મોબાઈલ કે વાયફાઈ: કયું રેડિએશન વધુ ખતરનાક?

વાઈફાઈ અને મોબાઈલ રેડિએશન બંનેની તુલના કરવી રસપ્રદ છે. કારણ કે બંનેના રેડિએશન અંગે ઘણી ગેર માન્યતાઓ પ્રવર્તે છે. વૈજ્ઞાનિક દૃષ્ટિએ, બંનેમાંથી કયું વધુ ખતરનાક છે તે સમજવું જરૂરી છે.

વાઈફાઈ અને મોબાઈલ રેડિએશનની તુલના

વાઈફાઈ અને મોબાઈલ ફોન બંને બિન-આયોનાઇઝિંગ રેડિયેશન (non-ionizing radiation) નો ઉપયોગ કરે છે. જેનો અર્થ એ થાય કે તેમાં તેટલી ઊર્જા નથી કે તે DNA ને સીધું નુકસાન પહોંચાડી શકે. જો કે, તેમની શક્તિ અને સંપર્કના સમયમાં ઘણો મોટો તફાવત છે:

મોબાઈલ ફોન

આપણે જ્યારે ફોન પર વાત કરીએ છીએ, ત્યારે તે આપણા કાન અને માથાની ખૂબ નજીક હોય છે. ફોન ટાવરથી સિગ્નલ મેળવવા માટે વધુ શક્તિનો ઉપયોગ કરે છે. ખાસ કરીને જ્યારે સિગ્નલ નબળું હોય ત્યારે સિગ્નલ આપણા શરીરના નજીકના ભાગો દ્વારા સીધા શોષાઈ શકે છે.

વાઈફાઈ રાઉટર

વાઈફાઈ રાઉટર સામાન્ય રીતે આપણાથી થોડા અંતરે મૂકવામાં આવે છે. મોબાઈલ ફોન કરતાં તેની રેડિએશનની શક્તિ ખૂબ ઓછી હોય છે. જેમ જેમ તમે રાઉટરથી દૂર જાઓ તેમ રેડિએશનની શક્તિ ઝડપથી ઘટી જાય છે.

કયું વધુ ખતરનાક?

સામાન્ય રીતે મોબાઈલ ફોનનું રેડિએશન વાઈફાઈ કરતાં વધુ ખતરનાક માનવામાં આવે છે. તેના  મુખ્ય કારણો આ મુજબ છે:

નજીકનો સંપર્ક: આપણે મોબાઈલ ફોનને કલાકો સુધી આપણા કાન, માથા અથવા ખિસ્સામાં શરીરની ખૂબ નજીક રાખીએ છીએ, જેના કારણે રેડિએશનનો સીધો સંપર્ક થાય છે.

ઊંચી શક્તિ: મોબાઈલ ફોન ખાસ કરીને જ્યારે સિગ્નલ નબળું હોય ત્યારે ટાવર સાથે જોડાવા માટે વધુ શક્તિનો ઉપયોગ કરે છે. તેનાથી રેડિએશનનું પ્રમાણ વધી જાય છે.

વર્લ્ડ હેલ્થ ઓર્ગેનાઈઝેશન (WHO) અને અન્ય સંસ્થાઓના અભ્યાસ દર્શાવે છે કે, હાલના વૈજ્ઞાનિક પુરાવાઓ મુજબ બંને પ્રકારના રેડિયેશનથી આરોગ્ય પર કોઈ ગંભીર અસર થતી નથી. જ્યાં સુધી તેનો ઉપયોગ નિર્ધારિત માર્ગદર્શિકા મુજબ કરવામાં આવે.

તેમ છતાં મોબાઈલ ફોન કે વાઈફાઈના ઉપયોગની સાવચેતી રાખવી હંમેશા સારી છે. તમે મોબાઈલ ફોનનો ઉપયોગ કરતી વખતે હેડફોન અથવા સ્પીકરનો ઉપયોગ કરીને માથાથી દૂર રાખી શકો છો. વાઈફાઈ રાઉટરને રાત્રે બંધ કરી દેવું અથવા તેને બેડરૂમથી દૂર રાખવું પણ હિતાવહ છે.