Ahmedabad Minor Suicide Case: અમદાવાદના નારોલ વિસ્તારમાં રહેતી 17 વર્ષની સગીરાના આપઘાતના બનાવે ચકચાર મચાવી છે. મૂળ આણંદના પેટલાદની સગીરાએ 10 ઓગસ્ટે સાબરમતી નદીમાં ઝંપલાવી જીવન ટૂંકાવ્યું હતું. પ્રાથમિક ફરિયાદ મુજબ, લગ્ન બાદ પતિ દ્વારા શારીરિક અને માનસિક ત્રાસ આપવામાં આવતો હોવાનો આક્ષેપ છે. પતિએ ઘરમાંથી કાઢી મૂક્યા બાદ સગીરાએ પરિવાર પાસે આશરો લીધો હતો. આપઘાત પહેલાં સગીરાએ પોતાની બહેનને એક વીડિયો મોકલ્યો હતો. વીડિયોમાં તેણે પતિ સામે ગંભીર આક્ષેપો કર્યા હતા. સમગ્ર મામલે રિવરફ્રન્ટ પોલીસે સગીરાના પિતાની ફરિયાદના આધારે પતિ સામે આપઘાતની દુષ્પ્રેરણાનો ગુનો નોંધી તપાસ શરૂ કરી છે.
પ્રેમસંબંધ બાદ પરિવારની સંમતિથી થયા હતા લગ્ન પોલીસ ફરિયાદ મુજબ, સગીરાને ફરદીન શેખ નામના યુવક સાથે પ્રેમસંબંધ હતો. બંને વચ્ચેના સંબંધને પરિવારની સંમતિ મળ્યા બાદ આશરે છ મહિના પહેલાં લગ્ન કરાવવામાં આવ્યા હતા. લગ્ન બાદ સગીરા પતિ સાથે આણંદ ખાતે રહેતી હતી. જોકે, લગ્નના થોડા સમય બાદ જ બંને વચ્ચે અણબનાવ શરૂ થયો હતો. ફરિયાદમાં પતિ દ્વારા સગીરાને શારીરિક અને માનસિક ત્રાસ આપવામાં આવતો હોવાના આક્ષેપ કરવામાં આવ્યા છે.
પતિએ ઘરમાંથી કાઢી મૂક્યા બાદ પિતાના ઘરે આવી ફરિયાદ મુજબ, 3 ઓગસ્ટે પતિએ સગીરાને ઘરમાંથી કાઢી મૂકી હતી. ત્યારબાદ તે નારોલમાં પોતાના પિતાના ઘરે આવીને રહેતી હતી. 10 ઓગસ્ટે સગીરા પોતાની માતા સાથે ઘરે હતી. લગ્નનો આલ્બમ જોતી વખતે તે ભાવુક બનીને રડી રહી હતી. ત્યારબાદ તેણે પતિને ફોન કરીને ફરી સાથે રહેવાની વિનંતી કરી હતી. જોકે, પતિએ તેને પરત સ્વીકારવાનો ઇનકાર કર્યો હોવાનો ફરિયાદમાં ઉલ્લેખ છે.
આપઘાત પહેલાં બહેનને મોકલ્યો વીડિયો પતિના ઇનકાર બાદ સગીરા ભારે હતાશ થઈ ગઈ હતી. બપોરના સમયે ગભરામણ થતી હોવાનું કહી તે ઘરેથી બહાર નીકળી હતી અને સાબરમતી રિવરફ્રન્ટ પહોંચી હતી. પોલીસ ફરિયાદ મુજબ, નદીમાં ઝંપલાવતા પહેલાં તેણે પોતાના મોબાઈલમાં વીડિયો રેકોર્ડ કર્યો હતો અને આ વીડિયો પોતાની બહેનને મોકલ્યો હતો. વીડિયોમાં તેણે પતિ સામે આક્ષેપો કર્યા હતા અને પોતાનું જીવન ટૂંકાવવાની વાત કરી હતી.
સાબરમતી નદીમાંથી મૃતદેહ મળ્યો બપોરે આશરે 3 વાગ્યાના સમયગાળામાં સાબરમતી નદીમાં સગીરાનો મૃતદેહ જોવા મળતાં સ્થાનિકોએ પોલીસ અને ફાયર બ્રિગેડને જાણ કરી હતી. ફાયર બ્રિગેડની ટીમે નદીમાંથી મૃતદેહ બહાર કાઢ્યો હતો. તપાસ દરમિયાન મૃતદેહ ગુમ થયેલી સગીરાનો હોવાનું સામે આવ્યું હતું. પોલીસે મૃતદેહને પોસ્ટમોર્ટમ માટે મોકલી પરિવારજનોને જાણ કરી હતી.
પતિ સામે પોલીસ કાર્યવાહી, દુષ્પ્રેરણાનો કેસ સગીરાના પિતાની ફરિયાદના આધારે રિવરફ્રન્ટ પોલીસે તેના પતિ ફરદીન શેખ સામે આપઘાતની દુષ્પ્રેરણાનો ગુનો નોંધ્યો છે. પોલીસે વીડિયો સહિતના પુરાવાઓને તપાસમાં સામેલ કર્યા છે અને સમગ્ર મામલે વધુ કાયદેસરની કાર્યવાહી હાથ ધરી છે.

પતિના ત્રાસથી કંટાળી સાબરમતીમાં ઝંપલાવ્યું, વીડિયો મોકલી લગાવ્યો ગંભીર આરોપ

August 13, 2026 | 14:20 IST