બનાસકાંઠા : SMC PI A V Patel ના માતા-પિતાની હત્યામાં મોટો ઘટસ્ફોટ

બનાસકાંઠામાં લાખણીના જસરા ગામે થયેલી વૃદ્ધ દંપતીની હત્યાના બનાવમાં પોલીસે 2 હત્યારાને ઝડપી પાડ્યા છે. ઉલ્લેખનિય છે કે હાલ SMCમાં ફરજ બજાવતા PI એ. વી. પટેલના માતા-પિતાની હત્યા કરવામાં આવી હતી. પીઆઇ પટેલના પિતા વર્ધાજી અને માતા હોશીબેન પટેલની હત્યા કરવામાં આવી હતી. ઘટનાના પગલે પોલીસ તંત્રમાં ખળભળાટ મચી ગયો હતો.

 દંપતી સૂતું હતું અને તે સમયે અજાણ્યા વ્યક્તિઓ ઘરમાં ઘુસીને હત્યા કરીને ફરાર થયા હતા. ઘટનાની જાણ થતાં જ આગથળા પોલીસ ટીમ ઘટના સ્થળે પહોંચી તાત્કાલિક તપાસ શરૂ કરી હતી. હત્યા બાદ હત્યારાઓ  રાજસ્થાન તરફ ભાગ્યા હોવાની પોલીસે આશંકા વ્યક્ત કરી હતી. તીક્ષ્ણ હથિયાર વડે હત્યા કરાઇ હોવાની પ્રાથમિક માહિતી સામે આવી હતી. પોલીસ હત્યાનો ગુનો નોંધી વધુ તપાસ હાથ ધરી છે. દંપતીની રાત્રિના સમયે ઘરની બહાર ફળિયામાં સુતા હતા તે દરમ્યાન હત્યા કરવામાં આવી હતી.  

સવારે જ્યારે તેમના ખેતરમાં કામ કરતો વ્યક્તિ તેમના ઘરે પહોંચ્યો તો ઘરના આંગણામાં ખાટલામાં બંનેના મૃતદેહ લોહીલુહાણ હાલતમાં મળ્યા હતા, જેથી તેણે આ અંગે બધાને જાણ કરી હતી. બનાવની જાણ થતાં જિલ્લા પોલીસવડા સહિતના પોલીસકર્મીઓ, ડૉગ-સ્ક્વૉડ, એફએસએલની ટીમ ઘટનાસ્થળે તપાસ માટે પહોંચી હતી. મર્ડરમાં પ્રાથમિક વિગત એવી મળી હતી કે લૂંટારા મહિલાના પગ કાપી કડલાં કાપી લૂંટી ગયા છે તેમજ કાનની બુટ્ટીઓ પણ કાપીને લઈ ગયા છે તથા ઘરમાં તિજોરી પણ તોડેલી હતી.

દરમિયાન પોલીસે શરુ કરેલી તપાસમાં 2 હત્યારા ઝડપાયા છે. પોલીસે આ મામલે ઘેસીયા સુરેશ શામળાજી તથા ઠોહ ઉમા ચેલાજીની ધરપકડ કરી છે. તપાસમાં બહાર આવ્યું હતું કે પાડોશી ખેડૂતે ભુવાની તાંત્રિક વિધિના અંધવિશ્વાસમાં આવી જઈ સોનાના ઘરેણા માટે બનાવને અંજામ આપ્યો હતો જેથી પોલીસે બે પાડોશીની અટકાયત કરી , ભુવાની શોધખોળ હાથ ધરી છે. હત્યારા સાળો બનેવી હોવાનું બહાર આવ્યું છે. ભુવાએ કહ્યું હતું કે તમારા ખેતરમાં સોનુ દટાયેલું છે જે શોધવા માટે વિધિ કરવી પડશે એટલે તમે સોનાના ઘરેણા લઈ આવો અને ઘરેણા માટે તેમણે આ ઘાતકી હત્યા કરી હતી.

આ પણ વાંચો--- બનાસકાંઠા: SMCમાં કાર્યરત PIના માતા-પિતાની હત્યા, કારણ અકબંધ