અમદાવાદ: ટાવરમાંથી કોપર કેબલ ચોરતી ગેંગ ઝડપાઈ

અમદાવાદ જિલ્લાના વિવિધ વિસ્તારોમાં છેલ્લા કેટલાક સમયથી મોબાઈલ ટાવરના મોંઘા કેબલ ચોરી થવાની ઘટનાઓમાં મોટો ઉછાળો જોવા મળી રહ્યો છે. આ વણઉકેલાયેલા ગુનાઓને ગંભીરતાથી લઈને પોલીસ મહાનિરીક્ષક વિધી ચૌધરી અને અમદાવાદ ગ્રામ્ય એસપી ઓમ પ્રકાશ જાટ દ્વારા કડક સૂચના આપવામાં આવી હતી. આ દિશામાં કાર્યવાહી કરતા LCB પી.આઈ. આર.એન. કરમટીયાની ટીમે તપાસ શરૂ કરી હતી.

 

બાતમીના આધારે ચાર રીઢા ગુનેગારો ઝડપાયા : 

LCB ની ટીમને તપાસ દરમિયાન હેડ કોન્સ્ટેબલ શૈલેષભાઈ દેસાઈ અને કલ્પેશભાઈ ડામોર દ્વારા મળેલી સચોટ બાતમીના આધારે ચાર શખ્સોને દબોચી લેવામાં આવ્યા હતા. 

 

પકડાયેલા આરોપીઓની વિગતો નીચે મુજબ છે:

વિકાસ શંકરનાથ યોગી: રહે. નિકોલ, અમદાવાદ (મૂળ રાજસ્થાન)

પપ્પુનાથ ધર્માનાથ યોગી: રહે. નરોડા, અમદાવાદ (મૂળ રાજસ્થાન)

અભિષેક દેવલાલ બારી: રહે. નિકોલ, અમદાવાદ (મૂળ મધ્યપ્રદેશ)

જગદીશ ચંપાલાલ માલી: રહે. નિકોલ, અમદાવાદ (મૂળ રાજસ્થાન)

 

લાખોની કિંમતનો મુદ્દામાલ કબજે : 

પોલીસની પ્રાથમિક પૂછપરછમાં આરોપીઓએ કબૂલાત કરી હતી કે તેઓ ટાવર પરથી કોપર કેબલની ચોરી કરતા હતા. પોલીસે આરોપીઓ પાસેથી 213.500 કિલોગ્રામ કોપર કેબલ (કિંમત ₹ 2,34,850) અને વાહન સહિત કુલ ₹ 3,80,850 નો મુદ્દામાલ જપ્ત કર્યો છે. હાલમાં આ તમામ આરોપીઓને કણભા પોલીસ સ્ટેશનને સોંપવામાં આવ્યા છે, જ્યાં તેમના દ્વારા આચરવામાં આવેલા અન્ય ગુનાઓની પણ તપાસ કરવામાં આવશે.