IFFCOના NPK ખાતરના ભાવમાં 6 મહિનામાં ફરી વધારો!

ગુજરાતનો ખેડૂત કુદરતી આફતો સામે ઝઝૂમીને ખેતી કરી રહ્યો છે. કૃષિ પાકના પોષણક્ષમ ભાવની સામે પડતર ખર્ચ વધી રહ્યો છે. ત્યારે ખેડૂતો ઉપર મોટો બોજો ઝીંકાયો છે. ઈક્ફોએ ખાતરના ભાવમાં 6 મહિનામાં બીજી વખત ભાવ વધારો ઝીંક્યો છે. 

ઈફકોએ NPK ખાતરની એક થેલી પર રૂપિયા 130 નો વધારો કર્યો છે. એક થેલીનો ભાવ 1720 રૂપિયાથી વધારીને 1850 કરાયો છે. ખાતરના ભાવમાં વધારો થતાં ખેડૂતોને તેની સીધી અસર થવાની સંભાવનાએ રોષ જોવા મળ્યો છે.  

દેશની સહકારી સંસ્થા ઈફ્કોએ ખાતરના ભાવમાં તોતિંગ વધારો કર્યો છે. જાન્યુઆરી મહિનામાં ઈફ્કોએ NPK ખાતરમાં ભાવ વધારો કર્યો હતો. તેના છ મહિના બાદ ફરીથી ખાતરના ભાવ વધારી દેવાયા છે. ઈફકોએ NPK ખાતરમાં પ્રતિ થેલીએ 130 રૂપિયાનો વધારો કર્યો છે.

ઈફકોના NPK ખાતરની 50 કિલોની એક થેલી અગાઉ રૂપિયા 1720 માં મળતી હતી. તેમાં રૂપિયા 130નો વધારો ઝીંકાતા હવેથી રૂપિયા 1850 માં મળશે. NPK ખાતરના ભાવમાં વધારો થતાં ખેડૂતોને સીધી અસર થશે.

ગુજરાતના ખેડૂતોએ ખાતરના ભાવ વધારા બાબતે વિરોધ કર્યો છે. ખેડૂતોએ ખાતરમાં સબસીડી આપીને ભાવ વધારો રોકવા માટે રજૂઆત કરી છે. યુરિયાની જેમ NPK ખાતરમાં પણ સબસીડી આપવા માંગ કરી છે. ખેડૂતોએ આક્રોશ વ્યક્ત કરતા કહ્યું કે, ભાવ વધારો ખેડૂતો માટે આત્મઘાતી નિવડશે. ખરીફ પાકમાં હાલ ખાતરની જરૂરીયાત છે તેવા સમયે સરકારે ખેડૂતોને ઝટકો આપ્યો છે.

આ ભાવ વધારાથી ખેડૂતોનો કૃષિમાં પડતર ખર્ચ વધી જશે. એકતરફ કૃષિ પાકોના પોષણક્ષણ ભાવ મળતાં નહી હોવાથી ખેડૂતોને નજીવા ભાવે વેચાણ કરવા પડે છે. તેવા સમયે કૃષિ પાકોની પડતર વધી જતાં છેવટે ખેડૂતો દેવાદાર બનશે.

ઈફ્કો (ઇન્ડિયન ફાર્મસ ફર્ટિલાઇઝર કો-ઓપરેટીવ લિમિટેડ) દ્વારા જાન્યુઆરી મહિનામાં NPK ખાતરમાં ભાવમાં વધારો કરાયો હતો. જે તે સમયે NPK ખાતરની 50 કિલોની થેલી 1470 રૂપિયામાં મળતી હતી. તેમાં રૂપિયા 250નો વધારો કરીને 1720 રૂપિયા કરી દેવાયો હતો. 6 મહિનામાં નવો ભાવવધારો લાગુ થતાં ખેડૂતો માટે ખેતીમાં નવો બોજો વધ્યો છે.