અમિત મજેઠિયા કેસઃ ED દ્વારા 81 લાખની મિલકત જપ્ત!

એન્ફોર્સમેન્ટ ડિરેક્ટોરેટ (ED) એ ઓનલાઈન સટ્ટાબાજી કૌભાંડના સંદર્ભમાં પ્રિવેન્શન ઓફ મની લોન્ડરિંગ એક્ટ (PMLA), 2002 હેઠળ 81 લાખ રૂપિયાની સ્થાવર મિલકતો જપ્ત કરી છે. આ કાર્યવાહી પ્રિવેન્શન ઓફ મની લોન્ડરિંગ એક્ટ (PMLA), 2002 હેઠળ કરવામાં આવી છે. સુરત DCB પોલીસ સ્ટેશન દ્વારા કમલેશ જરીવાલા સહિતના આરોપીઓ વિરુદ્ધ દાખલ થયેલી FIR બાદ ED એ તપાસ શરૂ કરી હતી.

તપાસમાં ખુલાસો થયો છે કે મુખ્ય આરોપી અમિત મજેઠિયા અને તેના સાથીઓએ CBTF247.COM અને T20EXCHANGE.COM જેવી ઓનલાઈન સટ્ટાબાજી વેબસાઇટ્સ ચલાવી હતી. આ વેબસાઇટ્સ મારફતે ક્રિકેટ, ફૂટબોલ, ટેનિસ, હોકી જેવી રમતો પર સટ્ટાબાજી ચલાવવામાં આવતી હતી.

ED અનુસાર, આરોપીઓએ નકલી કંપનીઓના નામે બેંક ખાતાઓ ખોલીને તેમાં ગેરકાયદેસર આવક (Proceeds of Crime) જમા કરી અને તે રકમ રોકાણ કરી હતી. નાણાંની હેરફેર છુપાવવા માટે મજેઠિયાએ પોતાની પત્નીને નોઈડાની BCC મ્યુઝિક ફેક્ટરી નામની કંપનીમાં 85% ભાગીદાર બનાવી હતી, જેનો ઉપયોગ કથિત રીતે સટ્ટાબાજીના નાણાં લોન્ડર કરવા માટે થતો હતો.

10 જુલાઈ 2025 ના રોજ નોઈડામાં કરાયેલી રેડ દરમિયાન 30 લાખ રૂપિયા રોકડ, ડિજિટલ ઉપકરણો અને બેંક દસ્તાવેજો મળી આવ્યા હતા. ED એ ખુલાસો કર્યો કે મજેઠિયાએ પોતાની પત્ની રોહિણી મજેઠિયાના નામે ગેરકાયદેસર આવકથી મિલકત ખરીદી હતી.

જપ્ત કરાયેલી 81 લાખ રૂપિયાની સંપત્તિમાં સ્થાવર મિલકતો અને બેંક ખાતામાં રહેલી રકમનો સમાવેશ થાય છે. ED હાલમાં મની ટ્રેલ અને અન્ય સંકળાયેલા નેટવર્કની તપાસ ચાલુ રાખી છે.

આ કેસ ડિજિટલ જુગાર અને ઓનલાઈન સટ્ટાબાજી નેટવર્કના માધ્યમથી વધતા નાણાકીય ગુનાઓ સામે કાયદા અમલ એજન્સીઓની ચુસ્ત કાર્યવાહીનું ઉદાહરણ છે.