EDની કાર્યવાહી: JP ઇન્ફ્રાના MD મનોજ ગૌરની ધરપકડ!

એન્ફોર્સમેન્ટ ડિરેક્ટોરેટે (ED) મની લોન્ડરિંગના મોટા કૌભાંડમાં કાર્યવાહી કરી છે. Jaypee Infratech Limitedના મેનેજિંગ ડિરેક્ટર મનોજ ગૌરની ધરપકડ કરવામાં આવી છે. તપાસ એજન્સીએ જણાવ્યું છે કે Jaypee Associates Limited અને તેના પ્રમુખ મનોજ ગૌર ₹12,000 કરોડના નાણાકીય છેતરપિંડી અને ઘર ખરીદનારાઓના ભંડોળના ગેરઉપયોગમાં સંકળાયેલા છે.

ED દ્વારા મે-2025થી શરૂ કરાયેલી તપાસ દરમિયાન દિલ્હી અને મુંબઈ સહિત 15 સ્થળોએ દરોડા પાડવામાં આવ્યા હતા. 23 મે 2025ના રોજ હાથ ધરાયેલી આ કાર્યવાહીમાં EDએ ₹1.70 કરોડ રોકડ, મહત્વપૂર્ણ દસ્તાવેજો, ડિજિટલ ઉપકરણો અને બેંક રેકોર્ડ જપ્ત કર્યા હતા.

સૂત્રો મુજબ, Jaypee Infratechએ પોતાના પ્રોજેક્ટ માટે ઘર ખરીદનારાઓ પાસેથી એકત્રિત કરેલ નાણાં અન્ય પ્રોજેક્ટમાં વાપર્યા હતા, જેના કારણે અનેક ખરીદદારો અને રોકાણકારોને ભારે નુકસાન થયું હતું.

2017માં પણ Jaypee Infratech Limited સામે અનેક FIR દાખલ થઈ હતી, જેમાં ઘર ખરીદનારોએ બિલ્ડર પર નાણાકીય છેતરપિંડીના આક્ષેપ લગાવ્યા હતા. ED હવે કંપનીના નાણાંના ટ્રાન્સફર અને તેની સહાયક કંપનીઓની ભૂમિકા અંગે વિગતવાર તપાસ કરી રહી છે.