ઊંઝા માર્કેટયાર્ડના વેપારીઓએ શા માટે ખરીદ-વેચાણ બંધ કરવાનો નિર્ણય લીધો?

ઊંઝા માર્કેટયાર્ડમાં વેપારીઓએ જણસીની ખરીદી કે વેચાણ નહી કરવાનો નિર્ણય કર્યો છે. જેના કારણે જિલ્લા સહકારી રજિસ્ટ્રાર કચેરીમાં દોડધામ મચી ગઈ છે. ડિસેમ્બર-2024માં ઊંઝા માર્કેટયાર્ડની ચૂંટણી પૂર્ણ થઈ ગઈ હોવા છતાં ચૂંટાયેલા પ્રતિનિધિઓને વહીવટ સોંપવામાં આવ્યો નથી. જ્યારે માર્કેટયાર્ડના વહીવટદાર સપ્તાહમાં માત્ર અડધો કલાક આવતા હોવાથી વેપારીઓ અને ખેડૂતોને અનેક તકલીફો પડી રહી છે. વહીવટદાર શાસન હટાવીને ચૂંટાયેલા પ્રતિનિધિઓને વહીવટ સોંપવાની માગ સાથે વેપારીઓએ જણસી ખરીદ-વેચાણ બંધ કરવાનો નિર્ણય કર્યો છે. 

ઊંઝા માર્કેટયાર્ડમાં હાલ જીરૂ, વરિયાળી અને ઈસબગોલની આવક શરૂ થઈ છે. ઊંઝા માર્કેટયાર્ડમાં જીરૂની 30 હજાર, ઈસબગોલની 25 હજાર અને વરીયાળીની 12 થી 15 હજાર બોરીની આવક થઈ રહી છે. તેવા સમયે વહીવટદાર શાસન સામે વિરોધ કરી જણસીનું ખરીદ-વેચાણ માર્કેટયાર્ડના વેપારીઓએ નિર્ણય કર્યો છે. વેપારીઓની સમસ્યાઓનો ઉકેલ ન આવે ત્યાં સુધી ગંજબજાર બંધ રાખવાનો નિર્ણય કર્યો હોવાનું ડિરેક્ટર નરેન્દ્ર પટેલે જણાવ્યું છે.  

નરેન્દ્ર પટેલે જણાવ્યુ કે, ઊંઝા માર્કેટયાર્ડની ચૂંટણી ડિસેમ્બર-2024માં પૂર્ણ થઈ ગઈ છે. તેમ છતાં હજુ સુધી ચેરમેન-વાઈસ ચેરમેનની ચૂંટણી નહી આપીને ચૂંટાયેલા પ્રતિનિધિઓને સત્તા સોંપી નથી. જ્યારે વહીવટદાર સપ્તાહમાં માત્ર અડધો કલાક આવે છે. ચૂંટાયેલા પ્રતિનિધિઓના નિયામક મંડળને સત્તા નહી સોંપાતા ખેડૂતો અને વેપારીઓને પડતી મુશ્કેલીઓ બાબતે ક્યા રજૂઆત કરવી તે સમસ્યા વધી રહી છે. તેથી ચૂંટાયેલા પ્રતિનિધિઓના બોર્ડને સત્તા નહી આપવામાં આવે ત્યાં સુધી ખરીદ વેચાણ બંધ રાખવાનો નિર્ણય કર્યો છે.

ઊંઝા માર્કેટયાર્ડમાં વહીવટદારનું શાસન હોવાથી સમસ્યાઓ મુદ્દે વહીવટદાર અને વેપારીઓ આમને સામને હોય તેવો ઘાટ સર્જાયો છે. વેપારીઓની સમસ્યાઓનો ઉકેલ ન આવે ત્યાં સુધી માર્કેટયાર્ડ બંધ રાખવાનો નિર્ણય વેપારીઓએ સ્વયંભૂ લીધો હોવાનું બેનિફિટ ન્યૂઝ સાથેની વાતચીત દરમિયાન નરેન્દ્ર પટેલે ઉમેર્યુ હતુ. વેપારી પ્રતિનિધિ નરેન્દ્ર પટેલ પૂર્વ ચેરમેન અને ધારાસભ્ય નારાયણ પટેલના ભત્રીજા થાય છે. માર્કેટયાર્ડની ચૂંટણીમાં વેપારી પ્રતિનિધિ તરીકે સૌથી વધારે લીડથી નરેન્દ્ર પટેલ જીત્યા હતા.

ઊંઝા વેપારી મહામંડળના પિયુષ પટેલે જણાવ્યુ કે, વહીવટદાર શાસનના કારણે વધી રહેલી સમસ્યાઓને લઈ વેપારીઓએ વિરોધ કરતાં વહીવટદારે બુધવારે 3 વાગે બેઠકનું આયોજન કર્યુ છે. આ બેઠકમાં વેપારીઓની સમસ્યાનું નિરાકરણ નહી આવે તો સામુહિક રીતે નિર્ણય લેવામાં આવશે. હાલમાં તમામ જણસીની હરાજી ચાલુ છે. ગંજબજારમાં ખરીદ-વેચાણ હજુ સુધી બંધ કરવામાં આવ્યુ નથી.