Vedanta ED Raid News: દેશના અગ્રણી ઉદ્યોગપતિ અનિલ અગ્રવાલ અને તેમના વેદાંત ગ્રુપ (Vedanta Group) સામે કેન્દ્રીય તપાસ એજન્સીએ લાલ આંખ કરી છે. ફોરેન એક્સચેન્જ મેનેજમેન્ટ એક્ટ (FEMA) એટલે કે વિદેશી હૂંડિયામણ ધારાના કથિત ઉલ્લંઘન મામલે એન્ફોર્સમેન્ટ ડિરેક્ટોરેટ (ED) દ્વારા વેદાંત ગ્રુપના વિવિધ ઠેકાણાઓ પર મોટા પાયે દરોડા પાડવામાં આવ્યા છે. સત્તાવાર વર્તુળોના જણાવ્યા અનુસાર, સોમવારથી શરૂ થયેલું આ સર્ચ ઓપરેશન મંગળવારે પણ સતત ચાલુ રહ્યું હતું. બહુરાષ્ટ્રીય ખાણકામ કંપની સામે EDની આ આકસ્મિક કાર્યવાહીથી કોર્પોરેટ જગતમાં ભારે ફફડાટ ફેલાયો છે.
ડિમર્જર યોજનાની મંજૂરીના એક જ મહિનામાં ત્રાટકી એજન્સી સૂત્રોના જણાવ્યા અનુસાર, કેન્દ્રીય એજન્સીએ કંપની સામે ફેમા (FEMA) કાયદા હેઠળ વિદેશી વ્યવહારોમાં ગેરરીતિની પ્રાથમિક તપાસ બાદ આ સર્ચ ઓપરેશન હાથ ધર્યું છે. ચોંકાવનારી બાબત એ છે કે, વેદાંત ગ્રુપને તેના સુરક્ષિત લેણદારો (Secure Creditors) તરફથી એક મોટી ડિમર્જર યોજના માટે લીલી ઝંડી મળી હતી, જેના અંતર્ગત કંપનીને પાંચ સ્વતંત્ર લિસ્ટેડ કંપનીઓમાં વિભાજીત કરવાની પ્રક્રિયા ચાલી રહી છે. આ મંજૂરી મળ્યાના માંડ એક મહિનાની અંદર જ ED ત્રાટકતા કંપનીની ભવિષ્યની વ્યાપારી વ્યૂહરચનાઓ પર મોટો આંચકો લાગી શકે છે. હાલમાં એજન્સી દ્વારા જપ્ત કરાયેલા દસ્તાવેજોની ચકાસણી ચાલી રહી છે અને કંપનીના સત્તાવાર નિવેદનની રાહ જોવાઈ રહી છે.
ફેમા (FEMA) હેઠળ કેમ લેવાયા કડક પગલાં? એન્ફોર્સમેન્ટ ડિરેક્ટોરેટ સામાન્ય રીતે ત્યારે જ 'ફેમા' અંતર્ગત કાર્યવાહી કરે છે જ્યારે કોઈ વ્યક્તિ અથવા કોર્પોરેટ સંસ્થા દ્વારા વિદેશી વિનિમય નિયમોનું ગંભીર ઉલ્લંઘન કરવામાં આવ્યું હોય. વેદાંતના કેસમાં પણ વિદેશમાં ગેરકાયદેસર રીતે મોટું ભંડોળ ટ્રાન્સફર કરવા, વિદેશી ધરતી પર નિયમોની અવગણના કરીને સંપત્તિ વસાવવા અથવા વિદેશી રોકાણના નિર્ધારિત માપદંડોનું પાલન ન કરવાના શંકાસ્પદ પુરાવા મળ્યા હોવાનું કહેવાય છે.
અકસ્માત અને કરોડોના દંડ: વેદાંતનો વિવાદો સાથે જૂનો નાતો 1976માં સ્થપાયેલું વેદાંત ગ્રુપ ભારતની અગ્રણી બહુરાષ્ટ્રીય કંપની છે જે ઝીંક, એલ્યુમિનિયમ, કોપર, આયર્ન ઓર અને ઓઇલ-ગેસ ક્ષેત્રે મોટું વર્ચસ્વ ધરાવે છે. હિન્દુસ્તાન ઝિંક અને કેઇર્ન ઇન્ડિયા જેવી મોટી કંપનીઓ તેનું સંચાલન કરે છે. જોકે, તાજેતરના મહિનાઓમાં કંપની સતત વિવાદોના ઘેરામાં રહી છે. એપ્રિલ 2026૬માં છત્તીસગઢમાં કંપનીના પાવર પ્લાન્ટમાં થયેલા ભયાનક બોઈલર વિસ્ફોટમાં 20 થી વધુ શ્રમિકોના મોત થયા હતા, જેમાં અનિલ અગ્રવાલ સહિતના ટોચના મેનેજમેન્ટ સામે FIR નોંધાઈ હતી. ગયા મહિને જ ઓડિશાના બુર્લા સિંચાઈ વિભાગે ભેડેન નદી અને નહેરમાંથી પરવાનગી વિના ગેરકાયદેસર રીતે પાણી ખેંચવા બદલ વેદાંત એલ્યુમિનિયમ પર ₹233.11 કરોડનો તોતિંગ દંડ ફટકાર્યો હતો. આ તમામ સ્થાનિક કાનૂની સંકટો વચ્ચે હવે EDના આંતરરાષ્ટ્રીય સ્તરના દરોડાએ વેદાંત ગ્રુપની મુશ્કેલીઓમાં બમણો વધારો કરી દીધો છે.

વેદાંતના અનિલ અગ્રવાલની મુશ્કેલીમાં વધારો

વિદેશી ભંડોળની હેરાફેરીના આક્ષેપ હેઠળ વેદાંત ગ્રુપ પર EDના દરોડા

June 2, 2026 | 12:19 IST