Ahmedabad : નકલી દસ્તાવેજોનું જાળું, કોર્પોરેટરોની મિલીભગત, ATS નો મોટો ઘટસ્ફોટ...

અમદાવાદમાં ગેરકાયદેસર રીતે રહેતા બાંગ્લાદેશીઓના નકલી દસ્તાવેજો બનાવવાના કૌભાંડનો પર્દાફાશ થયો છે. ગુજરાત ATS એ નકલી દસ્તાવેજો બનાવી આપનારા એક એજન્ટ અને એક બાંગ્લાદેશીની ધરપકડ કરી છે. આ કૌભાંડમાં કોંગ્રેસના કોર્પોરેટરોના લેટરપેડનો ઉપયોગ થયો હોવાનું ATS ની તપાસમાં સામે આવ્યું છે.

ATS ની તપાસમાં સામે આવ્યું છે કે, આરોપીઓએ મ્યુનિસિપલ કોર્પોરેશનના વિપક્ષના નેતા શહેઝાદ ખાન પઠાણ, કોર્પોરેટર ગીતા સોલંકી અને પૂર્વ કોર્પોરેટર કમરૂદ્દીનના લેટરપેડનો ઉપયોગ કરીને નકલી દસ્તાવેજો બનાવ્યા હતા. શહેઝાદ ખાન પઠાણના લેટરપેડ પરથી ચાર દસ્તાવેજો, ગીતા સોલંકીના લેટરપેડ પરથી 15 દસ્તાવેજો અને કમરૂદ્દીનના લેટરપેડ પરથી બે દસ્તાવેજો બનાવવામાં આવ્યા હતા.

ATS એ ગેરકાયદેસર રીતે રહેતા રાણા સરકાર નામના બાંગ્લાદેશીની ધરપકડ કરી છે. રાણા સરકાર નકલી પાસપોર્ટના આધારે અમદાવાદમાં રહેતો હતો. ATS એ રાણા સરકારની દુકાનમાં તપાસ શરૂ કરી છે. તપાસમાં સામે આવ્યું છે કે રાણા સરકાર, રિન્યુઅલ ઈસ્લામ અને સોએબ મહમદ સાથે મળીને ખોટા દસ્તાવેજો બનાવતા હતા. આરોપીઓ મોબાઈલ શોપમાં અન્ય બાંગ્લાદેશીઓના ખોટા દસ્તાવેજો બનાવતા હતા. દુકાનમાંથી 13 બાંગ્લાદેશીઓના નકલી દસ્તાવેજો મળી આવ્યા છે.

વધુ તપાસમાં શોએબ કુરેશીની દુકાનમાંથી ખોટા આધારકાર્ડ અને નકલી સર્ટિફિકેટની 22 નકલો મળી આવી છે. કોમ્પ્યુટરમાંથી આશરે 300 થી વધારે ખોટા દસ્તાવેજો મળી આવ્યા છે. ત્રણેય આરોપીઓએ 17 બાંગ્લાદેશીઓના ખોટા દસ્તાવેજોના આધારે પાસપોર્ટ બનાવી આપવામાં મદદ કરી હતી. ATS એ મોહમ્મદ ઉર્ફે રાણા સરકાર અને સોએબ મોહમ્મદની ધરપકડ કરી છે અને વધુ તપાસ હાથ ધરી છે.