₹600 કરોડની ઓફર પણ નકારી! ₹12,668 કરોડના દેવા મામલે Videoconના પૂર્વ પ્રમોટર નાદાર, હવે સંપત્તિનું શું થશે?

Venugopal Dhoot Bankrupt NCLT Order: ભારતના કોર્પોરેટ અને બેંકિંગ ક્ષેત્રમાં મોટો કાનૂની ઘટનાક્રમ સામે આવ્યો છે. નેશનલ કંપની લો ટ્રિબ્યુનલ (NCLT)ની મુંબઈ બેન્ચે Videocon Industriesના ભૂતપૂર્વ પ્રમોટર અને ડિરેક્ટર વેણુગોપાલ નંદલાલ ધૂતને વ્યક્તિગત રીતે નાદાર જાહેર કર્યા છે. સ્ટેટ બેંક ઓફ ઇન્ડિયા (SBI) અને તેની સહયોગી બેંકોનું કુલ ₹12,668.06 કરોડનું દેવું ચૂકવવામાં નિષ્ફળ રહેતાં આ નિર્ણય લેવામાં આવ્યો છે. આ આદેશથી ધૂતની અંગત સંપત્તિ હવે નાદારી પ્રક્રિયા હેઠળ આવી ગઈ છે.

₹12,668 કરોડના દેવા મામલે NCLTનો મોટો નિર્ણય
NCLTની મુંબઈ બેન્ચે નાદારી અને નાદારી સંહિતા (IBC)ની કલમ 121 હેઠળ SBI દ્વારા દાખલ કરવામાં આવેલી અરજી સ્વીકારી હતી. આ કાર્યવાહી પહેલાં ધૂત તરફથી 36 મહિનાના સમયગાળામાં ₹600 કરોડ ચૂકવીને બાકી જવાબદારીઓનું સમાધાન કરવાની દરખાસ્ત કરવામાં આવી હતી. જોકે, લેણદાર બેંકોએ આ પ્રસ્તાવ સ્વીકાર્યો નહોતો. સમાધાનની પ્રક્રિયા નિષ્ફળ ગયા બાદ SBIની અરજી પર ટ્રિબ્યુનલે વ્યક્તિગત નાદારી જાહેર કરવાનો આદેશ આપ્યો છે. NCLTએ નાદારી પ્રક્રિયા આગળ વધારવા માટે આશિષ નારાયણને નાદારી ટ્રસ્ટી તરીકે નિયુક્ત કર્યા છે. હવે ધૂતની અંગત સંપત્તિનું સંચાલન અને વિતરણ ટ્રસ્ટીની દેખરેખ હેઠળ કરવામાં આવશે. ટ્રસ્ટીને લેણદારો પાસેથી દાવાઓ મંગાવવા માટે જાહેર નોટિસ બહાર પાડવા અને 90 દિવસની અંદર ટ્રિબ્યુનલ સમક્ષ પ્રારંભિક અહેવાલ રજૂ કરવાનો નિર્દેશ આપવામાં આવ્યો છે.

Videoconના પૂર્વ પ્રમોટર પર કેટલું દેવું?
SBIની અરજીમાં રજૂ કરાયેલી વિગતો અનુસાર, વેણુગોપાલ ધૂતે Videocon Industries Limited (VIL) અને Videocon Telecommunications Limited (VTL)ને આપવામાં આવેલી લોન માટે વ્યક્તિગત ગેરંટી આપી હતી. 30 સપ્ટેમ્બર, 2026 સુધીમાં આ ગેરંટી હેઠળની કુલ બાકી રકમ ₹12,668.06 કરોડ હોવાનું જણાવાયું છે. આ કુલ દેવામાં રૂપી ટર્મ લોન સુવિધા હેઠળ ₹9,322.10 કરોડ, Videocon Telecommunicationsની લોન સુવિધા હેઠળ ₹1,437.76 કરોડ અને કાર્યકારી મૂડી સુવિધા હેઠળ ₹1,908.19 કરોડનો સમાવેશ થાય છે. આ રકમ ચૂકવવામાં નિષ્ફળતા બાદ SBIએ ધૂત સામે વ્યક્તિગત નાદારીની કાર્યવાહી શરૂ કરી હતી.

સાત દિવસમાં નાણાકીય વિગતો આપવાનો આદેશ
Videocon ગ્રુપની કંપનીઓના લોન ખાતાં નાણાકીય મુશ્કેલીઓ બાદ ડિફોલ્ટ થયા હતા. ત્યારબાદ જૂન 2018માં Videocon Industries સામે કોર્પોરેટ નાદારી નિરાકરણ પ્રક્રિયા શરૂ કરવામાં આવી હતી. કંપનીઓને આપવામાં આવેલી લોન માટે ધૂતે વ્યક્તિગત ગેરંટી આપી હોવાથી SBIએ તેમની સામે પણ વસૂલાતની કાર્યવાહી હાથ ધરી હતી. હવે NCLTએ ધૂતને સાત દિવસની અંદર નાદારી ટ્રસ્ટીને પોતાની નાણાકીય સ્થિતિનું સંપૂર્ણ નિવેદન આપવા આદેશ કર્યો છે. ટ્રસ્ટી તેમની સંપત્તિ, નાણાકીય જવાબદારીઓ અને લેણદારોના દાવાઓની વિગતો એકત્રિત કરશે. આ નિર્ણયથી Videocon ગ્રુપના નાણાકીય સંકટ અને બેંકોની બાકી લોન વસૂલાતનો મુદ્દો ફરી ચર્ચામાં આવ્યો છે. હવે નાદારી ટ્રસ્ટી દ્વારા હાથ ધરવામાં આવતી પ્રક્રિયા પર SBI સહિતના લેણદારોની નજર રહેશે.