Health in ChatGPT: હોસ્પિટલના જટિલ રિપોર્ટ્સ, પ્રિસ્ક્રિપ્શન્સ, લેબ વેલ્યુઝ અને તબીબી પરિભાષાઓ સામાન્ય માણસ માટે સમજવી એ માઉન્ટ એવરેસ્ટ ચઢવા જેવું મુશ્કેલ કામ રહ્યું છે. મોટાભાગના લોકો આવી સ્થિતિમાં ગૂગલ પર સર્ચ કરે છે, જ્યાં ડઝનબંધ વેબસાઇટ્સ અલગ-અલગ જવાબો આપીને મૂંઝવણ ઘટાડવાને બદલે વધારી દે છે. દેશ અને દુનિયાની અડધાથી વધુ વસ્તી આ સમસ્યાથી પીડાઈ રહી છે. આ વૈશ્વિક સમસ્યાનો ઉકેલ લાવવા માટે ટેકનોલોજી ક્ષેત્રની અગ્રણી કંપની OpenAI એ &lsquo;Health in ChatGPT&rsquo; નામની નવી સુવિધા લોન્ચ કરી છે, જે યુઝર્સની સ્વાસ્થ્ય સંબંધિત માહિતીને સમજવાનું અને તેનું સંચાલન કરવાનું અત્યંત સરળ બનાવી દેશે.
સીધા મેડિકલ રેકોર્ડ્સ અને એપલ હેલ્થ સાથે કનેક્ટ થશે ChatGPT OpenAI ના આ નવા ફીચરની મદદથી યુઝર્સ પોતાના મેડિકલ રિપોર્ટ્સ, હોસ્પિટલ ડિસ્ચાર્જ સમરી, પ્રોસેસ્ડ લેબ રેકોર્ડ્સ અને Apple Health ડેટાને સીધા ChatGPT સાથે લિંક કરી શકશે. અત્યાર સુધી યુઝર્સને જ્યારે પણ કોઈ રિપોર્ટ સમજવો હોય ત્યારે તેની PDF અથવા ફોટો વારંવાર અપલોડ કરવો પડતો હતો. પરંતુ એકવાર આ હેલ્થ ફીચરમાં મેડિકલ રેકોર્ડ્સ ઉમેરાઈ ગયા પછી, AI સિસ્ટમ તે ડેટાનો ઉપયોગ કરીને પૂછવામાં આવેલા પ્રશ્નોના જવાબો સરળ અને સ્પષ્ટ ભાષામાં આપશે.
બ્લડ ટેસ્ટની સરખામણી અને એપલ વોચ ડેટાનું એનાલિસિસ આ સુવિધા અનેક રીતે ઉપયોગી સાબિત થશે. ઉદાહરણ તરીકે, જો કોઈ દર્દી નવો બ્લડ ટેસ્ટ કરાવે છે, તો ChatGPT તેની સરખામણી જૂના રિપોર્ટ સાથે કરીને શરીરમાં શું બદલાવ આવ્યો છે તે દર્શાવશે. ડૉક્ટર દ્વારા લખાયેલી જટિલ મેડિકલ નોટ્સને પણ તે સરળ શબ્દોમાં સમજાવશે અને ડૉક્ટર પાસે જતાં પહેલાં કયા પ્રશ્નો પૂછવા તેનું લિસ્ટ પણ તૈયાર કરી આપશે. આ ઉપરાંત, જો યુઝર Apple Watch અથવા iPhone વાપરે છે, તો ChatGPT તેમની ઊંઘ, શારીરિક હલનચલન, કસરત અને અન્ય ફિટનેસ એપ્લિકેશન્સમાંથી મળતા પોષણના ડેટાને પણ ટ્રેક કરી શકશે.
અમેરિકામાં 18 વર્ષથી ઉપરના યુઝર્સ માટે શરૂઆતી લોન્ચ હાલમાં આ નવું ફીચર માત્ર યુનાઇટેડ સ્ટેટ્સ (US) માં 18 વર્ષ કે તેથી વધુ ઉંમરના યુઝર્સ માટે જ ઉપલબ્ધ કરાવવામાં આવ્યું છે. વિશ્વભરની આરોગ્યસંભાળ પ્રણાલીઓમાં માળખાકીય, તકનીકી અને નિયમનકારી તફાવતો હોવાને કારણે તેનું ટેસ્ટિંગ હાલ પૂરતું યુએસ માર્કેટ પૂરતું સીમિત રાખવામાં આવ્યું છે. આ ફીચર વેબ અને iPhone બંને પ્લેટફોર્મ પર કામ કરશે. કંપનીએ સ્પષ્ટ કર્યું છે કે આ સુવિધા ChatGPT ના Free, Go, Plus અને Pro તમામ પ્લાન ધરાવતા યુઝર્સ માટે ફ્રીમાં ઉપલબ્ધ રહેશે.
દર અઠવાડિયે 300,000,000 લોકો પૂછે છે સ્વાસ્થ્ય સંબંધિત પ્રશ્નો OpenAI ના આંકડા અનુસાર, વિશ્વભરમાં આશરે 300,000,000 લોકો દર અઠવાડિયે પ્લેટફોર્મ પર સ્વાસ્થ્ય અને સુખાકારીને લગતા પ્રશ્નો પૂછે છે. પ્રારંભિક પરીક્ષણમાં સામે આવ્યું છે કે સામાન્ય ચેટ દરમિયાન 70% સ્વાસ્થ્ય સંબંધિત પ્રશ્નો આપમેળે સ્ક્રીન પર દેખાય છે. નવી સિસ્ટમ મુખ્ય ચેટ વિન્ડોમાં જ સંકલિત હોવાથી યુઝર્સને અન્ય કોઈ અલગ એપ્લિકેશન કે થર્ડ-પાર્ટી ટેબ ખોલવાની જરૂર પડશે નહીં.
ગૂગલ સર્ચ કરતાં કઈ રીતે અલગ છે આ સુવિધા? સામાન્ય રીતે લોકો તબીબી સમસ્યાઓ માટે ગૂગલ પર સર્ચ કરે છે, જ્યાં અસંખ્ય વેબસાઇટ્સ સ્પષ્ટ જવાબ આપવાને બદલે વધારે ગૂંચવાડો ઊભો કરે છે. તેનાથી વિપરીત, ChatGPT યુઝરના કનેક્ટેડ પર્સનલ હેલ્થ ડેટાના આધારે વિશિષ્ટ અને ચોક્કસ પ્રશ્નોના સંવાદાત્મક જવાબો પૂરા પાડે છે, જેનાથી વ્યક્તિગત સ્વાસ્થ્યની સ્થિતિ સરળતાથી સમજી શકાય છે.
પ્રાઇવસી અને ડેટા સિક્યોરિટી અંગે OpenAI નો મોટો દાવો મેડિકલ ડેટા અત્યંત સંવેદનશીલ હોવાથી પ્રાઇવસી અંગે લોકોમાં ચિંતા હોવી સ્વાભાવિક છે. OpenAI એ દાવો કર્યો છે કે યુઝર્સના મેડિકલ રેકોર્ડ્સ અને Apple Health ડેટાને સંપૂર્ણપણે અલગ અને ઉચ્ચ કક્ષાની સુરક્ષા સાથે સ્ટોર કરવામાં આવશે. આ ડેટાનો ઉપયોગ ChatGPT ના AI મોડેલ્સને ટ્રેઇન કરવા કે જાહેરાતો બતાવવા માટે કરવામાં આવશે નહીં. ઉપરાંત, યુઝર્સ પોતે નક્કી કરી શકશે કે ChatGPT તેમની સ્વાસ્થ્ય માહિતીનો ઉપયોગ ક્યારે અને કઈ ચેટમાં કરી શકે છે.
શું AI ડૉક્ટરનું સ્થાન લેશે? કંપનીએ કરી સ્પષ્ટતા યુ.એસ.માં તાજેતરમાં એક યુઝરે આક્ષેપ કર્યો હતો કે ChatGPT ની તબીબી સલાહ પર નિર્ભર રહેવાને કારણે તેની સમયસર સારવાર થઈ શકી નહોતી. આ ઘટના બાદ OpenAI એ સ્પષ્ટતા કરી છે કે આ સુવિધા કોઈ પણ સંજોગોમાં ડૉક્ટર કે મેડિકલ પ્રોફેશનલનો વિકલ્પ નથી. હાલમાં તે ડૉક્ટરોનું સ્થાન લઈ શકે તેમ નથી. તેનો હેતુ માત્ર લોકોને તેમની તબીબી માહિતી સમજવામાં મદદ કરવાનો છે. રોગની સારવાર અથવા સ્વાસ્થ્ય સંબંધી કોઈ પણ આખરી નિર્ણય હંમેશા ક્વોલિફાઇડ ડૉક્ટરની સલાહ લઈને જ લેવો જોઈએ.

ડૉક્ટર પાસે જતાં પહેલાં રિપોર્ટ્સનું પિનપોઇન્ટ એનાલિસિસ કરી આપશે AI!

July 24, 2026 | 16:12 IST