હરિયાણામાં ACમાં વિસ્ફોટ થતા પરિવાર સહિતના 3ના મોત

હરિયાણાના ફરીદાબાદ જિલ્લાના ગ્રીન ફિલ્ડ કોલોનીમાં રવિવારની રાતે એક દુઃખદ અને હૃદયદ્રાવક ઘટના ઘટી હતી. એક ઘરમાં ફર્સ્ટ ફ્લોર પર આવેલું AC ફાટતાં આગ લાગી હતી. આ વિસ્ફોટ એટલો ગંભીર હતો કે, સેકન્ડ ફ્લોર પર રહેતા પરિવારના પતિ, પત્ની અને નાની દિકરી ત્રણેયનું દમ ઘૂટવાથી મોત થયું હતું. આ દુર્ઘટનામાં પરિવારનો પાલતુ કૂતરો પણ બચી ન શક્યો.

દુર્ઘટનાસ્થળે જ શ્વાસ રૂંધાવાથી મોત

મૃતકોની ઓળખ પતિ સચિન કપૂર, તેમની પત્ની રિંકૂ કપૂર અને પુત્રી સુજાન કપૂર તરીકે કરવામાં આવી છે. સ્થાનિક રહીશો અને પોલીસના જણાવ્યા અનુસાર, રાત્રે અચાનક જ એક મોટો ધડાકો સંભળાયો હતો. ત્યારબાદ ઘરમાંથી ધુમાડો અને આગ જોવા મળતા લોકો દોડી આવ્યા. પણ તાત્કાલિક ધુમાડો ભરી જતાં મુખ્યમાળે રહેતા ત્રણેય લોકોનો દુર્ઘટનાસ્થળે જ શ્વાસ રૂંધાઈ જવાથી કરૂણ મૃત્યુ થયું હતું.

ACમાં શોર્ટસર્કિટ થતાં થયો વિસ્ફોટ

પડોશીઓના કહેવા મુજબ, કપૂર પરિવાર ખૂબ જ મૈત્રીસભર અને લોકપ્રિય હતો. તેમને થતી અચાનક ગુમાવટથી સમગ્ર વિસ્તાર ગમગીન છે. ઘટનાની જાણ થતાં ફાયર બ્રિગેડ અને પોલીસ તાત્કાલિક સ્થળ પર પહોંચી ગઈ હતી, પરંતુ ત્યાં સુધી ઘણી વાર થઈ ચુકી હતી. શંકા છે કે, ACમાં શોર્ટસર્કિટ થતાં વિસ્ફોટ થયો અને આગ લાગી.

મૃતદેહોને પોસ્ટમોર્ટમ માટે મોકલ્યા

પોલીસે ત્રણેય મૃતદેહોને કબ્જામાં લઈને પોસ્ટમોર્ટમ માટે મોકલ્યા છે. ઘટના સ્થળ પર ફોરેન્સિક ટીમને પણ બોલાવી વધુ તપાસ શરૂ કરવામાં આવી છે. પોલીસ અધિકારીઓનું કહેવું છે કે, આગ લાગવાનું મુખ્ય કારણ હજુ પૂર્ણપણે સ્પષ્ટ નથી, પણ પ્રાથમિક તબક્કે AC વિસ્ફોટ અને શોર્ટસર્કિટને જવાબદાર માનવામાં આવી રહ્યો છે.

અધિકારીઓએ નાગરિકોને કરી અપીલ

આ ઘટનાને લઈને અધિકારીઓએ નાગરિકોને અપીલ કરી છે કે, ઘરનાં ઈલેક્ટ્રોનિક ઉપકરણોનો ઉપયોગ કરતા પૂરતી સતર્કતા રાખવી જોઈએ અને જો ઉપકરણમાં કોઈ ખામી જણાય તો તરત જ તેની મરામત કે બદલાવ કરાવવો જોઈએ.