઇકોર્ટમાં આગોતરા જામીન અરજી મૂકી હતી. બંનેના આગોતરા જામીન ફગાવી દેતાં બંને કર્મચારીની ધરપકડ કરવામાં આવી હતી. છેલ્લાં બે મહિનાથી ફરાર રવિ મિસ્ત્રી અને સંકેત પટેલ અત્યાર સુધી ક્યાં છુપાયા હતા તેમજ લાંચ કેસમાં તેઓનો કેટલો ભાગ હતો તેની હકીકત જાણવા પૂછપરછ હાથ ધરવામાં આવી રહી છે. ઉલ્લેખનીય છે કે રવિ મિસ્ત્રી આણંદના ભૂસ્તરશાસ્ત્રી હતા. પરંતુ વડોદરાનો તેમની પાસે ચાર્જ હતો. તેવી જ રીતે જ્યારે સંકેત પટેલની આણંદથી થોડા દિવસો પહેલાં જ વડોદરા ખાતે બદલી થઇ હતી.