સાર્વજનિક ચાર્જિંગ સ્ટેશન પર ફોન ચાર્જ કરતા સાવધાન

Juice Jacking Scam: આજના ડિજિટલ યુગમાં મોટાભાગના લોકો મુસાફરી કરતી વખતે પોતાના સ્માર્ટફોનને ચાર્જ કરવા માટે પાવર બેંક, ઓરિજિનલ ચાર્જર કે કેબલ સાથે રાખવાનું ટાળે છે. આ આદતના કારણે તેમને એરપોર્ટ, રેલ્વે સ્ટેશન, બસ સ્ટેન્ડ અથવા અન્ય જાહેર સ્થળોએ ઉપલબ્ધ મફત યુએસબી ચાર્જિંગ સ્ટેશનનો ઉપયોગ કરવો પડે છે. જો કે, અજાણ્યા ચાર્જિંગ પોઈન્ટ પર ફોન ચાર્જ કરવાની આ એક નાની ભૂલ તમારા આખી જિંદગીની કમાણી મિનિટોમાં સાફ કરી શકે છે. સાયબર ગુનેગારો દ્વારા આચરવામાં આવતું 'જ્યુસ જેકિંગ' નામનું આ કૌભાંડ ભલે વર્ષો જૂનું હોય, પરંતુ આજે પણ તે લોકોના બેંક ખાતા ખાલી કરવા માટે હેકર્સનું સૌથી મોટું હથિયાર સાબિત થઈ રહ્યું છે.

કેવી રીતે કામ કરે છે 'જ્યુસ જેકિંગ' કૌભાંડ?
જ્યારે કોઈ મુસાફર એરપોર્ટ, ટ્રેન સ્ટેશન, હોટેલ કે કાફે જેવા સાર્વજનિક સ્થળોએ મફત ચાર્જિંગ પોર્ટ જુએ છે, ત્યારે તે કોઈપણ જાતના ડર વિના પોતાનો ફોન પ્લગ ઇન કરી દે છે. હેકર્સ લોકોના આ જ વિશ્વાસનો ખોટો લાભ ઉઠાવે છે અને આવા જાહેર યુએસબી પોર્ટ્સમાં અગાઉથી જ હેકિંગ ઉપકરણો અથવા માલવેર ફીટ કરી દે છે. આપણો ચાર્જિંગ કેબલ માત્ર બેટરી ચાર્જ કરવાનું જ નહીં, પરંતુ ડેટા ટ્રાન્સફર કરવાનું પણ કામ કરે છે. તેથી, ફોન પ્લગ થતાંની સાથે જ હેકર્સ સ્માર્ટફોનમાંથી બેંકિંગ વિગતો, પાસવર્ડ અને અન્ય ખાનગી માહિતી ચોરી લે છે અથવા ફોનમાં વાયરસ મોકલી આપે છે.

ડેટા ચોરી અને બ્લેકમેલિંગનું મોટું જોખમ
આ પ્રકારના સાયબર કૌભાંડમાં માત્ર બેંક ખાતામાંથી પૈસા ગાયબ થવા એટલી જ સીમિત સમસ્યા નથી હોતી. હેકર્સ રિમોટલી એટલે કે દૂર બેઠા જ તમારા સ્માર્ટફોનનો તમામ ડેટા પોતાના કમ્પ્યુટરમાં ટ્રાન્સફર કરી શકે છે. આ પ્રક્રિયા દરમિયાન સામાન્ય લોકોના અંગત ફોટા, વીડિયો અને ખાનગી ચેટ્સ પણ લીક થઈ જાય છે, જેનો ઉપયોગ આગળ જતાં બ્લેકમેલિંગ માટે થઈ શકે છે. જો સાર્વજનિક ચાર્જિંગ સ્ટેશનમાં ફોન જોડ્યા પછી સ્ક્રીન પર "ટ્રસ્ટ આઉટ ડિવાઇસ" અથવા ડેટા એક્સેસ માટેની કોઈ પરવાનગી માગતો પોપ-અપ દેખાય, તો તરત જ સાવધ થઈ જવું જોઈએ અને કોઈ પણ પરવાનગી આપ્યા વિના કેબલ કાઢી લેવો જોઈએ.

સાયબર ઠગોથી બચવા માટે આટલી સાવચેતી જરૂરી
જો તમે મુસાફરી દરમિયાન તમારા સ્માર્ટફોન અને કમાણી બંનેને સુરક્ષિત રાખવા માંગો છો, તો હંમેશા પોતાની પાસે પર્સનલ ચાર્જર અને કેબલ રાખવાનો આગ્રહ રાખો. પાવર આઉટલેટ એટલે કે સામાન્ય દિવાલના સોકેટમાંથી સીધું ચાર્જિંગ કરવું 100 ટકા સુરક્ષિત માનવામાં આવે છે. આ સિવાય, મુસાફરી પર નીકળતા પહેલા પોતાની પાવર બેંકને પૂરેપૂરી ચાર્જ કરીને સાથે રાખવી જોઈએ જેથી જાહેર સ્ટેશનો પર નિર્ભર ન રહેવું પડે. બજારમાં ખાસ પ્રકારના પ્રાઇવસી કેબલ અથવા ડેટા બ્લોકર પણ મળે છે, જે ડેટા ટ્રાન્સફર અટકાવીને માત્ર ચાર્જિંગ થવા દે છે, તેનો ઉપયોગ પણ આજના સમયમાં સુરક્ષા માટે ઉત્તમ સાબિત થઈ શકે છે.