અમદાવાદના વેજલપુર અને જુહાપુરા વિસ્તારમાં જેનો ભારે આતંક હતો તેવો કુખ્યાત ગુનેગાર અઝહર ઉર્ફે કેટલી આખરે પોલીસના સકંજામાં આવ્યો છે. વેજલપુર પોલીસ અને એલસીબી ઝોન-7 ની ટીમે સંયુક્ત ઓપરેશન હાથ ધરીને બાતમીના આધારે આ રીઢા ગુનેગારને ઝડપી પાડ્યો છે. લાંબા સમયથી પોલીસને થાપ આપી રહેલા આ આરોપી પાસેથી રોકડ રકમ, વાહન અને વિદેશી ચલણ પણ મળી આવ્યું છે.
ગુનાહિત ઇતિહાસ અને ગુજસીટોકનો ગંભીર કેસ :&nbsp;
પકડાયેલા આરોપી અઝહર સામે હત્યાનો પ્રયાસ,ખંડણી અને મારપીટ જેવા ૨૧ થી વધુ ગંભીર ગુનાઓ નોંધાયેલા છે. ખાસ કરીને ઓર્ગેનાઈઝ્ડ ક્રાઈમને રોકવા માટેના કડક કાયદા 'ગુજસીટોક' (GUJCTOC) હેઠળ તે વોન્ટેડ હતો. છેલ્લા દોઢ વર્ષથી તે ધરપકડથી બચવા માટે નાસતો ફરતો હતો, પરંતુ પોલીસની સતર્કતાને કારણે તે જુહાપુરા વિસ્તારમાંથી પકડાઈ ગયો છે.
જામીનનો દુરુપયોગ અને પોલીસની કાર્યવાહી :&nbsp;
અગાઉ આ આરોપીને અદાલત દ્વારા શરતી જામીન આપવામાં આવ્યા હતા, પરંતુ જામીન પર મુક્ત થયા બાદ પણ તેની ગુનાહિત પ્રવૃત્તિઓ ચાલુ રહી હતી. નવા ગુનામાં સંડોવણી બહાર આવતા કોર્ટે તેના જામીન રદ કર્યા હતા. ત્યારથી તે ભૂગર્ભમાં ઉતરી ગયો હતો. પોલીસ તપાસમાં તેની પાસેથી વિદેશી નોટો મળી આવતા હવે આ નાણાં ક્યાંથી આવ્યા અને તેના અન્ય કોઈ આંતરરાષ્ટ્રીય જોડાણ છે કે કેમ તે દિશામાં પણ ઝીણવટભરી તપાસ શરૂ કરવામાં આવી છે.
વિસ્તારમાં પોલીસનો વધતો પ્રભાવ :&nbsp;
જુહાપુરા અને વેજલપુર જેવા સંવેદનશીલ વિસ્તારોમાં શાંતિ જળવાઈ રહે તે માટે પોલીસ સતત એક્શન મોડમાં છે. આ ધરપકડ બાદ સ્થાનિક લોકોમાં સુરક્ષાનો વિશ્વાસ વધશે. હાલમાં પોલીસે આરોપીને રિમાન્ડ પર લેવાની પ્રક્રિયા હાથ ધરી છે જેથી તેના અન્ય સાથીદારો અને સંડોવણી વિશે વધુ વિગતો જાણી શકાય.
&nbsp;

વેજલપુર પોલીસ અને ઝોન-7 LCB એ જુહાપુરામાંથી 21 ગુનામાં સંડોવાયેલા વોન્ટેડ આરોપીને દબોચ્યો

January 20, 2026 | 17:15 IST