એન્જિનીયર્સને કારકિર્દી ઘડવા માટે મેન્ટર કરવા માટે અમદાવાદમાં ખાસ કાર્યક્રમનું આયોજન

શહેરની સોસાયટી ઓફ પાવર એન્જિનીયર્સ (ઇન્ડીયા) અમદાવાદ ચેપ્ટર દ્વારા મેન્ટરશીપનો એક કાર્યક્રમ આગામી 7 ફેબ્રુઆરીએ યોજવામાં આવ્યો છે. આ કાર્યક્રમ બપોરે 1 વાગે એલ.ડી.કોલેજના ઇલેકટ્રીકલ ડિપાર્ટમેન્ટમાં યોજાશે. 

શહેરની સોસાયટી ઓફ પાવર એન્જિનીયર્સ (ઇન્ડીયા) અમદાવાદ ચેપ્ટર નવેમ્બર 2019માં દિલ્હી અને વડોદરા ચેપ્ટરના સહયોગથી ઉભી થયેલ એન્જિનીયરોનો સમૂહ છે જેમાં 300થી વધુ એન્જિનીયર સભ્યો છે.,જે એન્જિનીયર પાવર ક્ષેત્રે પોતાની કારકિર્દી ઘડવા માગતો હોય પણ તે સિવિલ, મિકેનિકલ, ઇલેકટ્રીકલ કે ઇલેકટ્રોનિક્સ અને કોમ્પ્યુટર એન્જિનયરીંગ ભણ્યો હોય તો મેમ્બર બની શકે છે.આ સમૂહના એક્ઝિક્યુટીવ કમિટીના સભ્યો અનુભવ ધરાવે છે અને તે પાવર જનરેશનથી લઇને પાવર બચત અને રીન્યુએબલ પાવર જેવા અલગ અલગ વિષયના તજજ્ઞો છે. આ મેન્ટરશીપનો કાર્યક્રમ યોજતા પહેલા સભ્યોએ ચિંતન કર્યું હતું અને તેમણે કેટલાક તારણો આજના વિદ્યાર્થીઓ માટે તૈયાર કરાયેલા હતા. જેમાં વિદ્યાર્થિની વિચારસરણી અને ઇન્ડસ્ટ્રીઝની કાર્યપદ્ધતીમાં ઘણો તફાવત છે. વિદ્યાર્થીને પોતાના કોલેજના અભ્યાસ દરમિયાન કઇ ઇન્ડસ્ટ્રીઝમાં કારકિર્દી બની શકે અને ઇન્ડસ્ટ્રીઝમાં કેટલા ખાતા અને વિભાગો હોય છે તેની જાણકારી મળતી નથી અને દરેક વિભાગનું શું કામ હોય છે તે જાણતો હોતો નથી.

ઉપરાંત વિદ્યાર્થી કોલેજકાળમાં તેજસ્વી હોય છે પણ જ્યારે પોતાના વિચારો કોઇ તજજ્ઞ પાસે રજૂ કરવાના હોય ત્યારે ખુબ મૂંઝવણ અનુભવે છે તથા કોલેજ છોડ્યા પછી વ્યાવસાયીક કારકિર્દીના ઘડતરમાં પોતાની પાસે ક્યા પ્રકારની સ્કિલ્સ હોવી જોઇએ કે ઇન્ડસ્ટ્રીઝની પ્રગતિ સાથે પોતાની પ્રગતિ કઇ રીતે થાય તેની જાણકારી હોતી નથી. ઘણી કંપનીઓ વિદ્યાર્થીઓને ઇન્ટરવ્યું માટે બોલાવે ત્યારે જ ચોક્કસ હોદ્દાની જાણકારી પોતાની જાહેરાતમાં કે ઇન્ટરવ્યું કોલમાં આપી દે છે પણ વિદ્યાર્થી તે શબ્દ કે હોદ્દાને સમજી શકતો નથી જેથી વિદ્યાર્થી વ્યાવસાયીક કાર્કિર્દીમાં થોડા વખતમાંજ હતાશા અનુભવે છે.

આવા ઘણા મુદ્દા પર વિદ્યાર્થીઓને કાર્કિર્દી પહેલા મેન્ટોર કરવા માટે આ કાર્યક્રમ યોજવામાં આવી રહ્યો છે. સોસાયટી ઓફ પાવર એન્જિનીયર આવા ઘણા કાર્યક્રમો ઇન્ડસ્ટ્રીઝ માટે સેફ્ટીથી લઇને ઊર્જા બચત જેવા ઘણા વિષયો પર યોજાતા રહેશે તેમ માનદ મંત્રી નિખીલ શાહે જણાવ્યું છે.