અમદાવાદ જિલ્લા ભાજપ યુવા મોરચાના સંયોજકને લેટર લખવું ભારે પડ્યું!

અમદાવાદ જિલ્લા ભાજપ યુવા મોરચાના સંયોજક જીજ્ઞેશ પંડ્યાને લેટર લખવો ભારે પડ્યો છે. ગુરૂવારે મોડી સાંજે રજોડા પાસે ત્રણ બુકાનીધારી શખ્સોએ જીજ્ઞેશ પંડ્યા પર તિક્ષ્ણ હથિયારોથી જીવલેણ હુમલો કરતાં સારવાર માટે હોસ્પિટલમાં ખસેડાયા છે. જીજ્ઞેશ પંડ્યાએ બાવળા શહેરની અવગણના કરવામાં આવતી હોવાનો આરોપ મૂકતો કેન્દ્રીય ગૃહમંત્રી અમિત શાહને પત્ર લખી પોતાનો બળાપો ઠાલવ્યો હતો.  આ પત્રમાં તેમણે ધારાસભ્ય કનુ પટેલ સાણંદનું ધ્યાન રાખીને બાવળાની અવગણના કરતાં હોવાથી બાવળા નગરપાલિકાના બદલે હવે ‘નરકપાલિકા’ બની ગયાનો રોષ વ્યક્ત કર્યો હતો.

ગુરૂવારે મોડી સાંજે હુમલો થયા બાદ જીજ્ઞેશ પંડ્યાને સરકારી હોસ્પિટલમાં દાખલ કરાયા હતા. જ્યાં પ્રાથમિક સારવાર લીધા બાદ ખાનગી હોસ્પિટલમાં ખસેડાયા છે. તમને જણાવી દઈએ કે અમદાવાદ જિલ્લા ભાજપ યુવા મોરચાના સંયોજક જીજ્ઞેશ પંડ્યાએ કેન્દ્રીય ગૃહમંત્રી અમિત શાહને પત્ર લખી બાવળા નગરપાલિકાના ભ્રષ્ટાચારનો ખુલાસો કરી સાણંદના ભાજપના ધારાસભ્ય કનુ પટેલ ઉપર ગંભીર આક્ષેપો કર્યા હતા. જીજ્ઞેશ પંડ્યાએ લખેલો પત્ર સોશિયલ મીડિયામાં વાયરલ થતાં મામલો  ચર્ચાસ્પદ બન્યો હતો.  

જીજ્ઞેશ પંડ્યાએ 4 પાનાનો પત્ર લખી 10 વર્ષથી બાવળામાં અટકી ગયેલા વિકાસ, નગરપાલિકામાં થયેલાં કોંગ્રેસીકરણ અને તેના કારણે નાગરિકોને ભોગવવા પડી રહેલા પરિણામ બાબતે જણાવ્યું હતું. બાવળા નગરપાલિકા "નરકપાલિકા" બની ગઈ હોવાનો આરોપ મૂકી રોડ-રસ્તા, પાણી અને વીજળી જેવી મૂળભૂત સુવિધાઓનો અભાવ હોવાનો ઉલ્લેખ કર્યો હતો.  

બાવળા નગરપાલિકામાં ટેન્ડરોમાં 40 થી 50 ટકા કમિશન લેવાતું હોવાનો, સ્થાનિક નેતાઓ ગૃહમંત્રીના નામનો દુરુપયોગ કરી "રબર સ્ટેમ્પ" પ્રમુખોની નિમણૂક કરાતો હોવાનો તેમજ પાયાના કાર્યકરો અને જનતાની રજૂઆતોને દબાવી દેવામાં આવતી હોવાના ગંભીર આક્ષેપો કર્યા હતા.  

બાવળા શહેરની સ્થિતિમાં સુધારો લાવવા માટે જીજ્ઞેશ પંડ્યાએ અમિત શાહને બાવળાના વોર્ડ નંબર 1 થી 7 માં રોડ-શો, બાઈક રેલી અથવા પદયાત્રા કરવા વિનંતી કરી હતી. લોકોની સમસ્યાઓનું નિરાકરણ આવે અને ભ્રષ્ટાચાર અટકે એ હેતુથી પત્ર લખવામાં આવ્યો હોવાનો તેમણે દાવો કર્યો હતો.  

સાણંદના ભાજપના ધારાસભ્ય કનુ પટેલ સામે બાવળાની અવગણના કરાતી હોવાનો આક્ષેપ કરી પાંચ વર્ષથી ફરિયાદ કરવા છતાં કોઈ નિરાકરણ નહી આવતાં અમિત શાહને રજૂઆત કરવી પડી હોવાનો ઉલ્લેખ કર્યો હતો. ચંદ્રકાંત પટેલ, કનુ પટેલ અને અન્ય સ્થાનિક નેતાઓને લેખિત તેમજ મૌખિક ફરિયાદ કરવા છતાં નિરાકરણ નહી આવતું હોવાનો બળાપો ઠાલવ્યો હતો. વડાપ્રધાન અને ગૃહમંત્રીને બાવળા વિસ્તારના પૂરો સાથ સહકાર આપી માત્ર સ્થાનિક નેતાઓ અને હોદ્દેદારો સામે વિરોધ હોવાનું જણાવ્યું હતું.