ગુજરાત કોંગ્રેસના નવા પ્રમુખ કોણ? પાટીદાર કે ઓબીસી નેતા માટે હાઈકમાન્ડનું મંથન!

કડી અને વિસાવદર વિધાનસભાની પેટા ચૂંટણીમાં કોંગ્રેસનો કારમો પરાજય થયો છે. બંને બેઠકોની હાર સ્વીકારી પ્રદેશ પ્રમુખ શક્તિસિંહ ગોહિલે તાત્કાલિક રાજીનામું ધરી દીધું છે. ધારાસભ્ય શૈલેષ પરમારને ઈન્ચાર્જ પ્રદેશ પ્રમુખ બનાવાયા છે. ત્યારે આગામી દિવસોમાં કોંગ્રેસનો કાંટાળો તાજ કોના શિરે મૂકાશે તે અંગે રાજકીય અટકળો તેજ બની છે. પ્રદેશ પ્રમુખ તરીકે પાટીદાર અથવા ઓબીસી નેતાની પસંદગી કરવામાં આવે તેવી સંભાવના છે. છેલ્લાં 30 વર્ષથી સત્તાવિહોણી કોંગ્રેસનું કાર્યાલય ચલાવવા માટે મોટો ખર્ચ થતો હોવાથી પ્રમુખપદ સ્વીકારવા માટે નેતાઓ તૈયાર થતાં નહી હોવાનું જાણવા મળ્યું છે. 

છેલ્લાં ત્રણ દાયકાથી ગુજરાતમાં કોંગ્રેસ મૃતપ્રાય બની ગઈ છે. મૃતપ્રાય બનેલી કોંગ્રેસમાં પ્રાણ પુરવા માટે રાહુલ ગાંધીએ એપ્રિલ-2025થી પ્રયાસો શરૂ કર્યા છે. રાષ્ટ્રીય અધિવેશનના આયોજન બાદ સંગઠન સૃજન અભિયાનનો પણ ગુજરાતથી પ્રારંભ કરાયો હતો. જો કે, કડી અને વિસાવદર પેટાચૂંટણીમાં કોંગ્રેસનો રકાસ થતાં હાઈકમાન્ડના પ્રયાસોને ઝટકો લાગ્યો છે. જો કે, પેટાચૂંટણીમાં હારના બહાને શક્તિસિંહ ગોહિલે પ્રમુખપદેથી રાજીનામું આપી દીધું છે. તેથી કોંગ્રેસમાં એક સાંધે ત્યાં તેર તૂટે તેવી સ્થિતિ સર્જાઇ છે. જેના કારણે ગુજરાતમાં કોંગ્રેસની હાલત વધુ બદતર થઈ રહી છે.

શહેર અને જિલ્લા પ્રમુખોની પસંદગી પહેલાં કોંગ્રેસમાં આંતરિક વિખવાદ જોવા મળ્યો હતો. તેવામાં પ્રદેશ પ્રમુખની નિમણૂકને લઈ વિખવાદ વધે તેવી શક્યતા છે. પ્રદેશ પ્રમુખની નિમણૂકમાં કોંગ્રેસ માટે જાતિ સમીકરણ માથાનો દુઃખાવો બને તેવી પૂરેપૂરી શક્યતા છે. ગુજરાતમાં પ્રદેશ પ્રમુખ તરીકે ઓબીસી અથવા પાટીદાર સમાજના નેતાની પસંદગી થવાની સંભાવના છે. કોંગ્રેસ હાઈકમાન્ડે પણ તે દિશામાં મંથન ચાલુ કર્યુ હોવાનું સૂત્રો દ્વારા જાણવા મળ્યું છે.

વર્ષ 2027ની વિધાનસભા ચૂંટણીને લઈ ગુજરાત કોંગ્રેસના માળખા પર પ્રભુત્વ જમાવી શકે તેવા નેતાની હાઈકમાન્ડે શોધખોળ શરૂ કરી છે. પ્રદેશ કોગ્રેસ પ્રમુખપદ માટે ઓબીસી નેતાની પસંદગી કરવાની થાય તો સાંસદ ગેનીબેન ઠાકોર અને વિધાનસભા વિપક્ષના નેતા અમિત ચાવડાનું નામ ટોપ પર ચાલી રહ્યું છે. કોળી નેતા અને પૂર્વ ધારાસભ્ય પૂંજા વંશની ચર્ચા ઉઠી છે.

પાટીદાર સમાજમાંથી પસંદગી કરવામાં આવે તો પરેશ ધાનાણી અને વિરજી ઠુમ્મરના નામ રેસમાં છે. જો કે, શહેર અને જિલ્લા પ્રમુખની નિમણૂક પ્રક્રિયાની માફક પ્રદેશ પ્રમુખની નિમણૂકમાં કાર્યકરોનો મત લેવાય તો જૂના એકપણ કોંગ્રેસી નેતાની પસંદગી થવાની શક્યતા નહિવત છે. તેવા સમયે હાઇકમાન્ડ ગુજરાત કોંગ્રેસના પ્રમુખ કોને બનાવે છે તેના ઉપર કાર્યકરોની નજર મંડાઇ છે.  

વિધાનસભા વિપક્ષના નેતા પણ બદલાવાની સંભાવના

કોંગ્રેસ હાઈકમાન્ડે નવા પ્રદેશ પ્રમુખની શોધખોળ શરૂ કરી છે. તેવા સમયે ઓબીસી નેતા તરીકે અમિત ચાવડાનું નામ ચર્ચામાં છે. અમિત ચાવડાને પ્રદેશ પ્રમુખ બનાવાય તો વિધાનસભા વિપક્ષ પદ અન્ય નેતાને સોંપવામાં આવી શકે છે. જાતિ સમીકરણ સાચવવા માટે વડગામના ધારાસભ્ય જીજ્ઞેશ મેવાણીને વિધાનસભા વિપક્ષ નેતા બનાવાઈ શકે છે. જ્યારે પાટણના ધારાસભ્ય કિરીટ પટેલને શેલેષ પરમારના સ્થાને વિધાનસભા વિપક્ષના ઉપનેતાનું પદ સોંપાઈ શકે છે.  

શહેર-જિલ્લા પ્રમુખોની નિમણૂકો બાદ કાર્યકરોમાં અસંતોષ

કોંગ્રેસે ગુજરાતમાં 40 શહેર અને જિલ્લા પ્રમુખોની નિમણૂક કરી છે. જેમાં 14 ઓબીસી, 7 એસટી, 4 એસસી અને 15 જનરલ વર્ગના નેતાની પસંદગી કરવામાં આવી છે. જેમાંથી 15 જિલ્લા પ્રમુખો અમિત ચાવડાના છાવણીના હોવાનું મનાઈ રહ્યું છે. પ્રદેશ પ્રમુખ શક્તિસિંહ ગોહિલની છાવણીના ઘણા નેતાઓને સ્થાન મળ્યું નહી હોવાની કાર્યકરોમાં ચર્ચા થઈ રહી છે.

એવું પણ જાણવા મળ્યું છે કે, શહેર-જિલ્લા પ્રમુખની નિમણૂકના વિવાદે શક્તિસિંહ ગોહિલનો ભોગ લીધો છે.  શહેર-જીલ્લા પ્રમુખોની પસંદગીમાં કાર્યકરોનો મત લેવામાં આવ્યો હતો. તેમ છતાં કેટલાક જિલ્લાઓમાં અસંતોષ જોવા મળ્યો છે. વલસાડ જિલ્લામાં પૂર્વ સાંસદ કિશન પટેલની નિમણૂક સામે સ્થાનિક કાર્યકરોએ વિરોધ કર્યો છે. પોતાના મળતિયાઓને હોદ્દા આપી દેવાયા હોવાનો આક્ષેપ કરી કાર્યકરો સોશિયલ મીડિયામાં ઉભરો ઠાલવી રહ્યાં છે.