અમદાવાદ : બાઈકમાંથી મળ્યું શંકાસ્પદ માંસ અને પશુધડ

અમદાવાદ શહેરના ઠક્કરબાપાનગર બ્રિજ પાસે માંસ લઈને જઈ રહેલી એક યુવતી અને બે મહિલાઓને સ્થાનિક લોકોએ શંકાસ્પદ રીતે અટકાવ્યા હતા. તેઓ મોડીફાઇડ કરેલી બાઈક પર સવાર હતા અને તેમના પાસે રહેલી પ્લાસ્ટિકની કોથળીમાંથી દુર્ગંધ આવી રહી હતી. સ્થાનિકોને શંકા જતા મહિલાઓને રોકી પૂછપરછ કરવામાં આવી. ત્યારબાદ મહિલાઓ પાસે રહેલી કોથળીમાંથી શંકાસ્પદ માંસ અને પશુનું ધડ મળ્યું હતું.

ઘટનાસ્થળે ટોળું ભેગું થતા પોલીસને બોલાવવામાં આવી હતી. ઘટના સ્થળે ACP ઝોન-5 આર.ડી. ઓઝા પણ હાજર રહ્યા હતા. મહિલાઓ તેમજ મળેલ માલસામાનને નિકોલ પોલીસ સ્ટેશન લઈ જવાયું છે. હવે આ મામલે આગળની કાર્યવાહી માટે FSL (ફોરેન્સિક સાયન્સ લેબોરેટરી)ની તપાસ કરવામાં આવશે. પોલીસ દ્વારા વધુ પુછપરછ કરવામાં આવી રહી છે અને કાયદેસરની કાર્યવાહી હાથ ધરવામાં આવશે.

અગાઉ પણ હિન્દૂ સંગઠનો દ્વારા આવા અનેક ગેરકાયદે માંસની હેરાફેરી કરતા શખ્સોને રોકવામાં આવ્યા છે પણ આ વખતે પોલીસના જણાવ્યા મુજબ મહિલાઓ ગેરકાયદે માંસની હેરાફેરી કરતા જોવા મળી છે. હવે મહિલાઓ દ્વારા માંસની હેરાફેરી કરવાની નવી કાર્યપદ્ધતિ જોવા મળી રહી છે.