ચૈતર વસાવાનું MLA પદ જોખમમાં, 7 વર્ષ કેદની સજા

રાજપીપળા કોર્ટનો મહત્વપૂર્ણ ચુકાદો
નર્મદા જિલ્લાના દેડિયાપાડામાં વર્ષ 2023ના વિવાદાસ્પદ કેસમાં રાજપીપળા સેશન્સ કોર્ટે ચુકાદો આપ્યો છે. આમ આદમી પાર્ટીના ધારાસભ્ય ચૈતર વસાવા, તેમની પત્ની સહિત 9 લોકોને કોર્ટે દોષિત જાહેર કર્યા છે. એડિશનલ સેશન્સ કોર્ટે તમામ આરોપીઓને દોષિત જાહેર કર્યા બાદ સજા સંભળાવી હતી. જેમાં MLA ચૈતર વસાવા અને તેમની પત્ની શકુંતલા વસાવા સહિત 9 આરોપીને 7 વર્ષ કેદની સજા ફટકારી હતી. જ્યારે તમામ આરોપીઓને 96 હજારનો દંડ પણ ફટકારવામાં આવ્યો હતો. 

વન વિભાગના અધિકારી પર હુમલાનો હતો આરોપ
આ સમગ્ર મામલો દેડિયાપાડા વિસ્તારમાં આવેલી વન વિભાગની જમીનને લઈને ઊભા થયેલા વિવાદ સાથે જોડાયેલો છે. ઘટના સમયે ફરજ પર રહેલા ફોરેસ્ટ વિભાગના અધિકારી પર હુમલો કરાયો હોવાનો આરોપ મૂકવામાં આવ્યો હતો. ત્યારબાદ ચૈતર વસાવા સહિત 9 લોકો સામે ગુનો નોંધાયો હતો.

લાંબી કાનૂની પ્રક્રિયા બાદ આવ્યો ચુકાદો
છેલ્લા લગભગ ત્રણ વર્ષથી ચાલી રહેલી કોર્ટ કાર્યવાહી બાદ હવે કેસનો મહત્વપૂર્ણ તબક્કો પૂર્ણ થયો છે. મંગળવારે કોર્ટ દ્વારા તમામ આરોપીઓને દોષિત જાહેર કરવામાં આવ્યા હતા. કેસની સુનાવણી દરમિયાન સરકારી પક્ષ દ્વારા રજૂ કરાયેલા પુરાવા અને દલીલોને ધ્યાનમાં રાખીને આ નિર્ણય લેવામાં આવ્યો હોવાનું જાણવા મળ્યું છે. ઇન્ચાર્જ સરકારી વકીલ વંદના ભટ્ટે જણાવ્યું કે, 'આ કેસ વર્ષ 2023 માં ફોરેસ્ટ ઓફિસર પર થયેલા હુમલાનો છે. જેમાં ચૈતર વસાવા અને તેમની પત્ની સહિત 9 આરોપીઓ સામેલ છે. 

તમામ આરોપીઓને 7 વર્ષ કેદની સજા ફટકારી
આ કેસમાં માત્ર ચૈતર વસાવા જ નહીં. પરંતુ તેમના પત્ની સહિત 9 આરોપીઓ દોષિત જાહેર થયા છે. વન વિભાગના કર્મચારીઓ પર હુમલો કરવા, સરકારી ફરજમાં રૂકાવટ લાવવા અને હવામાં ફાયરિંગ કરી ધમકાવવાના ગંભીર આક્ષેપો હેઠળ ગુનો નોંધાયો હતો. જેમાં તમામ આરોપીઓને 7 વર્ષ કેદની સજા અને રૂપિયા 96 હજારનો દંડ ફટકાર્યો હતો. 

ચૈતર વસાવા ગુજરાત AAPના દિગ્ગજ આદિવાસી નેતા છે. આ ચુકાદા બાદ તેમના ધારાસભ્ય પદ અને રાજકીય ભવિષ્ય પર મોટો ખતરો છે. પ્રારંભિક તબક્કામાં આ કેસની કાર્યવાહી દરમિયાન મુખ્ય સરકારી વકીલ તરીકે જે. જે. ગોહિલે દલીલો કરી હતી. હાલમાં સ્પેશિયલ પબ્લિક પ્રોસિક્યુટર તરીકે મિસ્ટર અય્યર સરકાર તરફથી દલીલો રજૂ કરી રહ્યા છે.