અમેરિકાથી ભારત રૂપિયા મોકલવા પર લાગશે ટેક્સ, ભારતના અર્થતંત્રને થશે માઠી અસર

અમેરિકાના રાષ્ટ્રપતિ ડોનાલ્ડ ટ્રમ્પે વિદેશ મોકલાતા નાણાં પર 5% એક્સાઇઝ ડ્યુટી લગાવવાની શક્યતા વ્યક્ત કરી છે, જેને તેઓ “મુખ્ય પ્રાથમિકતા બિલ” હેઠળ અમલમાં લાવવા માંગે છે. આ પગલું ગ્રીન કાર્ડ ધારકો, H1B વિઝાધારકો, તથા અનેક NRI ભારતીયોને સીધી અસર કરશે.

આર્થિક અસર કેટલી મોટી?

વિશ્લેષકો મુજબ, NRI ભારતીયો પર દર વર્ષે અંદાજે $1.64 બિલિયનનો વધારાનો ખર્ચ થશે. ભારતની રિઝર્વ બેંક અનુસાર, 2023-24માં દેશમાં કુલ $118.7 બિલિયન રેમિટન્સ આવ્યું હતું, જેમાંથી $32.9 બિલિયન માત્ર  (અંદાજે 27.7%) અમેરિકાથી આવેલું હતું.

સામાન્ય પરિવારોએ ભોગવવાનું?

ભારે ટેક્સના કારણે જે ભારતીયો પરિવાર માટે પૈસા મોકલતા હોય તેવો વર્ગ હવે આ નિર્ણયથી વધારે મુંઝાવશે. માતાપિતા, પત્ની-બાળકો કે અન્ય નિકટજનોને મદદરૂપ થવામાં અડચણ આવી શકે છે. ખાસ કરીને નબળી આર્થિક સ્થિતિ ધરાવતા પરિવારોને આના કારણે વધારે મુશ્કેલી ઊભી થઈ શકે છે.

વિશ્વસ્તરે ભારતની સ્થિતિ

વિશ્વ બેંકના જણાવ્યા અનુસાર, 2008થી ભારત દુનિયાનું સૌથી મોટું રેમિટન્સ મેળવનાર દેશ છે. 2024માં ભારતનો વૈશ્વિક રેમિટન્સમાં હિસ્સો 14% સુધી પહોંચવાનો અંદાજ છે. આવામાં જો NRI માટે નાણાં મોકલવા વધુ ટેક્સ લાગશે તો તેનો સીધો અસર ભારતના અર્થતંત્ર અને સામાજિક બંધનો પર પડી શકે છે.